ޙައްޖާއި އުމްރާގެ ޚިދުމަތްތައް ހަރުދަނާކުރުމަށް އިސްލާމިކް މިނިސްޓްރީއާއި އައިލެންޑް އޭވިއޭޝަނާ ދެމެދު އެއްބަސްވުމެއް

ޙައްޖާއި އުމްރާގެ ކަންކަމުގެ އިތުރުން އެ ދާއިރާއާ ގުޅުންހުރި އެހެނިހެން ގުޅުންތައް ބަދަހިކުރުމަށްޓަކައި، މިނިސްޓްރީ އޮފް އިސްލާމިކް އެފެއާޒް އަދި އައިލެންޑް އޭވިއޭޝަން ސަރވިސަސް ލިމިޓެޑާ ދެމެދު އިއްޔެ އެއްބަސްވުމެއްގައި ސޮއިކޮށްފިއެވެ.

އިއްޔެ ބޭއްވުނު ޚާއްޞަ ރަސްމިއްޔާތެއްގައި މި އެއްބަސްވުމުގައި ވުޒާރާގެ ފަރާތުން ސޮއިކުރެއްވީ ވަޒީރު ޑރ. މުޙައްމަދު ޝަހީމް ޢަލީ ސަޢީދެވެ. އައިލެންޑް އޭވިއޭޝަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު އިބްރާހީމް އިޔާސެވެ.

މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ޑރ. މުޙައްމަދު ޝަހީމް ޢަލީ ސަޢީދު ވަނީ ދިވެހި ޙައްޖުވެރިންނަށް ޚިދުމަތް ދިނުމުގައި އައިލެންޑް އޭވިއޭޝަނުން ކުރަމުންދާ މަސައްކަތްތައް ފާހަގަކުރައްވައި އެކަމަށް ޝުކުރު އަދާކުރައްވާފައެވެ.

އަދި އާންމުންނަށް ދެވޭ ދީނީ ޚިދުމަތްތަކާއި ވަސީލަތްތައް އިތުރަށް ހަރުދަނާކުރުމަށްޓަކައި، މިފަދަ ގުޅުންތައް ބަދަހިކުރުމަށް ވުޒާރާއިން އަބަދުވެސް މަސައްކަތްކުރާނެ ކަމުގެ ޔަގީންކަން ވެސް ވަޒީރު ދެއްވިއެވެ. އަދި އައިލެންޑް އޭވިއޭޝަނުން ވިދާޅުވީ، ޤައުމީ އެއަރލައިންގެ ހައިސިއްޔަތުން ދިވެހި ޙައްޖުވެރިންނަށް އެންމެ ފުރިހަމަ ޚިދުމަތް ދިނުމަކީ އެ ކުންފުނީގެ އިސް އަމާޒެއް ކަމަށެވެ.

މި އެއްބަސްވުމުގެ މައިގަނޑު މަޤްޞަދަކީ ދިވެހި ޙައްޖުވެރިންނާއި އުމްރާވެރިންނަށް ފަސޭހަ، އިތުބާރު ހިފޭ އަދި ފެންވަރު ރަނގަޅު ވައިގެ ދަތުރުފަތުރުގެ ޚިދުމަތްތައް ކަށަވަރުކޮށްދިނުމެވެ. މީގެ ތެރޭގައި މާލެއާއި ޖިއްދާއާ ދެމެދު ކުރާ ދަތުރުތައް އިތުރުކުރުމާއި، ޚިދުމަތުގެ ފެންވަރު މަތިކުރުމުގެ އިތުރުން ދަތުރުފަތުރުގެ އިންތިޒާމުތައް މިހާރަށްވުރެ ހަރުދަނާކުރުން ވެސް ހިމެނެއެވެ.

މީގެ އިތުރުން، އައިލެންޑް އޭވިއޭޝަންގެ މުވައްޒަފުންނަށް ދީނީ ތަމްރީނުތައް ދިނުމާއި، ވުޒާރާގެ ފަރާތުން އިންތިޒާމުކުރާ ޙައްޖާއި އުމްރާއާ ގުޅޭ ކޮންފަރެންސްތަކާއި ހޭލުންތެރިކުރުވުމުގެ ޕްރޮގްރާމްތަކުގައި އެ ކުންފުނީގެ ބައިވެރިވުން އިތުރުކުރުމަށްވެސް މި އެއްބަސްވުމުގައި ވަނީ ކަނޑައަޅާފައެވެ.

މި އެއްބަސްވުމުގެ ސަބަބުން ކުރިއަށް އޮތް ޙައްޖު މޫސުމުގައި ރައްޔިތުންނަށް ބޮޑެތި ލުއިފަސޭހަތަކެއް ލިބިގެންދާނެ ކަމަށް ސަރުކާރުން ހާމަކުރެއެވެ.