އަމިއްލަ އުފެއްދުންތައް ބާޒާރަށް ނެރުއްވުމަށް ޒާހިރުވަނީ ގިނަ މަސައްކަތްތަކެއް ކުރައްވާފައި: ރައީސް

ރާއްޖޭގެ އިޤްތިސާދުގެ ތެރެއަށް އަމިއްލަ އުފެއްދުންތައް ނެރުއްވުމަށް ވިޔަފާރިވެރިޔާ މުޙައްމަދު ޒާހިރު (އޯކޭ ޒާހިރު) ވަނީ ގިނަ  މަސައްކަތްތަކެއް ކުރައްވާފައިވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އޯކޭ ޒާހިރު ނިޔާވުމާއި ގުޅިގެން ރައީސް ޑރ.މުއިއްޒު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖޭގައި ކާރުޚާނާ ހިންގަވައި، ޤައުމުގެ އަމިއްލަ އުފެއްދުންތައް ބާޒާރަށް ނެރުއްވުމަށް ޒާހިރު  ގިނަ މަސައްކަތްތަކެއް ކުރައްވާފައިވާ ކަމަށެވެ. މިގޮތުން ކުރެއްވި މަސައްކަތްތަކާއެކު ޒާހިރު ވަނީ، އިޤްތިޞާދުކުރިއެރުވުމުގެ ރޮނގުން ޤައުމީ އިނާމުވެސް ޙާޞިލްކުރައްވާފައި ކަމަށް ރައީސް ވަނީ ފާހަގަކުރައްވާފައެވެ.

ވިޔަފާރިވެރިޔާ މުޙައްމަދު ޒާހިރު (އޯކޭ ޒާހިރު) އަވަހާރަވުމުގެ ހިތާމައިގާ ބައިވެރިވެ، ރައީސް ޑރ.މުއިއްޒު ވަނީ މަރުޙޫމްގެ ޢާއިލާއަށް ތަޢުޒިޔާ ދަންނަވާފައެވެ.

ޒާހިރު ނިޔާވުމާ ގުޅިގެން ނައިބުރައީސް ހުސައިން މުހައްމަދު ލަތީފްވެސް ވަނީ މަރުހޫމުގެ އާއިލާއަށް ތައުޒިޔާ ދަންނަވާފައެވެ.

ޒާހިރު ނިޔާވެފައިވަނީ ހާލުބޮޑުވެގެން އައިސީޔޫގައި ފަރުވާދެމުންދަނިކޮށް އަވައްޓެރި ލަންކާގެ ހޮސްޕިޓަލެއްގައެވެ. ނިޔާވިއިރު އުމުރުފުޅަކީ 76 އަހަރެވެ. ޒާހިރު ނިޔާވީ، ލަންކާގެ އާސީރީ ހޮސްޕިޓަލުގައި ފަރުވާދެމުން ދަނިކޮށް ފަތިހު ގާތްގަނޑަކަށް 04:30 ހާއިރު އެވެ.

ދިވެހިންގެ ތެރޭގައި އެންމެ ފުރަތަމަ އޯކޭ ޒާހިރު މަޝްހޫރުވެގެން ދިޔައީ އޭނާގެ އީޖާދީ އުފެއްދުންތަކުގެ ސަބަބުންނެވެ. އައު އުފެއްދުންތައް ދިވެހިންގެ ތެރެއަށް ނެރުއްވުމުގައި ޒާހިރަކީ ނަމޫނާ ބޭފުޅެކެވެ.

މީގެ އިތުރުން ޒާހިރަކީ ރާއްޖޭގެ ސިޔާސީ ހަޔާތުގައިވެސް ފާހަގަކޮށްލެވޭ ފަދަ މަސައްކަތްތަކެއް ކުރެއްވި ބޭފުޅެކެވެ. އިސްލާހީ މަސައްކަތްތައް ކުރެއްވިއިރު އެންމެ އިސް ސަފްގައި ހުންނަވައިގެން މަސައްކަތްޕުޅު ކުރެއްވިއެވެ.