ކޮރަޕްޝަން ހުއްޓުވުމަށް އެމް.އެން.ޔޫ އާއި އޭސީސީ ދެމެދު ފަހުމުނާމާއެއްގައި ސޮއިކޮށްފި

ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އާއި އެންޓި-ކޮރަޕްޝަން ކޮމިޝަން (އޭސީސީ) އާ ދެމެދު، ދެ މުއައްސަސާގެ މަސްއޫލިއްޔަތުތައް އަދާކުރުމުގައި އެއް ފަރާތުން އަނެއް ފަރާތަށް އެހީތެރިކަން ފޯރުކޮށްދިނުމަށާއި ގުޅިގެން މަސައްކަތްކުރާނެ ދާއިރާތައް ކަނޑައެޅުމަށްޓަކައި ފަހުމުނާމާއެއްގައި ސޮއިކޮށްފިއެވެ.

މި ފަހުމުނާމާގައި ސޮއިކުރުމުގެ ރަސްމިއްޔާތު ބާއްވާފައިވަނީ އިއްޔެ އެމް.އެން.ޔޫގެ މަރުކަޒީ އިދާރާގައެވެ.

މި އެއްބަސްވުމުގެ ދަށުން ކޮރަޕްޝަން ވިޔަނުދިނުމަށްޓަކައި ޔުނިވަރސިޓީގެ ފަރާތުން ކުރެވޭނެ މަސައްކަތްތައް ދެނެގަނެ، އެކަމަށް ބޭނުންވާ ފަންނީ އެހީތެރިކަން ފޯރުކޮށްދިނުމަށް ވަނީ ހަމަޖެހިފައެވެ. އަދި ކޮރަޕްޝަން ހުއްޓުވުމަށްޓަކައި އޭސީސީ އިން ދޭ ލަފަޔާއި އިރުޝާދުތައް ޔުނިވަރސިޓީގެ ނިޒާމުގެ ތެރޭގައި ތަންފީޒުކުރުމުގައި ދެ މުއައްސަސާ ގުޅިގެން މަސައްކަތްކުރުމަށް ވަނީ އެއްބަސްވެފައެވެ.

މީގެ އިތުރުން، ދެ ފަރާތުގެ ދެމެދުގައި ފަންނީ އެހީތެރިކަން ބަދަލުކުރުމުގައި ދިމާވާ ކަންކަމުގައި ހަރުދަނާ ފީޑްބެކް ނިޒާމެއް ޤާއިމްކޮށް، މަސައްކަތްތައް ކުރިއަށްދާ ގޮތް ގަވާއިދުން މުރާޖަޢާ ކުރެވޭނެ އިންތިޒާމު މި ފަހުމުނާމާގެ ދަށުން ހަމަޖެހިގެންދާނެއެވެ. އަދި މި މަސައްކަތްތަކާ ގުޅޭ މަޢުލޫމާތު މީޑިއާއަށާއި އާންމުންނަށް ހިއްސާކުރުމުގައި އަމަލުކުރާނެ ގޮތްތަކެއްވެސް ވަނީ ކަނޑައަޅާފައެވެ.

ދިވެހިރާއްޖޭގެ ޤައުމީ ޔުނިވަރސިޓީން ގަބޫލުކުރާ ގޮތުގައި، މިފަދަ ގުޅުމެއްގެ ސަބަބުން ޔުނިވަރސިޓީގެ ދަރިވަރުންނާއި މުވައްޒަފުންގެ މެދުގައި ނަޒާހަތްތެރިކަމުގެ ސިފަ އަށަގަންވައި، ދައުލަތުގެ މުއައްސަސާތަކަކީ ކޮރަޕްޝަނުން ސަލާމަތްވެފައިވާ ތަންތަނަށް ހެދުމަށް ސަރުކާރުން ކުރާ މަސައްކަތަށް އިތުރު ބާރެއް ލިބިގެންދާނެއެވެ.