ސިންގަލްސް ޗެންޕިއަންކަން ނަބީހާ އާއި ނިބާލްއަށް

ދިރާގު މޯލްޑިވްސް ޖޫނިއާ އޯޕަން ބެޑްމިންޓަން މުބާރާތުގެ އޯޕަން ކެޓަގަރީގެ ސިންގަލްސް ޗެންޕިއަންކަން، ރިވައިވަލް ސްޕޯޓްސްގެ އަައިމިނަތު ނަބީހާ އަބްދުލް ރައްޒާގު އާއި ނިބާލް އަހުމަދު ހޯދައިފި އެވެ.

މުބާރާތުގެ ފިރިހެން ސިންގަލްސް ޗެންޕިއަންކަން ނިބާލް ހޯދީ ފައިނަލުގައި ރިވައިވަލްގެ ޒަޔާން ޒަކީއާ ސީދާ ދެ ސެޓުން ބަލިކުރުމަށްފަހު އެވެ. އަދި ފައިނަލް މެޗުގެ ސެޓްތައް ނިބާލް ކާމިޔާބުކޮށްފައިވަނީ 21-19، 21-13 ގެ ނަތީޖާއަކުންނެވެ.

އެންމެ ފަހުން ބޭއްވި ގައުމީ ބެޑްމިންޓަން މުބާރާތުގެ ދެ ފައިނަލުގައި ވެސް ވާދަކޮށްފައިވަނީ ޒަޔާން ޒަކީ އާއި ނިބާލް އެވެ. އެގޮތުން، 2022 ވަނަ އަހަރު ޒަޔާން ބަލިކޮށް ނިބާލް ޗެންޕިއަންކަން ހޯދިއިރު، 2023 ވަނަ އަހަރު ނިބާލް ބަލިކޮށް ޗެންޕިއަންކަން ހޯދީ ޒަޔާން ޒަކީ އެވެ.

މީގެ އިތުރުން ޒަޔާން ވަނީ 2017 ވަނަ އަަަހަރު ވެސް ގައުމީ ބެޑްމިންޓަން މުބާރާތުގެ ސިންގަލްސް ޗެންޕިއަންކަން ހޯދައިފަ އެވެ. އަދި، ދާދި ފަހުން ނައިފަރުގައި ބޭއްވު، ނައިފަރު އޯޕަން މުބާރާތުގެ ސިންގަލްސް ޗެންޕިއަންކަން ޒަޔާން ހޯދީ ވެސް ނިބާލް ބަލިކުރުމަށްފަހު އެވެ.

މިއަހަރުގެ މުބާރާތުގެ އަންހެން ސިންގަލްސްގެ ފުރަތަމަ ސެޓުގައި، ނަބީހާ 10-4 ކުރީގައި އޮއްވައި، ފާތިމަތު ނަބާހާ އަށް އަނިޔާވެ މެޗު ކުރިއަށްނުގެންދެވުމުން ނަބީހާއަށް މެޗު ލިބުނީ އެވެ. އަދި އަންހެން ޑަބަލްސް ޗެންޕިއަންކަން، ނަބީހާ އާއި ނަބާހާގެ ޕެއާ އިން ހޯދީ ފައިނަލުގައި ފަސޭހަކަމާއެކު ސީދާ ދެ ސެޓުން ފިލިޕީންސްގެ މަރޭކްރިސް މިސްޓީ އާއި ރޮސެލީން ކަޔައޯން ވަހީދުގެ ޕެއާ ބަލިކުރުމަށްފަހު އެވެ. އަދި އެމެޗުގެ ސެޓުތައް ނަބީހާ އާއި ނަބާހާގެ ޕެއާ އިން ކާމިޔާބުކުރީ 21-06، 21-10 ގެ ނަތީޖާައަކުންނެވެ.

މިއަހަރުގެ މުބާރާތުގައި އަށް ގައުމަކުން 347 ކުޅުންތެރިން ވާދަކުރިއިރު، 700 އަށް ވުރެން ގިނަ މެޗު ވަނީ ކުޅެފައެެވެ. އަދި މުބާރާތުގެ ނިންމުމުގެ ރަސްމިއްޔާތު ޝަރަފްވެރިކޮށްދެއްވީ، ރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.