ހާއްޕެގެ ބޭސްފަރުވާގެ ކަންކަން ކުރިއަށްގެންދާނީ ސަރުކާރާ އެފްއޭއެމުން: ޓޮމް
ލިޔުންތެރިޔާ
އަބްދުﷲ ހުސައިން
ރާއްޖެ ދުށް އެންމެ ހުނަރުވެރި އެއް ފުޓްސަލް ކުޅުންތެރިޔާ، އަލީ ހާފިޒް (ހާއްޕެ) ގެ ބޭސްފަރުވާގެ ކަންކަން ކުރިއަށްގެންދާނީ ސަރުކާރާ އެފްއޭއެމުން ކަމަށް، އެ އިދާރާގެ ރައީސް އަހުމަދު ތޯރިޤް (ޓޮމް) ވިދާޅުވެއްޖެއެވެ.
އޭއެފްސީ އޭޝިއަން ފުޓްސަލް ކަޕް ކޮލިފައިންގައި ރާއްޖެ އާއި މިޔަންމާ ބައްދަލުކުރި މެޗްގައި ހައްޕެގެ ފަޔަށް ލިބުނު ސީރިއަސް އަނިޔާއަކާ ގުޅިގެން އޭނާ މިވަގުތު ތައްޔާރުވަމުންދަނީ ބޭސްފަރުވާއަށް ރާއްޖެއިން ބޭރަށް ދިއުމަށެވެ. މިކަމާ ގުޅިގެން ކުރީގެ މަޖިލީހުގެ މެމްބަރުކަން ކުރެއްވި މުހައްމަދު ހަމީދު (މޮސްޓާ) ކުރެއްވި ޕޯސްޓެއްގައި ވަނީ ހާއްޕެ ބޭސް ފަރުވާއަށް ރާއްޖެއިން ބޭރަށް ދިއުމަށް ބޭނުންވާ ޑޮލަރު ހަމަނުވެގެން ނުފުރިފައި ހުރިކަމަށް ވިދާޅުވެފައެވެ.
މޮސްޓާގެ އެ ޕޯސްޓަށް ރައްދުދެއްވަމުން އެފްއޭއެމްގެ ރައީސް ޓޮމް ވިދާޅުވީ، އިންޖަރީވި ފުޓްސަލް ޕްލޭޔަރު ހާއްޕެގެ ފައިގެ އޮޕަރޭޝަން ކުރުމުގެ ކަންކަން އިންޑިޔާއިން ކުރާގޮތަށް ނިމިފައިވާކަމަށެވެ.
މިކަމުގެ މުއާމަލާތްތައް މިދިޔަ ބްރާސްފަތި ދުވަހު ނިމިފައިވާކަން ޓޮމް ވަނީ ފާހަގަކުރައްވާފައެވެ. އެގޮތުން އޮޕަރޭޝަނަށްދާނެ ޚަރަދާއި ކުޅުންތެރިޔާއާއި 2 އެހީތެރިންނާއި، ތިބުމާއި ކެއުމުގެ ޚަރަދުކުރާނީ އެފްއޭއެމުންނާއި ސަރުކާރުގެ އެންސްޕާގެ އެހީތެރިކަމާއެކުގައި ކަމަށް ޓޮމް ވިދާޅުވިއެވެ.
ޓޮމްގެ އެ ޕޯސްޓަށްފަހު މޮސްޓާ ފަހުން ކުރެއްވި ޕޯސްޓްގައި ވިދާޅުވީ އެއީ އެއްވެސް ބަޔަކު އަގު ވައްޓާލުމަށް ޖެހި ޕޯސްޓެއް ނޫންކަމަށެވެ. އެގޮތުން ގައުމީ ޓީމްގެ ކުޅުންތެރިއެއް ޤައުމު ތަމްސީލް ކުރަނިކޮށް އަނިޔާވެ 14 ދުވަސް ވާއިރު ފަރުވާއަށް ނުފުރިހުރުމަކީ ލަތުވެތި ކަމެއްކަމަށް އޭނާ ވިދާޅުވިއެވެ. މޮސްޓާ ބުނީ މީގެކުރިން ފުރާޅެއްގެ މަތިން ވެއްޓިފައިވަނިކޮށް ވީގޮތެއް ނޭނގި ފެނުނު މީހާއަށް މެލޭޝިއާއަށް ދިއުމަށް ފުލްކޮށް އާސަންދަ އަދި އެންސްޕާ ހަމަޖެހުނުކަމަށެވެ.
އޭއެފްސީ އޭޝިއަން ފުޓްސަލް ކަޕް ކޮލިފައިންގައި މިޔަންމާ އާ ދެކޮޅަށް ކުޅުނު މެޗްގައި ހާއްޕެގެ ފަޔަށް އަނިޔާވީ މެޗްގެ ފުރަތަމަ ހާފް ނިމެން އުޅެނިކޮށެވެ. ލިބުނު އަނިޔާ ސީރިއަސްކަމުން ހާއްޕެ ދަނޑުން ބޭލީ އަށިގަނޑުގެ އެހީގައެވެ. މިއީ ހައްޕެގެ ކެރިއަރުގައި މިފަދަ ސީރިއަސް އަނިޔާއެއް ލިބުނު ދެވަނަ ފަހަރެވެ. މިދިޔަ އަހަރުވެސް ހާއްޕެއަށް ލިބުނު ސީރިއަސް އަނިޔާއަކާ ގުޅިގެން ބައެއް މުހިންމު މުބާރާތްތައް ވަނީ ގެއްލިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
