ރުހުން ނުދިން ވަޒީރުން އަލުން ކެބިނެޓަށް އައްޔަން ކުރުމާ ދެކޮޅަށް މަޖިލީހަށް ގަރާރެއް!

ރައްޔިތުންގެ މަޖިލީހުން ރުހުން ދީފައިނުވާ ވަޒީރުން އަލުން ކެބިނެޓަށް އައްޔަން ކުރެއްވި މައްސަލަ އާއި ދެކޮޅަށް ގަރާރާރެއް މަޖިލީހަށް ހުށަހަޅައިފިއެވެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓަށް އައްޔަނު ކުރެވުނު ވަޒީރުންގެ ތެރެއިން، އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ މުހައްމަދު ޝަހީމް ޢަލީ ސަޢީދާއި، ގެދޮރުވެރިކަމާއި ބިމާއި ޢުމްރާނީ ތަރައްޤީއާއި ބެހޭ ވުޒާރާގެ ވަޒީރު ޑރ ޢަލީ ހައިދަރު އާއި ބަންޑާރަ ނާއިބު އަހުމަދު އުޝާމަށް މަޖިލީހުން ރުހުން ދީފައެއް ނުވެއެވެ.

އެހެން ނަމަވެސް، ބަންޑާރަ ނާއިބާއި އެ ދެ ވަޒީރުން އަލުން މަގާމަށް އައްޔަނު ކުރައްވައި ރުހުން ހޯއްދެވުމަށް މަޖިލީހަށް ފޮނުއްވާފައި ވާއިރު، އެފަދައިން މަޖިލީހުން ރުހުން ނުދޭ ވަޒީރުން އަލުން މަގާމަށް އައްޔަނު ކުރުމާއި ދެކޮޅަށް ގަލޮޅު އުތުރު ދާއިރާގެ މެންބަރު އީވާ އަބްދުالله ވަނީ މަޖިލީހަށް ގަރާރެއް ހުށަހަޅުއްވާފައެވެ.

އެ ގަރާރުގެ ފުރަތަމަ ކިޔުން އިއްވައި އިބްތިދާއީ ބަހުސްގެ މަރުހަލާ މިހާރު ކުރިއަށްދާއިރު، ގަރާރު ހުށަހަޅުއްވަމުން އީވާ ވިދާޅުވީ، 2008 ވަނަ އަހަރު ގާނޫނު އަސާސީ އިސްލާހުކޮށް ގެނެވުނު ބަދަލުގެ އެންމެ ބޮޑު ބޭނުމަކީ އެއް ބާރަކަށް "މާބޮޑު ބާރެއް" ނުދިނުން ކަމަށެވެ.

އެއްވެސް ބާރަކަށް، ނުވަތަ އެއްވެސް ވެރިއަކަށް ނިޒާމް އެބިޔުސް ނުކުރެވޭނެ ގޮތް ހެދުން. އަދި އެބާރުތައް މިންގަޑެއްގެ ތެރޭގައި ހިފެހެއްޓުމަށްޓަކައި، ނުވަތަ ވެރީން ނާޖާއިޒް ގޮތުގައި ބާރުތައް ބޭނުން ނުކުރުމަށް ހިފެހެއްޓުމަށްޓަކައި.

އީވާ އަބްދުالله

އެއްބާރަކަށް މާ ބޮޑު ބާރެއް ލިބުނަ ނުދިނުމަށްޓަކައި ސަރުކާރަށް ފާރަވެރިވުމުގެ ބާރު ރައްޔިތުންގެ މަޖިލީހަށް ދީފައިވާ ކަމަށް އީވާ ވިދާޅުވި އެވެ. އެހެންނަމަވެސް, އައު ގާނޫނު އަސާސީ އެކުލަވާލެވުނު ފަހުންވެސް ފެންނަމުންދަނީ ވަކިވެފައިވާ ތިން ބާރުން އެއް ބާރުން އަނެއް ބާރުގެ މައްޗަށް ނުފޫޒް ފޯރުވަމުންދާ ކަން ކަމަށް އޭނާ ވިދާޅުވި އެވެ.

އީވާ އިތުރަށް ވިދާޅުވީ، ރައްޔިތުންގެ މަޖިލީހުން ވަޒީރުންނަށް ރުހުން ނުދިނުމުން، އެ ނުރުހުން ބޮލާލާ ޖެހުމަކީ ރައްޔިތުންގެ މަޖިލީހަށް ލިބިފައިވާ ބާރާއި، އަދި ގާނޫނު އަސާސީ ބޮލާލާ ޖެހުން ކަމަށެވެ.

އީވާ ވިދާޅުވީ، ރައްޔިތުންގެ މަޖިލީހުގެ ރުހުން ނުލިބުމުން، އެ މަގާމަކަށް އަލުން އެ ވަޒީރަކު އައްޔަނު ނުކުރުމަކީ ސްޕްރީމްކޯޓުން ވެސް ތާއީދު ކުރާ ގޮތް ކަމަށާ އެކަމަށް ތާއީދުކޮށް ސްޕްރީމްކޯޓުން ވެސް ހުކުމެއް ކޮށްފައިވާ ކަމަށެވެ.

މިއާއެކު އީވާ ވަނީ މަޖިލީހުގެ ބާރުތަކަށް އިހްތިރާމްކޮށް، އެ ބާރުތަކަށް އަރައި ނުގަތުމަށް ސަރުކާރަށް ގޮވާލާފައެވެ.

އީވާގެ އެ ގަރާރުގެ ބަހުސް މިއަދު މަޖިކީހުގައި ފަށާފައިވާއިރު، ގަރާރާމެދު ގޮތެއް ނިންމެންދެން ވަޒީރުންނަށް ރުހުން ދިނުމުގެ މައްސަލަ ފަސް ކުރަން މަޖިލީހުގެ ރައީސް މުހައްމަދު އަސްލަމް ވަނީ ނިންމަވާފައެވެ.