މާލެ އާއި ހުޅުލެ މޮނޯރެއިލްއިން ފުނަދޫ އާއި ގުޅާލުމަށް އިފްޒާ އާއި ހަވާލުކޮށްފި

މާލެ އާއި ހުޅުލެ މޮނޯރެއިލްއިން ކ.ފުނަދޫ އާއި ގުޅާލުމަށް ދުބާއީގެ އިންޓަނޭޝަނަލް ފްރީޒޯން އޮތޯރިޓީ (އިފްޒާ) އާއި ހަވާލުކޮށްފިއެވެ.

މިކަން ހާމަކޮށްފައިވަނީ އިގްތިޞާދާއި ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ވުޒާރާގެ ވަޒީރު މުހައްމަދު ސައީދުއެވެ.

މިގޮތުން ވަޒީރު ސައީދު ވިދާޅުވީ، ފުނަދޫ، މާލެ އަދި ހުޅުލެއާ ގުޅާލަނީ ސިންގަލް ޓްރެކް މޮނޯރެއިލްއަކުން ކަމަށާއި، އެ މަސައްކަތަށް ފައިނޭންސް ކުރުމަށްޓަކައި ބަޔަކާ އެކު މިހާރު ސޮއިކުރެވިފައިވާ ކަމަށެވެ.

"ފުނަދޫ މާލެ އާއި އަދި ހުޅުލެއާ މި ގުޅާލަނީ ސިންގަލް ޓްރެކް މޮނޯރެއިލްއަކުން. އެ މަސައްކަތަށް ފައިނޭންސް ކުރުމަށްޓަކައި ބަޔަކާ އެކު ވަނީ ސޮއިކުރެވިފައި,"

ވަޒީރު ސައީދު ވިދާޅުވިއެވެ.

އެ ރަށުގައި މިހާރު ހުރި ފިއުލް ފާމް ވެސް ބަދަލުކުރުމުގެ މަސައްކަތް މިހާރު ފަށާފައިވާ ކަމަށްވެސް ވަޒީރު ސައީދު ވަނީ ވިދާޅުވެފައެވެ.

މި ސަރުކާރުން ސްޕެޝަލް އިކޮނޮމިކް ޒޯން (އެސްއީޒެޑް) ގެ ގޮތުގައި ކަނޑައަޅާފައިވާ ސަރަހައްދުތައް ތަރައްގީކޮށް ހިންގުމަށް ވެސް ހަވާލުކުރި ދުބާއީގެ އިންޓަނޭޝަނަލް ފްރީޒޯން އޮތޯރިޓީ (އިފްޒާ) އާއި ހަވާލުކޮށްގެން ކުރިއަށްގެންދާ މި ޕްރޮޖެކްޓް 18 މަސް ދުވަހުގެ ތެރޭގައި ނިންމައި، އޭގެ ތެރޭގައި ފުނަދޫގެ އިމާރާތްތަކުގެ ކުރެހުންތަކާއި އެހެނިހެން މަސައްކަތްތައް ކުރިއަށްދާނެ ކަމަށް ވެސް ވަޒީރު ސައީދު ވަނީ ވިދާޅުވެފައެވެ.

މި ހުރިހާ މަސައްކަތަކަށް އިފްޒާއިން ފައިސާ ހަރަދު ކުރުމަށް ހަމަޖެހިފައިވާއިރު، އެސްއީޒެޑަކަށް ފުނަދޫ ހާއްސަ ކުރުމުގެ ގޮތުން މި ސަރުކާރުން އުފެއްދި މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީ އިން އެސްޓީއޯއާއެކު ވަނީ މަސައްކަތް ފަށާފައެވެ.