މާފަރު އެސްއެމްޑީ ޖަމިއްޔާއިން ޢީދު ފާހަގަކުރުމަށް މަދަހަ މުބާރާތެއް ބާއްވަނީ؛ މުބާރާތުގެ އެއްވަނައަށް ބެޑްރޫމް ސެޓެއް!

ކުރިއަށް އޮތް ބަރަކާތްތެރި އަޟުޙާ ޢީދު ފާހަގަ ކުރުމަށް ނ. މާފަރުގައި މަދަހަ މުބާރާތެއް ބޭއްވުމަށް ނިންމައިފިއެވެ.

މާފަރުގެ ސޮސައިޓީ ފޯ މާފަރު ޑިވޮލަޕްމަންޓް، އެސްއެމްޑީގެ ފަރާތުން، ޖޫން މަހުގެ 18،19 އަދި 20 ވަނަ ދުވަހު ބާއްވާ މި މުބާރާތުގަައި ބައިވެރިވުމުގެ ފުރުސަތު ފައުންޑޭޝަން ސްޓޭޖް އިން ފެށިގެން ގުރޭޑް 10 އާއި ހަމައަށް ހުޅުވާލެވުފައިވާއިރު، 16 އަހަރާއި 35 އަހަރުގެ އުމުރުފުރާ އަދި 35 އަހަރުން މަތީގެ އުމުރުފުރާގެ ބޭފުޅުންނަށް މުބާރާތުގައި ބައިވެރިވުމުގެ ފުރުސަތު އޮތް ކަމަށް އެ ޖަމިއްޔާއިން “ވޮއިސް” އަށް މައުލޫމާތު ދީފައިވެއެވެ.

އަދި ބައިވެރިވާން ބޭނުންވާ ފަރާތްތަކަށް ޖޫން 12 ވަނަ ދުވަހުގެ ރޭގެ 11:59 އާއި ހަމައަށް އެ ފުރުސަތު ހުޅުވާލެވުފައިވާ ކަމަށާ ބައިވެރިވުމަށް، އެފަރާތެއްގެ ނަމާއި އުމުރު 9732390 އަށް އެސްއެމްއެސް ނޫނީ ވައިބާ ކޮށްލުމަށް އެ ޖަމިއްޔާއިން އެދެއެވެ. އަދި އެސްއެމްއެސް ކޮށްލުމުން މުބާރާތުގެ ގަވާއިދާއި އެހެނިހެން މައުލޫމާތު ފޯރުކޮށްދެވޭނެ ކަމަށް އެ ޖަމިއްޔާއިން ބުންޏެވެ.

ވަކި ވަކި މަދަހައިގެ އިތުރުން ގުރޫޕް މަދަހަ ހުށަހެޅުމުގެ ފުރުސަތުވެސް ހުޅުވާލެވިފައިވާ މި މުބާރާތުގެ ވަނަވަނަ އަށް އަންނަ ފަރާތްތަކަށް އަގުހުރި އިނާމްތައްވެސް ވަނީ ކަނޑައެޅިފައެވެ.

އެގޮތުން ކަނޑައެޅިފައިވާ އިނާމް ތަކަކީ؛

* މުޅި މުބާރާތުން 1 ވަނަ އަށްދާ ފަރާތަށް ބެޑްރޫމް ސެޓެއް

* މުޅި މުބާރާތުން 2 ވަނަ އަށްދާ ފަރާތަށް 50 އިންޗީގެ ޓީވީއެއް

* މުޅި މުބާރާތުން 3 ވަނަ އަށްދާ ފަރާތަށް ފްރޮންޓް ޑޯ އޮޓޮމެޓިކް ދޮންނަ މެޝިނެއް

* ގުރޫޕް މަދަހައިން 1 ވަނަ އަށް 1500 ރުފިޔާގެ ފައިސާގެ އިނާމް

* ގުރޫޕް މަދަހައިން 2 ވަނަ އަށް 1000 ރުފިޔާގެ ފައިސާގެ އިނާމް

* ގުރޫޕް މަދަހައިން 3 ވަނަ އަށް 700 ރުފިޔާގެ ފައިސާގެ އިނާމް

މީގެ އިތުރުން، ވަކިވަކި އުމުރު ފުރާއިން ވަނަވަނަ އަށް އަންނަ ފަރާތްތަކަށް ޓްރޮފީ ދިނުމަށްވެސް ހަމަޖެހިފައިވާ ކަމަށް އެސްއެމްޑީ ޖަމިއްޔާއިން މައުލޫމާތު ދެއެވެ.

މުބާރާތުގެ ފަނޑިޔާރުކަން ކުރައްވާނީ މާލެއިން ގެންނަ، މަދަހަ ކިޔުމާއި އެ ފަންނުގެ ތަޖުރިބާކާރުން ކަން އެ ޖަމިއްޔާއިން ފާހަގަކޮށްފައިވެއެވެ.

“މިއީ ޢީދުގައި އެންމެން ޝާމިލު ކޮށްގެން، ކުދި ބޮޑު އެންމެނަށްވެސް ބައިވެރިވެވޭނެ ގޮތަކަށް ޢީދު ފާހަގަކުރުމަށް އަޅުގަނޑުމެން ރާވާފައިވާ މުބާރާތެއް.  މި މުބާރާތަށް ވަރަށް ބޮޑު ތަރުހީބެއް މިހާރުވެސް ލިބެމުން އަންނަކަން ފާހަގަކޮށްލަން. އަޅުގަނޑުމެންގެ އެދުމަކީ ވޭހާވެސް ގިނަ ބަޔަކު މީގައި ބައިވެރިވުން.” މުބާރާތް އިންތިޒާމް ކުރާ އެސްއެމްޑީ ޖަމިއްޔާއިން ބުނެފައިވެއެވެ.

މާފަރުގެ މި މަދަހަ މުބާރާތަކީ “އެހީ” ޖަމިއްޔާ އާއި ރެޑް ބޮކްސް އިންޓަނޭޝަނަލް ގެ އެޙީއާއި ކުރިއަށް ގެންދާ މުބާރާތެކެވެ.