އުތުރުގެ އިގްތިސާދީ މައި ދޮރޯށި، ހަނިމާދޫ އިންޓަރނޭޝަނަލް އެއާޕޯޓް މިރޭ ހުޅުވަނީ

ރާއްޖޭގެ އުތުރުގެ އިގްތިސާދީ މައި ދޮރޯށީގެ ގޮތުގައި ސިފަކުރާ ހދ.ހަނިމާދޫ އިންޓަރނޭޝަނަލް އެއާޕޯޓް މިރޭ ހުޅުވުމަށް ތައްޔާރުވެއްޖެއެވެ.

ސަރުކާރުން ވަނީ ހަނިމާދޫ އެއާޕޯޓް މިރޭ ކުލަގަދަ ގޮތެއްގައި ހުޅުވުމަށް ނިންމާފައެވެ. ހަނިމާދޫ އެއާޕޯޓް ހުޅުވުން ޝަރަފްވެރިކޮށްދެއްވުމަށް  ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެ ރަށަށް ވަޑައިގަތުމަށް ހަމަޖެހިފައިވާއިރު، މައުލޫމާތު ލިބިފައިވާ ގޮތުގައި މި ރަސްމިއްޔާތުގައި އިންޑިއާ ސަރުކާރުންވެސް ހާއްސަ މަންދޫބަކު ބައިވެރިވާނެއެވެ.

އިންޑިއާގެ ބޮޑުވަޒީރުގެ ފަރާތްޕުޅުން މި ރަސްމިއްޔާތުގައި ބައިވެރިވެ ވަޑައިގަންނަވާނީ ސިވިލްއޭވިއޭޝަން މިނިސްޓަރުކަމަށް ދައުލަތުެގ މީޑިއާއިން ވަނީ ބުނެފައެވެ.

ހަނިމާދޫ އިންޓަރނޭޝަނަލް އެއާޕޯތް ތަރައްޤީކުރުމުގެ މަޝްރޫޢުގެ ދަށުން ވަނީ ރަންވޭ ބޮޑުކޮށް ޓާމިނަލްވެސް ޒަމާނީ ފެންވަރަށް ތަރައްޤީކޮށް ނިންމާފައެވެ.

ހަނިމާދޫ އިންޓަރނޭޝަނަލް އެއަރޕޯޓްގައި ފަހުން ތަރައްޤީ ކުރެވުނު ރަންވޭއަކީ ދުނިޔޭގައި ބޭނުންކުރާ އެންމެ ބޮޑެތި ބޯޓްފަހަރު ޖެއްސޭ ފެންވަރުގެ ރަންވޭއެކެވެ. ޖާގަ ތަނަވަސް މި އެއަރޕޯޓްގައި އޭ-320 އަދި ބޮއިންގް-737ގެ މަރުކާގެ ފްލައިޓްތަކަށް ހިދުމަތް ދެވޭނެއެވެ. މި އެއަރޕޯޓްގައި އެއްފަހަރާ 9 ފްލައިޓް ބޭއްވޭ ޖާގައިގެ އޭޕްރަންއެއް ވެސް ތަރައްޤީކޮށްފައިވެއެވެ. މި މަޝްރޫއު އަށް ޖުމުލަ 2 ބިލިއަން ރުފިޔާ (800 މިލިއަން ޑޮލަރު) ވަނީ ޚަރަދުވެފައެވެ.