މަޖިލީހުގެ މެމްބަރުންގެ ވަކި އިންސައްތައެއް، އަންހެނުންނާއި ޒުވާނުންނަށް ކަނޑައަޅަނީ
މަޖިލީހުގެ މެމްބަރުންގެ ވަކި އިންސައްތައެއް، 30 އަހަރުން ދަށުގެ ޒުވާނުންގެ ގޮތުގައި ކަނޑައެޅުމަކީވެސް ސަރުކާރުގެ ރިފޯމް ޕެލޭނެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ މަޖިލީހުގައި މިހާރު ވަކި އަދަދެއް ޒުވާނުންނާއި އަންހެނުންނަށް ނޯންނަ ކަމަށާއި ނަމަވެސް ކުރިއަށް އޮތް ތަނުގައި މަޖިލިސް މެންބަރުންގެ ތެރެއިން ވަކި އަދަދެއް އަންނެނުންނަށް ހާއްސަ ކުރައްވައި 30 އަހަރުން ދަށުގެ ޒުވާނުންނަށް ހާއްސަ ކުރަން މަޖިލީހަށް އިސްލާހެއް ހުށަހަޅަން ގަސްތުކުރައްވާކަމަށް ރައީސް ވިދާޅުވިއެވެ.
އަދި މިކަމަށް ކުރަންޖެހޭ ދިރާސާތައް ކުރަމުންދާކަމަށް އެމަނިކުފާނު ވިދާޅުވިއެވެ.
ރައީސް މިއަދު ބޭއްވެވި ނޫސްވެރިންގެ ބައްދަލުވުމުގެ ތެރެއިން ދެއްކެވި ވާހަކަފުޅު
'ކައުންސިލް ކޮމްޕޮޒިޝަންގައި އެބަހުރި އަންހެނުންގެ އަދަދެއް ކަނޑައެޅިފަ. އެހެންނަމަވެސް އެމްޕީސްގެ ނޯންނާނެ އެގޮތަކަށް' ރައީސް ވިދާޅުވިއެވެ.
ރައީސް އިތުރަށް ވިދާޅުވީ، މަޖިލިސް މެންބަރުންގެ އަދަދު އިތުރުވަމުންދާ ދިއުން ހުއްޓުވުމާއެކު، ޒުވާނުންނާއި އަންހެނުންނަށް މަޖިލީހުން ފުރުސަތު ކަށަވަރުކޮށްދިނުމަކީ މި ގެންނަ އިސްލާހީ މަސައްކަތުގެ މުހިންމު ބައެއް ކަމަށެވެ.
މިކަމާ ގުޅޭ ދިރާސާ ނިމުމުން، ޒުވާނުންނާއި އަންހެނުންނަށް ހާއްސަކުރާނެ ސީދާ އިންސައްތަ އިއުލާނު ކުރައްވާނެ ކަމަށްވެސް އެމަނިކުފާނު ވިދާޅުވިއެވެ.
މީގެއިތުރުން، ބިލަށް އިތުރު އިސްލާހުތަކެއް ވެސް ހުށަހަޅަން ނިންމަވާއިފައިވާކަމަށް ރައީސް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
