ރައީސްގެ ޓީމަކީ އާޖެންޓީނާ، ދެވަނަ ޓީމަކީ އިނގިރޭސިވިލާތް

ފީފާ ވޯލްޑްކަޕްގައި ތާއީދު ކުރައްވަނީ އާޖެންޓީއަށް ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ.

ރައީސް މިހެން ވިދާޅުވީ ކުރިއަށްއޮތް ވަރލްޑްކަޕާ ގުޅިގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސޮއި ހިމެނޭ ހާއްސަ ފުޓްބޯޅަތަކެއް ދިވެހި ކުޅިވަރު ލެޖެންޑުންނަށް ހަދިޔާއެއްގެ ގޮތުގައި ދިނުމަށް ކުޅިވަރާ ބެހޭ ވުޒާރާއިން ނިންމުމުން އެ ބޯޅަތަކުގައި ސޮއިކުރައްވާ ވާހަކަފުޅު ދައްކަވަމުންނެވެ.

ރައީސް ވިދާޅުވީ އެމަނިކުފާނު ސަޕޯޓްކުރައްވާ ޓީމަކީ އާޖެންޓީނާ ކަމަށެވެ. އެ ގައުމަށް ތާއީދުކުރައްވަން ފެއްޓެވީ މެރެޑޯނާގެ ކުޅުން ފެނި ކަމުގޮސްގެން ކަމުގައި ވިދާޅުވި އެވެ.

"އަޅުގަނޑު މިއީ ވަރަށް ކުޑައިރުއްސުރެ އާޖެންޓީނާގެ ސަޕޯޓަރެއް،" ރައީސް ވިދާޅުވި އެވެ.

އަދި ވިދާޅުވީ ދެވަނަ ޓީމަކަށް ސަޕޯޓްކުރައްވަނީ އިނގިރޭސިވިލާތަށް ކަމަށެވެ. އެ ގައުމުގައި ގިނަ ދުވަސްތަކަކު އުޅުއްވާފައިވާތީ މެންޗެންސްޓާ ޔުނައިޑެޓަށް ބޮޑު ތާއީދެއް ކުރެވޭ ކަމުގައި ވިދާޅުވި އެވެ. އިނގިރޭސިންނަށް ސަޕޯޓް ކުރައްވަން ފެއްޓެވުނީ އެހެން ވެގެން ކަމުގައި ވިދާޅުވި އެވެ.

މެޗްތައް އޮންނަ ވަގުތުގެ ގޮތުން މެޗްތައް ބެއްލެވުމުގެ ކަންކަން އޮތީ ކިހިނެތްތޯ ސުވާލުކުރެއްވުމުން ރައީސް ވިދާޅުވީ، މިފަހަރު މެޗްތައް ބެލުމުގެ ކަންކަން އޮތީ ވަރަށް އުނދަގޫކޮށް ކަމަށާއި، ހުރިހާ މެޗްތަކެއް ނުބެލުނު ނަމަވެސް ވީވަރަކުން މެޗްތައް ބައްލަވާނޭކަމަށެވެ.

ރައީސް ވިދާޅުވީ މިފަހަރު ފްރާންސްވެސް ވަރަށް ވަރުގަދަ ވާނެކަމަށާއި، އަދި ހޮލެންޑްވެސް ފަހަރެއްގައި ތަށި ނަގާފާނޭކަމަށެވެ. ވަޒީރު ރާފިއުއާއެކު ދައްކަވަމުން ގެންދިޔަ އެންމެ ފަހު ވާހަކަފުޅަކަށް ރައީސް ވިދާޅުވީ، އުއްމީދުކުރަނީ ހުރިހާ ފަރާތްތަކަށްވެސް ވަރލްޑްކަޕް ބެލޭނޭ އިންތިޒާމުތައް ހަމަޖެހިފައި ހުންނާނޭކަމަށެވެ.