ވިލުފުއްޓާއި އިތުރު ދެ އެއާޕޯޓެއްގެ ބިން ހިއްކަން ހަވާލުކޮށްފައި އޮތީ، އާއްމު އަގަށްވުރެ ބޮޑު އަގެއްގައި: މުއްޠަލިބު
ލިޔުންތެރިޔާ
ޚަދީޖާ އަރުފާ
ނިމިދިޔަ ރައީސް އިބްރާހީމް މުހައްމަދު ޞާލިހުގެ ސަރުކާރުގައި، ވިލުފުށްޓާއި އިތުރު ދެ ރަށެއްގައި އެއާޕޯޓް އަޅަން ހަވާލުކޮށްފައި އޮތީ، އާއްމު ގޮތެއްގައި އެއާޕޯޓް އަޅާ އަގަށްވުރެ ބޮޑު އަގެއްގައި ކަމަށް އިމާރާތް ކުރުމާއި ބިނާރާ ބެހޭ ވުޒާރާގެ ވަޒީރު އަބްދުالله މުއްޠަލިބު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި ވަޒީރާ ސުވާލު ކުރުމަށް ހުޅުވާލި ފުރުސަތުގައި ވިލުފުށީ ދާއިރާގެ މެންބަރު ހަސަން ވަހީދުވަނީ ދާއިރާ ރަށްތަކުގައި ކުރިއަށްދާ މަޝްރޫޢުތަކާއި ގުޅޭ ގޮތުން ސުވާލު ކުރައްވާފައެވެ.
އެގޮތުން، ބުރުނީގެ މަގުތަކުގެ މަސައްކަތް ނިމޭނެ އިރަކާއި، މަޑިފުށީގެ މަގުތަކުގެ މަސައްކަތް އަލުން ފެށޭނެ ތާރީޚެއްގެ އިތުރުން، ވިލުފުށީ އެއާޕޯޓްގެ މަސައްކަތް ފެށޭނެ ތާރީޚަކާއި ގުޅޭގޮތުން ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން ވަޒީރު މުއްޠަލިބު ވިދާޅުވީ، މިހާރު ނުފެށި ހުރި މަޝްރޫޢުތަށް ފެށުމަށް ދައުލަތުގެ ބަޖެޓްގައި ހުރި މިންވަރު ބަލައި، މަޝްރޫއުތައް ތަރުތީބު ކުރުމުގެ މަސައްކަތް ކުރައްވަމުންދާ ކަމަަށެވެ. އަދި އެކަން ކުރެވުމުން މަސައްކަތް ފެށޭނެ ތާރީޚް އެނގިގެންދާނެ ކަމަށެވެ.
ވިލުފުށީ އެއާޕޯޓާއި އެހެން ދެ އެއާޕޯޓެއްގެ ބިން ހިއްކުމުގެ މަސައްކަތް ބަޔަކާއި ހަވާލު ކުރެވި، ބަންޑު އެޅުމުގެ މަސައްކަތް ކުރެވިފައި އޮތީ. އެހެން ނަމަވެސް އެބޭފުޅުންނަށްވެސް އެޑްވާންސް ޕޭމަންޓެއް ދީފައެއް ނެތް. އަޅުގަނޑުމެން ބެލި އިރު، ބިން ހިއްކަން ހަވާލު ކޮށްފައި އޮތީ، ބިންތައް ހިމާޔަތްކުރުމުގެ ޝޯ ޕްރޮޓެކްޝަން އެއްވެސް ބައެއް ނުހިމަނައި. އެހެންވީމާ މިހާރު ބިން ހިއްކުން ކުރިއަށް ގެންގޮސްފިނަމަ ވެލިގަނޑު ގިރާލާ މައްސަލަ ކުރިމަތިވެދާނެ. ބަޖެޓްގައި ނެތް ފައިސާއަކުން ޝޯޕްރޮޓެކްޝަން ވަކިން ހަވާލުކުރަން އުނދަގޫވާނެ.
ވަޒީރު އަބްދުالله މުއްޠަލިބު
މިއާއެކު ވަޒީރު ވަނީ އެ ތިން އެއާޕޯޓްގެ މަސައްކަތް ހަވާލުކޮށްފައި އޮތީ އާއްމު އުސޫލުން ބިން ހިއްކަން ހަވާލުކުރާ ވަރަށްވުރެ އަގު ބޮޑުކޮށް ކަމަށެވެ.
ފާހަގަކުރެވުނު، އާއްމު އުސޫލުން ބިން ހިއްކަން ހަވާލުކުރާވަރަށްވުރެ އަގު ބޮޑުކޮށް ބިން ހިއްކަން ހަވާލުކޮށްފައި އޮތް ކަމަށް. ގާތްގަނޑަކަށް ތިން ރަށެއްގެ އެއާޕޯޓް ހިއްކުމަށް 43 މިލިއަން ޑޮލަރަށް ބަޔަކާ ހަވާލު ކުރެވުފައި އޮތީ
ވަޒީރު އަބްދުالله މުއްޠަލިބު
މިއާއެކު ވަޒީރު ވިދާޅުވީ އެ އެއާޕޯޓް ތަކުގެ މަސައްކަތް ކުރިއަށް ގެންދޮޔުމަށް ކޮންޓްރެކްޓަރާއި ވާހަކަ ދައްކަވަމުންދާ ކަމަށެވެ. އެކަން ކޮންޓްރެކްޓަރަށް ކުރިއަށް ނުގެންދެވޭ ނަމަ، މަސައްކަތް ކުރިއަށް ގެންދެވޭނެ އެހެން ގޮތްވެސް ހުރި ކަމަށެވެ. ނަމަވެސް މިހާރު މަސައްކަތް ކުރަމުންދަނީ ހެދިފައި އޮތް ކޮންޓްރެކްޓާއި އެއްގޮތަށް މަސައްކަތް ކުރިއަށް ގެންދިޔުމަށް ކަމަށް ވަޒީރު ވިދާޅުވިއެވެ.
ަ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
