ވޯޓެއް ނެތި އަދާލަތަށް ވެސް ދެ ގޮނޑި ކަށަވަރު ވެެއްޖެ

ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިހާބުގައި ރ. ކިނަޅޮހު ކައުންސިލަށް އިންތިހާބު ކުރާ 6 ގޮނޑިއަކަަށް އަދާލަތު ޕާޓީން ކުރިމަތިލީ ދެ ކެންޑިޑޭޓަކު ވޯޓެއް ނެތި ހޮވިއްޖެ އެވެ.

އަންނަ އޭޕްރީލް މަހު އޮންނަ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިހާބުގައި ވާދަކުރަން ބޭނުންވާ ކެންޑިޑޭޓުންނަށް ހުޅުވާލި ފުރުސަތު ވަނީ ހަމަވެފަ އެވެ. އިންތިހާބުގައި 2،993 ކެންޑިޑޭޓުން ވާދަ ކުރާނެ އެވެ.

ނަމަވެސް އިންތިހާބު ކުރަން ޖެހޭ އަދަދަށް ކުރިމަތިލުމުގެ ސަބަބުން އިންތިހާބުގެ ކުރީން ވޯޓެއް ނެތި ބައެއް ކެންޑިޑޭޓުންނަށް ވަނީ ގޮނޑި ކަށަވަރު ވެފަ އެވެ.

އެގޮތުން ކިނޮޅަހު ކައުންސިލަށް އިންތިހާބު ކުރަން ޖެހޭ މެންބަރު ކަމަށް ކުރިމަތިލީ ހަސަން ޝުއައިބެވެ. އޭނާ ކުރިމަތިލީ އަދާލަތު ޕާޓީގެ ޓިކެޓްގަ އެވެ. އިތުރު މީހަކު އެ ގޮނޑިއަށް ކުރިމަަތި ނުލާތީ އިންތިހާބެއް ނެތި ޝުއައިބަށް ވަނީ ގޮނޑި ކަށަވަރު ވެފަ އެވެ.

އެ ރަށުގެ އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ ރައީސަކަށް ވެސް ކުރިމަތިލީ އެންމެ ކެންޑިޑޭޓެކެވެ. އެއީ އަދާލަތު ޕާޓީގެ ޓިކެޓްގައި ކުރިމަތިލީ އާއިޝަތު ޖަވާދާ އެވެ. އޭނާއަށް ވެސް ވަނީ ގޮނޑި ކަށަވަރު ވެފަ އެވެ.

ކިނަޅޮހަކީ އަދާލަތުގެ ތާއީދު ވަރަށް ބޮޑު ރަށެކެވެ. އެ ރަށުގެ ކައުންސިލްގައި ކުރީން ވެސް އޮތީ އަދާލަތުގެ މެޖޯރިޓީ އެވެ. އަދާލަތަށް ތާއީދު ބޮޑު ދެތީން ރަށުގެ ތެރޭގައި ކިނަޅޮސް ފާހަގަ ކުރެވެ އެވެ.