އެކި ގައުމުތަކުން އިސްރާއީލާއެކު ބާއްވަމުންދާ ގުޅުންތައް ކަނޑާލުމަށް އދ. ގެ ރެޕަޓުއަރ ގޮވާލައްވައިފި

ފަލަސްތީނުގެ ޣައްޒާގައި އިސްރާއީލުން ހިންގަމުންދާ ލޭއޮހޮރުވުންތައް ހުއްޓުވައި، ފަލަސްތީނުގެ ރައްޔިތުން ސަލާމަތްކުރުމަށްޓަކައި ބައިނަލްއަގުވާމީ ފެންވަރުގައި "ބޮޑެތި ފިޔަވަޅުތަކެއް" އަޅަންޖެހޭ ކަމަށް އދ. އިން ފަލަސްތީނުގެ މައްސަލަތަކަށް ކަނޑައަޅާފައި ހުންނަވާ ޚާއްޞަ ރެޕަޓުއަރ ފްރަންޗެސްކާ އަލްބަނީޒް ވިދާޅުވެއްޖެއެވެ.

އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި އަލްބަނީޒް ވަނީ، އިސްރާއީލުން ހަނގުރާމައިގެ ކުށްތައް ހިންގަމުންދާއިރުވެސް، ބައެއް ގައުމުތަކުން އެ ގައުމާއެކު ގުޅުން ބާއްވަމުންދާތީ އެކަމާ ސުވާލު އުފައްދަވާފައެވެ. އޭނާ ވިދާޅުވި ގޮތުގައި، ހަނގުރާމައިގެ ކުށްތައް ހިންގާ ދައުލަތަކަށް ހަތިޔާރު ފޯރުކޮށްނުދިނުމަކީ ބައިނަލްއަގުވާމީ ގޮތުން ގައުމުތަކަށް ލާޒިމުކަމެކެވެ. އިސްރާއީލު ހުއްޓުވުމަށް އޮތް އެންމެ ސުލްހަވެރި މަގަކީ އެ ގައުމާއެކު އޮންނަ އިގްތިސާދީ، އަސްކަރީ އަދި މާލީ ހުރިހާ ގުޅުމެއް ކަނޑާލުން ކަމަށް އޭނާ ފާހަގަކުރެއްވިއެވެ.

އަލްބަނީޒް ވިދާޅުވި ގޮތުގައި، ޣައްޒާގައި ހިނގަމުންދާ ކަންކަމަކީ ފަލަސްތީނުގެ ނަސްލު ނައްތާލުމަށް ފަށާފައިވާ އާ މަރުހަލާއެއްގެ ފެށުމެވެ. އަދި މިކަމުގެ އަސަރު ލުބުނާނާއި އީރާނަށްވެސް ފޯރަމުންދާކަން އޭނާ ފާހަގަކުރެއްވިއެވެ. ގަތުލުއާއްމު ހުއްޓާލާފައި އޮތް ނަމަވެސް، ޣައްޒާގެ ހާލަތު ދަނީ އިތުރަށް ގޯސްވަމުންނެވެ. އެގޮތުން ގަތުލައާއްމު ހުއްޓާލި ފަހުންވެސް އިސްރާއީލުން 650 ފަލަސްތީނު މީހުން ޝަހީދުކޮށްލާފައިވާ ކަމަށް އޭނާ ވިދާޅުވިއެވެ.

ޖެނީވާގައި ބޭއްވި އިންސާނީ ހައްގުތަކާބެހޭ މަޖިލީހަށް ހުށަހެޅި ރިޕޯޓުގައި، އިސްރާއީލުގެ ބަންދުގައި ތިބި ޣައްޒާގެ މުސްލިމުންނަށް ކުރާ އަނިޔާތަކުގެ ތަފުސީލުތައް ވަނީ ހިމަނާފައެވެ. މީގެ ތެރޭގައި ވަރަށް ބޮޑަށް ތަޅައި އަނިޔާކުރުމާއި، ގަސްދުގައި ކަށިތައް ބިންދާލުމާއި، ނިދިޔަ ނުދީ ބޭތިއްބުމާއި، ޖިންސީ ފުރައްސާރައާއި ރޭޕް ފަދަ ލާއިންސާނީ އަމަލުތައް ހިމެނެއެވެ.

އަލްބަނީޒްގެ ރިޕޯޓަށް އިސްރާއީލުން ފާޑުކިޔާފައިވީ ނަމަވެސް، އޭނާ ވިދާޅުވީ އިސްރާއީލުން ކުރާ ކަންކަމަށް އެމީހުން ޒިންމާދާރުކުރުވަން ޖެހޭ ކަމަށާއި، އެ މީހުންގެ ވެރިން ތިބެންޖެހޭނީ ބައިނަލްއަގުވާމީ ޖިނާއީ ކޯޓުގައި ކަމަށެވެ.

މި ރިޕޯޓުގައިވާ ގޮތުން، 2023 އޮކްޓޫބަރުން ފެށިގެން 2026 ޖެނުއަރީއާ ހަމައަށް އިސްރާއީލުން ވަނީ 18,500 އަށްވުރެ ގިނަ ފަލަސްތީނު މީހުން ހައްޔަރުކޮށްފައެވެ. މީގެ ތެރެއިން 100 އެއްހާ މީހުން ބަންދުގައި ތިއްބާ މަރުވެފައިވާއިރު، 4,000 މީހުންނަށް ވީނުވީއެއް ނޭނގި ގެއްލިފައިވާ ކަމަށް ރިޕޯޓުގައި ބަޔާންކޮށްފައިވެއެވެ.