ވެލިދޫގައި ސީ އެމްބިއުލާންސްގެ ޚިދުމަތް ފަށައިފި، އިތުރު ނުވަ ރަށެއްގައި ފަށަނީ

ނ. ވެލިދޫގައި ސީ އެމްބިއުލާންސްގެ ޚިދުމަތް މިއަދު ރަސްމީކޮށް ފަށައިފި އެވެ.

މިއަދު ހަވީރު އެ ރަށުގައި އޮތް ރަސްމިއްޔާތެއްގައި މި ހިދުމަތް ފައްޓަވައި ދެއްވީ ޑިފެންސްް މިނިސްޓްރީގެ ނައިބު ފާޠިމަތު މިޒުނާ ޢަލީ އެވެ.

އޭނާ ވިދާޅުވި ގޮތުގައި ވެލިދޫގައި މި ހިދުމަތް ފެށުމާއެކު އެ އަތޮޅުގެ ރައްޔިތުންނަށް ކުއްލި އަވަސް ސިއްހީ ފަރުވާ ހޯދަން އިތުރަށް ފަހިވެގެން ދާނެ އެވެ.

މީގެ ކުރީން ނޫނު އަތޮޅުގައި ސީއެމްބިއުލާންސްގެ ހިދުމަތް ދެމުން އައީ މަނަދޫގައި އެކަނިކަން ފާހަގަ ކުރައްވާ މިޒުނާ ވިދާޅުވީ ވެލިދޫގައި ހިދުމަތް ފެށުމުން ރައްޔިތުންގެ ކަންބޮޑުވުންތަކަށް ބޮޑު ހައްލެއް ލިބިގެންދާނެ ކަމަށެވެ.

ނޫނު އަތޮޅާއި ވެލިދޫގައި ވެސް ރަށު ފަތުރުވެރިކަން ފުޅާވަމުންދާއިރު މިފަދަ ހިދުމަތެއް ވެލިދޫއަށް ނުހަނު މުހިންމު ކަމުގައި މިޒުނާ ފާހަގަ ކުރެއްވި އެވެ.

ސަރުކާރުން ދަނީ ގިނަ ރަށްތަކެއްގައި ސީއެމްބިއުލާންސްގެ ހިދުމަތް ފެށުމަށް މަސައްކަތް ކުރަމުންނެވެ. އެގޮތުން އިތުރު ނުވަ ރަށެއްގައި މި ހިދުމަތް ފެށުމަށް ދަނީ މަސައްކަތް ކުރަމުންނެވެ.

އަތޮޅު ހޮސްޕިޓަލުތަކަށް ބޭނުންވާ ލޯންޗުތައް މި މަހުގެ ނިޔަލަށް ފޮނުވަން ވެސް ދަނީ މަސައްކަތް ކުރަމުންނެވެ. ހެލްތް މިނިސްޓަރު  ޢަބްދުﷲ ނާޘިމް އިބްރާހީމް ވިދާޅުވީ އަތޮޅުތަކުގައި ސިއްހީ ޚިދުމަތް ފޯރުކޮށްދިނުމަށް ބޭނުންކުރާ އެންމެ މުހިންމު ސިޔާސަތަކީ އަތޮޅު ހޮސްޕިޓަލްތަކުން ސިއްޙީ މަރުކަޒުތަކަށް ޚިދުމަތްތައް ފޯރުކޮށްދިނުން ކަމަށެވެ. ރީޖަނަލް ހޮސްޕިޓަލާއި އަތޮޅު ހޮސްޕިޓަލުގައި ތިއްބަވާ ޚާއްސަ ޑޮކްޓަރުން އަތޮޅުގެ އެކި ރަށްތަކަށް ޒިޔާރަތްކުރުމަށް މީގެ ސަބަބުން ފަސޭހަތަކެއް ލިބިގެންދާނެ ކަމަށެވެ.

މިނިސްޓަރު ވިދާޅުވީ މިކަން ހަރުދަނާކޮށް ގެންދިޔުމަށްޓަކައި ކޮންމެ އަތޮޅު ހޮސްޕިޓަލެއްގައި އަދި ރީޖަނަލް ހޮސްޕިޓަލެއްގައިވެސް ދަތުރު ކުރެވޭނެ ނިޒާމެއް ޤާއިމްވެފައި އޮތުމަކީ މުހިންމުކަމެއް ކަމަށެވެ. އެގޮތުން ހެލްތް މިނިސްޓްރީން ކުރަމުންދާ މަސައްކަތުގެ ދަށުން މިހާރު ލޯންޗު ލިބިފައި ނެތް އަތޮޅުތަކަށް ލޯންޗު ފޯރުކޮށްދިނުމުގެ މަސައްކަތުގެ ދަށުން ލޯންޗު ލިބިފައިނެތް ހަތް އަތޮޅެއްގެ ލޯންޗު ހޯދުމުގެ މަސައްކަތް މިހާރު ކުރަމުން އަންނަ ކަމަށެވެ. އެގޮތުން މިމަހުގެ ނިޔަލަށް ލޯންޗު ނެތް ހުރިހާ އަތޮޅަކަށް ލޯންޗު ފޮނުވައި މަސައްކަތް ނިމެނޭކަމަށް މިނިސްޓަރު ވިދާޅުވި އެވެ.