ޢައްޒާގެ ރައްޔިތުން ނަގާ ފޮޓޯތަކަށް އިޒްރާއީލް ސިފައިން ފާރަލަނީ

އިޒްރާއީލަށް މިހާރު އޮތް އެންމެ ބޮޑު ގޮންޖެހުމަކީ، އެޤައުމުގެ އަސްކަރިއްޔާއިން ޢައްޒާގައި ހިންގަމުންގެންދާ އިންސާނިއްޔަތާ ހިލާފް ޖަރީމާތައް ޢައްޒާގެ ތެރެއިން ލީކްްވާ މައްސަލައެވެ. ފަލަސްތީނު ނަސްލު ނައްތާލުމަށް ޢައްޒާގައި އިޒްރާއީލްގެ އަސްކަރިއްޔާއިން 2023 ވަަނަ އަހަރުގެ އޮކްޓޯބަރުމަހުގެ 27 ވަނަ ދުވަހުން ފެށިގެން މިއަދާހަމަޔަށް ހިންގަމުން އަންނަ އަސްކަރީ ހަރަކާތަކީ، ހަނގުރާމައެއް ނޫންކަމަށް އިޒްރާއީލާ އެމެރިކާ ފިޔަވައި ދުނިޔޭގެ ދެން ހުރިހާ ޤައުމުތަކުންވެސް ގަބޫލުކުރެއެވެ.

އިޒްރާއީލުން ޢައްޒާއަށް އެއްގަމާއި ވައިގެ މަގުން ދެމުންއަންނަ ހަމަލާތަކަށް ދެ އަހަރުވާން ކައިރިވެފައިވާއިރު، ކުރިން ވަރަށް ތަރުތީބު ސިޓީއެއްގެ ގޮތުގައި ފެނުނު އައްޒާސިޓީ މިހާރު ފެންނަނީ ކޮންކްރީޓް ޖަންގައްޔެއްގެ ގޮތުގައެވެ. ޢައްޒާ ސިޓީގައި ހަރަކާތްތެރިވަމުންދާ ބައިނަލްއަޤްވާމީ އިންސާނީ ހައްގުތަކަށް މަސައްކަތްކުރާ ފަރާތްތަކުގެ އިތުރުން، އެކުވެރި ދައުލަތްތަކުގެ ޔުނިސެފް ފަދަ ޖަމިއްޔާތަކުގެ އޮފިޝަލުން ވިދާޅުވަމުން ގެންދަވަނީ ޢައްޒާގައި އިންސާނީ ބޮޑު ކާރިސާއެއް ކުރިމަތިވެފައިވާކަމަށާއި، އިޒްރާއީލުން މިހާރު އެ ސިޓީގައި ކުރިއަށްގެންދަނީ ހަނގުރާމައެއް ނޫންކަމަށެވެ. އެގޮތުން މީގެކުރިން ދުނިޔޭގެ ތާރީހު ދެކެފައިވާ ނާޒީން ޔަހޫދީންނާ ދެކޮޅަށް ހިންގި އަމަލުތަކާއި، ބޮސްނިއާގައި 1995 ވަނަ އަހަރު ހިންގި ގަތުލު އާއްމާ އަޅާ ނުކިޔޭނޭކަމަށް އެފަރާތްތަކުން ބުނެއެވެ. އިޒްރާއީލުން އަންނަނީ، ޢައްޒާސިޓީގައި މީގެކުރިން ނުހިއްގާފަދަ ލާއިންސާނީ އަމަލުތަކެއް ހިންގަމުންނެވެ.

އިޒްރާއީލުން ޢައްޒާގެ ރައްޔިތުންނާ ދެކޮޅަށް ދޭ ހަމަލާތައް އެންމެބޮޑަށް އަމާޒުކުރަނީ އަންހެނުންނަށާއި ކުޑަކުދިންނަށެވެ. އަދި އިންސާނީ ކާރިސާއެއް މިވަގުތު ކުރިމަތިވެފައި އޮތް ޢައްޒާސިޓީގައި އެހީގެ މަސައްކަތްތަކުގައި ހަރަކާތްތެރިވާ ފަރާތްތަކަށެވެ. ބައިނަލްއަޤްވާމީ މުޖުތަމައުގެ ކަންބޮޑުވުމަކީ ޢައްޒާގައި އެހީގެ ތަކެތި ފޯރުކޮށްދިނުމަށް ކުރަމުންގެންދާ މަސައްކަތްތަކަށް އިޒްރާއީލް ސިފައިން ދަތިކުރަމުންދާ މައްސަލައެވެ. އިޒްރާއީލް ސިފައިން ވަނީ މިފަހުން ޢައްޒާއަށް އެއްވެސް ބަޔަކަށް ނުވަދެވޭނޭހެން މުޅި އެ ސިޓީ ހިސާރުކޮށްފައެވެ. ޢައްޒާ ހިސޯރުކޮށް އިޒްރާއީލް ސިފައިން ގެންދަނީ އެތަނުގައި ފަލަސްތީނު ރައްޔިތުންނާ ދެކޮޅަށް އެތައް އެތައް ޖަރީމާތަކެއް ހިންގަމުންނެވެ. އިޒްރާއީލް ސިފައިން ހިންގަމުްނގެންދާ ޖަރީމާތަކުގެ ތެރޭގައި ޑްރޯންފަދަ އާލާތްތައް ބޭނުންކޮށްގެން ކުޑަކުދިންނަށް ހަމަލާދިނުމާއި، ހާލަތާ ނުބައްދަލު ހަތިޔާރު އާއްމުންނާ ދެކޮޅަށް ބޭނުންކުރުމެވެ.

ޢައްޒާގައި ހިންގަމުންގެންދާ ޖަރީމާތަކުގެ މަންޒަރުތައް މިފަހަކަށް އައިސް ލީކްވަމުންދާ މައްސަލާގައި އިޒްރާއީލުން ވަނީ އެ ސިޓީގައި އުޅެމުންދާ ފަަލަސްތީނު ރައްޔިތުންނަށް ފާރަލާން ފަށާފައެވެ. އެގޮތުން ޢައްޒާގެ އެކި ސަރަހައްދުތަކުގައި ގާއިމްކޮށްފައިވާ ޗެކް ޕޮއިންޓްތަކުން ފަލަސްތީނު ރައްޔިތުންގެ ފޯނުތައް ބަލާ ޗެކްކުރުމަކީ އިޒްރާއީލް ސިފައިން އާދަވެގެން ކުރާ ކަމެކެވެ. މިފަހުން އަލްޖަޒީރާއިން ވަނީ އިސްރާއީލުން ކުރިއަށްގެންދިއަ އެފަދަ އޮޕަރޭޝަނެއްގައި ފަލަސްތީނުގެ ރައްޔިތަކަށް ހަދާލިގޮތުގެ ވާހަކަ އޭނާ މެދުވެރިކޮށް ގެނެސްދީފައެވެ.

ޢައްޒާގައި ދިރިއުޅެމުންދާ ފަލަސްތީނުގެ އިއްޒެއްދެއިން އަބޫ ރަބެއާ ނަމަކަށް ކިޔާ ޒުވާނާ، އިޒްރާއީލް ސިފައިން ހިފަހައްޓާފައިވަނީ ޗެކްޕޮއިންތަކުންނެވެ. އަބޫ ރަބެއާ ހިފެހެއްޓުމަށްފަހު އިޒްރާއީލް ސިފައިން ވަނީ އޭނާގެ ފޯނު ބަލައި ފާސްކޮށް، އިޒްރާއީލްގެ ސިފައިން އައްޒާގައި ހިންގަމުންދާ ޖަރީމާތަކުގެ މަންޒަރުތައް ހުރުމުން ހިފަހައްޓައި ސުވާލުކޮށް، އެ އެއްޗެހި ފޯނުގައި ގެންގުޅެނީ ކީއްވެގެންތޯ ސުވާލުކޮށްފައެވެ. އިޒްރާއީލް ސިފައިންގެ ސުވާލުތަކަށް ޖަވާބުދެމުން އޭނާ ބުނީ އެއީ ވަޓްއަޕްފަދަ އެޕްލިކޭޝަންތަކުގައި ހުންނަ ނިއުސް ގްރޫޕްތަކުން އަންނަ ހަބަރުތަކުގައި ހިމެނޭ ފޮޓޯއާ ވީޑިއޯ ކަމަށާއި، އެއިން ކުރާ އެހެން ބޭނުމެއް ނޯންނަކަމަށެވެ. އަބޫ ރަބެއާ އެހެންބުނި ނަމަވެސް އިޒްރާއީލް ސިފައިން ވަނީ އެމީހުންގެ ވެހިކަލަކަށް އޭނާ އަރުވައި އެކި ކަހަލަ އަނިޔާތައްކޮށްފައެވެ.

"ފޯނުގައި އެ ފޮޓޯތައް ހުރުމުން އިޒްރާއީލް ސިފައިން ވަނީ އަހަރެންނަށް ވަރަށް އަނިޔާކޮށްފައި. ގައިގެ އެތަންމިތަނުގައި ރައިފަލުން ތަލައި، ކަރަންޓް ޖައްސައި ޖިސްމާނީގޮތުން އެތައް އަނިޔާތަކެއްކުރި" އިޒްރާއީލް ސިފައިން ކޮށްފައިހުރި އަނިޔާތައް އަލްޖަޒީރާގެ ނޫސްވެރިންނަށް ދައްކާލަމުން އަބޫ ރަބެއާ ބުންޏެވެ.

އަބޫ ރަބެއާ ބުނީ އޭނާއާ އެއްކޮށް އެހެންމީހުންވެސް ހިފެހެއްޓިކަމަށާއި، ނަމަވެސް އެމީހުންގެ ފޯނުގައި އިޒްރާއީލް ސިފައިންގެ އަނިޔާވެރި ފޮޓޯތައް ނެތުމުން އެމީހުން ދޫކޮށްލީކަމަށެވެ. އަދި މިއީ މިހާރު އާދަވެގެން އިޒްރާއީލް ސިފައިން ކުރާކަމެއް ކަމަށާއި، ބޭނުމަކީ އައްޒާގެ ތެރެއިން ލީކްވާ އެފަދަ މަންޒަރުތައް ހުއްޓުވުންކަމަށްވެސް އަބޫ ރަބެއާ ބުންޏެވެ. އައްޒާއަށް ދެމުންދާ ހަމަލާތަކުގައި އިޒްރާއީލް ސިފައިން ވަނީ އެ ސިޓީގެ މުއާސަލާތީ ނިޒާމުވެސް މުޅިންހެން ފުނޑާލާފައެވެ. ބޭނުމަކީ ޢައްޒާސިޓީގައި އިޒްރާއީލް ސިފައިން ހިންގަމުންގެންދާ ހަނގުރާމައިގެ ޖަރީމާތައް ލީކްވުން ހުއްޓުވުމެވެ.