އިސްރާއީލްގެ ހަމަލާއެއް ގޮދަންފުށް ޓްރަކަކަށް. 50 މީހެއްގެ ފުރާނަ ގެއްލުނު

ޢައްޒާގެ ދެކުނަށް ގޮދަންފުށް ހިފައިގެން ދިޔަ ޓްރަކަކަށް އިސްރާއީލް ސިފައިން ހަމަލާދީފިއެވެ.

އަލްޖަޒީރާއިން ބުނީ އިސްރާއީލް ސިފައިން އެ ޓްރަކަށް ހަމަލާދިން ވަގުތަކީ އެ ޓްރަކް ވަށައިގެން ކައިރީގައި އަންހެނުންނާއި ކުޑަކުދިން ތިބި ވަގުތެއްކަމަށެވެ. ބައެއް މަސްދަރުތަކުން ބުނާގޮތުގައި އިސްރާއީލުން ޓްރަކަށް ހަމަލާދިންއިރު ޓްރަކް ވަށައިގެން ވަރަށްގިނަ މީހުން ތިއްބެވެ. އެއީ އެހީގެ ތަކެތި ބަލައިގޮސްތިބި މީހުން ކަމަށްވެސް ބުންޏެވެ. ހަމަލާގައި 50 ހަށްވުރެ ގިނަ މީހުންގެ ފުރާނަ ގެއްލިފައިވާކަމަށް އަލްޖަޒީރާއިން ވަނީ ރިޕޯޓްކޮށްފައެވެ.

މި ހަމަލާގެ ކުރިންވެސް އިސްރާއީލް ސިފައިން ވަނީ ޖަބަލިއާ ރެފިއުޖީ ކޭމްޕަށް ހަމަލާތަކެއްދީފައެވެ. މި ހަމަލާތައް އަމާޒުވެފައިވަނީ ކުޑަކުދިންނާއި އަންހެނުންނަށެވެ. މަޖަލެއްގެ ގޮތުގައި އިސްރާއީލް ސިފައިން ފަލަސްތީނު ރައްޔިތުން ޗަހީދުކުރުމަކީ މިހާރު އާއްމު ކަމެކެވެ.

ޢައްޒާގައި އިސްރާއީލް ސިފައިން ހިންގަމުންގެންދާ ޖަރީމާތަކާ ގުޅިގެން އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ވަނީ ޢައްޒާގެ ހަމަނުޖެހުން އެންމެ އަނިޔާވެރި މަރުހަލާއަށް ގޮސްފައިވާކަމަށް ވިދާޅުވެފައެވެ. އޭނާ ވިދާޅުވީ ޢައްޒާގެ ރައްޔިތުން ބަނޑަށް ޖެހިފައިވާއިރު، އިސްރައީލްގެ ސިފައިން އެހީގެ ގޮތުގައި ޢައްޒާއަށް އެތެރެކުރުމަށް ހުއްދަދެނީ ސައިސަމުސަލެއްގެ މިންވަރުކަމަށެވެ.

އިސްރާއީލުން ފަސްލަސްތީނު ނަސްލު ނައްތާލުމަށް ދެމުންދާ ހަމަލާތަކުގައި މިހާތަނަށް ޢައްޒާއިން އެކަނިވެސް 53 ހާހަށްވުރެ ގިނަ މީހުންގެ ފުރާނަވަނީ ގެއްލުވާލާފައެވެ. ނަމަވެސް ފަލަސްތީނުގެ ސަރުކާރުން ބުނެފައިވަނީ އެއަދަދު 61 ހާހަށްވުރެ މަތިވާނޭކަމަށެވެ.