ގައުމީ އަންހެން ވޮލީ ޓީމުގެ ކުޅުންތެރިންނާއި ޖާޒީ ހަވާލުކޮށްފި
މަދަމާ ފެށުމަށް ހަމަޖެހުފައިވާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) އަންހެން ވޮލީބޯލް ޗެލެންޖް ކަޕް 2024 ގައި ވާދަކުރާ ދިވެހި ގައުމީ އަންހެން ޓީމާ އިއްޔެ ޖާޒީ ހަވާލުކޮށްފިއެވެ.
ސޯޝަލް ސެންޓަރުގައި ބުދަ ދުވަހުގެ ރޭ ބޭއްވި ޖާޒީ ހަވާލުކުރުމުގެ ރަސްމިއްޔާތުގައި ޓީމުގެ ކުޅުންތެރިންނާ ޖާޒީ ހަވާލުކޮށްދެއްވީ، ރާއްޖޭގެ ކުޅިވަރާ ބެހޭ ވަޒީރު އަބްދުﷲ ރާފިއުއެވެ. އިއްޔެގެ އިވެންޓްގައި ރާފިއު ވަނީ ޓީމަށް ހިތްވަރު ދެއްވައި، ރާއްޖެއަށް މުބާރާތުން މެޑަލްއެއް ހޯދައިދިނުމަށް މަސައްކަތް ކުރަން އެދިވަޑައިގެންފައެވެ. އޭގެ އިތުރުން ކާވާގެ ރައީސް އަދި ރާއްޖޭގެ ވޮލީބޯލް އެސޯސިއޭޝަންގެ ރައީސް މުހައްމަދު ލަތީފް ވެސް އިއްޔެގެ އިވެންޓްގައި ބައިވެރިވެލައްވާފައިވާ އިރު، އޭނާ ވަނީ ޓީމާ މެދު އިތުބާރު ބޮޑު ކަމަށް ވިދާޅުވެފައެވެ.
06 ސެޕްޓެންބަރު 2024 އިން 11 ސެޕްޓެންބަރު 2024 އަށް މާލެ ސިޓީ ސޯޝަލް ސެންޓަރުގައި ކުރިއަށްދާ މިމުބާރާތުގައި ރާއްޖޭގެ އިތުރުން ތަޖެކިސްތާން، ކިރިގިސްތާނުގެ އަދި އަފްގާނިސްތާން ވާދަކުރާނެއެވެ. އަދި މުބާރާތުގެ ފުރަތަމަ މެޗުގައި މާދަމާ ރޭ ރާއްޖެ ނުކުންނާނީ އަފްގާނިސްތާނާ ދެކޮޅަށެވެ.
ރާއްޖޭގެ ޓީމުން މުބާރާތަށް ތައްޔާރުވަމުންދާތާ ދުވަސްތަކެއްވެފައިވާ އިރު، އެންމެފަހުން ނޭޕާލްގައި ކުޅުނު ކާވާ ވިމެންސް ނޭޝަން ލީގުގައި ވެސް ވާދަކޮށް، ޓީމުން ވަނީ ރަނގަޅު ތަޖުރިބާއެއް ހޯދައިފައެވެ. އެ މުބާރާތުގައިވެސް ޓީމުގެ ހެޑް ކޯޗަކީ ސޮފްވާން އަހުމަދެވެ. މިފަހަރުވެސް ޓީމު ނުކުންނާނީ ސޮފްވާންގެ ކޯޗުކަމުގެ ދަށުގައެވެ. އެސިސްޓެންޓް ކޯޗުންނަކީ އަހުމަދު ދީދީއާއި އަހުމަދު އަދީލް (ބޭބެ) އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
