އެއްބަސްވުމަށްފަހުވެސް ޣައްޒާއަށް ހަމަލާދީފާނެކަމުގެ އިންޒާރު ނަތަންޔާހޫ ދީފި

ޣައްޒާގައި ޔަހޫދީ ފައުޖުން ހިންގަމުންދާ ގަތުލުއާއްމު ހުއްޓާލުމަށް އެއްބަސްވުމަށްފަހުވެސް ޣައްޒާއަށް އަލުން ހަމަލާދީފާނެކަމުގެ އިންޒާރު، އިސްރާއީލުގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫ ދީފިއެވެ.

ޓީވީއަށް ދިން ބަސްދީގަތުމެއްގައި ނަތަންޔާހޫ ބުނީ، އިސްރާއީލުން މި ގަތުލުއާއްމު އަލުން ފަށަން ތައްޔާރަށް އޮތްކަމަށާއި، މި އެއްބަސްވުމަކީ ވަގުތީ އެއްޗަކަށްވާއިރު، މިކަމަށްޓަކައި އެމެރިކާގެ އިންތިޚާބީ ރައީސް، ޑޮނަލްޑް ޓްރަމްޕްގެ ވެސް ފުރިހަމަ ތާއީދު އެބަ އޮތްކަމަށެވެ.

މިގަތުލު އާއްމުގެ ތެރެއިން ހަމާސްގެ ލީޑަރު ޔަހްޔާ ސިންވާރު އަހަވާރަކޮށްލިކަން ފާހަގަކޮށް އަނިޔާވެރިކަން ހައްދުފަހަނައަޅާފައިވާ ނަތަންޔާހޫ ވަނީ މެދުއިރުމަތި އެއްކޮށް ބަދަލުކޮށް ހަމާސް އެކަހެރިކޮށްލާފައިވާކަމަށް ބުނެފައެވެ.

މި ބަސްދީގަތުމުގެ ކުރިން ނަތަންޔާހޫ ވަނީ ހަމާސްގެ ބެލުމުގެ ދަށުގައި ތިބި ޔަހޫދީންގެ ތެރެއިން ދޫކޮށްލާ މީހުންގެ ލިސްޓެއް ނުލިބޭހާ ހިނދަކު މި އެއްބަސްވުން ގާއިމު ނުކުރާނެކަމަށް ބުނެފައެވެ. ނަތަންޔާހޫ މިހެން ބުނިއިރު، ހަމާސުން ވަނީ އެޖަމާއަތުން ދޫކޮށްލާނެ 33 މީހެއް އެކުލެވޭ ލިސްޓެއް އާއްމުކޮށްފައެވެ.

ޣައްޒާ ގަތުލުއާއްމު ހުއްޓާލުމުގެ އެއްބަސްވުން މިއަދު ގާއިމު ކުރުމަށް ހަމަޖެހިފައިވާއިރު، މިއަދާއި ހަމައަށްވެސް ޔަހޫދީ ފައުޖުން އަންނަނީ ޣައްޒާއަށް ނިރުބަވެރި ހަމަލާތައް މެދުނުކެނޑި ދެމުންނެވެ. މި ހަމަލާތަކުގައި މިހާތަނަށް 120 އަށް ވުރެ ގިނަ މީހުން ވަނީ ޝަހީދުވެފައެވެ.