އިސްރާއީލާ ގުޅުންހުރި އުފެއްދުންތަކުން ނަގާ ޑިއުޓީ ބޮޑުކުރުމަށް ގޮވާލާ ގަރާރެއް، އިނގުރައިދޫ ކައުންސިލުން ފާސްކޮށްފި
އިސްރާއީލްގެ އުފެއްދުންތަކާއި އަދި އެޤައުމަށް ހަރަދުކުރާ ފަރާތްތަކުގެ އުފެއްދުންތަކުގެ ޑިއުޓީ ބޮޑުކުރުމަށް ގޮވާލާ ގަރާރެއް ރ.އިނގުރައިދޫ ކައުންސިލުން މިއަދު ފާސްކޮށްފިއެވެ.
އިނގުރައިދޫ ކައުންސިލުން ފާސްކުރި ގަރާރުގައި ބުނެފައިވަނީ، 2023 ވަނަ އަހަރުގެ އޮކްޓޯބަރުމަހުގެ 7 ވަނަ ދުވަހުން ފެށިގެން މިއަދާހަމަޔަށް ފަލަސްތީނުގެ ނަސްލު ނައްތާލުމަށް އަނިޔާވެރި ޒަޔަނިސްޓް ޔަހޫދީ އިސްރާއީލުން ކުރަމުންގެންދާ ހަނގުރާމައިގެ ސަބަބުން ފަލަސްތީނުގެ އެތައްހާސް މުސްލިމުންނެއް ޝަހީދުކޮށްލާފައިވާކަމަށެވެ. އަދި ހަމަ އެހެންމެ އެތަކެއް މުސްލިމުން ޒަހަމްވެ، އެތައްހާސް މުސްލިމުންނެއް ރަހީނުކޮށް، މުޅި ޢައްޒާ ސުންނާފަތިކޮށް ދިރިއުޅޫމުެގ އެއްވެސް ވަސީލަތެއްނެތި ކެއިން ބުއިމާއި އުނު އޮރިޔާން ނިވާކުރުމަށްވެސް ނުކުޅެދުންތެރިކޮސް ބިކަހާލުގައި ޖައްސާފައިވާކަމަށެވެ.
އިނގުރައިދޫ ކައުންސިލުން ވަނީ މި ހާލަތުގައި ފަލަސްތީނާއެކު ރާއްޖެ ވާކަން މުޅިދުނިޔެއަށް ހާމަކޮށް އިސްރާއީލް ޕާސްޕޯޓް މަނާކުރުމަށް ނިންމެވި ހަރުދަނާ ނިންމެވުމަށް އިނގުރައިދޫ ކައުންސިލާއި ރައްޔިތުންގެ ނަމުގައި ރައީސް ޑރ.މުހައްމަދު މުއިއްޒަށް ޝުކުރު އަދާކުރައްވާފައެވެ.
އަދި ހަމަ އެހެންމެ އެބީދައިން އިސްރާއީލްގެ އުފެއްދުންތަކާއި އިސްރާއީލަށް ހަރަދުކުރާ ފަރާތްތަކުގެ އުފެއްދުންތައް ރާއްޖެއަށް އެތެރެކުރުމާއި އިސްތިހާރުކުރުން ހުއްޓާލުމަށް، ނުވަތަ އެފަދަ އުފެއްދުންތައް އެތެރެކުރުމަށް ނަގާ އިމްޕޯޓް ޑިއުޓީ ބޮޑުކުރުމަށް ދިވެހި ސަރުކާރަށް ގޮވާލާކަމަށް އިނގުރައިދޫ ކައުންސިލުން ނެރުނު ގަރާރުގައި ގޮވާލާފައި ވެއެވެެ.
އިސްރާއީލާއި ޔަހޫދީ ސިފައިންނަށް ވާގިވެރިވާ ފަރާތްތަކުގެ އުފެއްދުންތަކުން ނަގާ ޑިއުޓީތައް ބޮޑުކުރުމަށް އިނގުރައިދޫ ކައުންސިލުން ގޮވާލާ ގަރާރެއް ފާސްކުރިއިރު، މީގެ ކުރިން އާއްމުކޮށް އެކި ފަރާތްތަކުން ގޮވާލަމުން އައިސްފައިވަނީ އިސްރާއީލާއި އަދި އެފަރާތްތަކަށް މަދަދުވެރިވާ ފަރާތްތަކުގެ އުފެއްދުންތައް ބޮއިކޮޓްކުުމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
