ބ.އަތޮޅުގެ ތަރައްޤީގައި ތުޅާދޫއަކީ ދެވަނައަށް އިސްކަންދޭނެ ރަށް: ރައީސް
ބ.އަތޮޅުގެ ތަރައްޤީގައި ތުޅާދޫއަކީ ދެވަނައަށް އިސްކަންދޭނެ ރަށްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ބ.އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ތުޅާދޫއަށް ވަޑައިގެން އެރަށުގެ ރައްޔިތުންނާ ވާހަކަދައްކަވަމުން ރައީސް ޑރ.މުއިއްޒު ވިދާޅުވީ ސަރުކާރުން ތަރައްޤީގެ ކަންކަން ކުރިއަށްގެންދިއުމުގައި ތުޅާދުއަކީ ބ.އަތޮޅުން ދެވަނައަށް އެންމެބޮޑު އިސްކަންދޭނެ ތަރައްޤީގެ އެއް ނާރެސް ކަމަށާއި، ސަރުކާރުން ވައުދުވެފައިވާގޮތަށް ތަރައްޤީގެ ކަންކަން އެރަށުގައި ކުރިއަށްގެންދަވާނެކަމަށެވެ.
ރައީސް ތުޅާދުއަށް ވަޑައިގެން މިއަދު ވަނީ އެރަށުގައި އެއާޕޯޓް އެޅުމަށް ބޭނުންވާ ބިން ހިއްކުމުގެ އެއްބަސްވުމުގައި ރަސްމީކޮށް ސޮއިކުރައްވާފައެވެ. މި މަޝްރޫޢުއާ ބެހޭގޮތުން ރައީސް ޑރ.މުއިއްޒު ވިދާޅުވީ ސަރުކާރުން މިހާރު ރާވާފައިވާގޮތުން މި މަޝްރޫޢު ދެން ކުރިއަށްގެންދާނީ ކުރިން ބަދަލުތަކާއެކު ކަމަށެވެ. އެގޮތުން ކުރިން ފަޅުތެރެއިން ވެލި ނަގައިގެން ބިންހިއްކަން އޮތްނަމަވެސް ތުޅާދޫގައި އެއާޕޯޓް އެޅުމަށް ބޭނުންވާ ބިން ހިއްކާނާނީ ފަޅުން ބޭރުން ވެލިނަގައިގެން ބިން ހިއްކާގޮތަށްކަމަށެވެ. ރައީސް ވިދާޅުވީ މި މަޝްރޫޢުއަށް ސަރުކާރުން ގެނައި މި ބަދަލާއެކު މަސައްކަތް އަވަސްވެގެންދާނޭކަމަށެވެ.
ތުޅާދޫ ރައްޔިތުންނާ ވާހަކަދައްކަވަމުން ރައީސް ވަނީ އެރަށުގެ އުމްރާނީ އަދި އެހެނިހެން ދައިރާތަކުގެ ތަރައްޤީއަށް ކުރަން ހުރި ކަންކަންވެސް ކުރިއަށްދާނޭކަން ފާހަގަކުރައްވާފައެވެ. އެގޮތުން ތުޅާދޫ ހޮސްޕިޓަލުގެ މަސައްކަތަކާއި ކުޅިވަރު ދަނޑުތަކުގެ މަސައްކަތް ރައީސް ފާހަގަކުރެއްވިއެވެ. ތުޅާދޫ ހޮސްޕިޓަލް ތަރައްޤީކުރާނީ ސްޕެޝަލިސްޓް ހިދުމަތާއި ޒަމާނީ ވަސީލަތްތަކާއެކުކަމަށް ރައީސް ވިދާޅުވިއެވެ.
މީގެ އިތުރުން ރަށުގެ މަގުތައް ހެދުމާއި ތުޅާދޫގައި އަލަށް 100 ހައުސިން ޔުނިޓް އެޅުމުގެ މަސައްކަތް ކުރިއަށްދާނޭކަމަށް ރައީސް ވަނީ މިއަދު ވިދާޅުވެފައެވެ. އަދި ތުޅާދޫގައި އެންމެ ފުރަތަމަ ހިއްކިބިމުން ދީފައިވާ ގޯތިތައް އަމިއްލަ ކޮށްދޭނެ އުސޫލެއް ހައްދަވައިދެއްވާނޭކަމަށާއި، އެކަން އެ ގެވަޅުތަކުގެ މީހުންނަށް ސަރުކާރުގެ ކަމާބެހޭ އިދާރާތަކާ ގުޅިގެން ކުރިއަށްގެންދެވޭނޭކަމަށް ރައީސް ވިދާޅުވިއެވެ. ރައީސުލްޖުމްހޫރިއްޔާ ތުޅާދޫއަށް މިއަދު ކުރެއްވި ޒިޔާރަތުގެ ތެރެއިން ވަނީ، އެރަށުގައި ގާއިމްކުރުމަށް ނިންމި ފުލުހުންގެ މަރުކަޒުގެ ބިންގާ އަޅާފައެވެ.
ތުޅާދޫއަކީ ބ.އަތޮޅުގެ ރަށްތަކުގެ ތެރެއިން އެންމެގިނައިން މީހުން ދިރިއުޅެމުން އަންނަ އެއް ރަށެވެ. ތުޅާދޫއަކީ އެރަށް ވަށައިގެން ރިސޯޓްތައް ހިމެނޭ ފަޅުބޮޑު ރަށެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
