އިސްލާމީ ބޮޑު ތިން ގައުމުން ދިފާއީ އެއްބަސްވުމެއް ގާއިމުކޮށްފި

ސައުދީ އަރަބިއްޔާ، ތުރުކީ އަދި ޕާކިސްތާނުން ދިފާއީ އެއްބަސްވުމެއްގައި ސޮއިކޮށްފި އެވެ.

މިއަދު އޮތް ހާއްސަ ރަސްމިއްޔާތެއްގައި މި އެއްބަސްވުމުގައި ސޮއިކުރެއްވީ ސައުދީގެ ވަލީއަހުދު މުޙައްމަދު ބިން ސަލްމާނާއި ތުރުކީގެ ރައީސް ރަޖަބް ޠައްޔިބު އުރުދުޣާން އަދި ޕާކިސްތާނުގެ ބޮޑުވަޒީރު ޝެހްބާޒް ޝަރީފް އެވެ.

ރިޕޯޓްތައް ބުނާ ގޮތުގައި "މައްކާ ޖޮއިންޓް ޑިފެންސް އެގްރީމެންޓް" ނަމުގައި ގާއިމުކުރި މި އެއްބަސްވުމާއެކު މިއިން އެއްވެސް ގައުމަކަށް އަސްކަރީ ހަމަލާއެއް ދީފިނަމަ ތިން ގައުމު އެކުގައި މަސައްކަތްކޮށް ދިފާއުވާނެ އެވެ. އެއްބަސްވުން އެކުލަވާލުމާއެކު މިއިން ގައުމަކަށް އެއްވެސް ގައުމަކުން ހަމަލާއެއް ދީފިނަމަ އެއީ އެ ގައުމުތަކަށް ދިން ހަމަލާއެއްގެ ގޮތުގައި ތިން ގައުމުންވެސް ދެކޭނެ އެވެ. އަދި އެކަމަކާ ދެކޮޅަށް ތިން ގައުމު ގުޅިގެން މަސައްކަތް ކުރާނެ އެވެ.

މިއީ މިހާރު ކުރިއަށްދާ އެމެރިކާ-އިރާން ހަނގުރާމައިގެތެރޭގައި އެކުލަވާލެވުނު މުހިންމު އެއްބަސްވުމެއްގެ ގޮތުގައި މި ތިން ގައުމުން ވެސް ދެކެ އެވެ.

ޕާކިސްތާނަކީ ނިއުކުލިއާ ބާރު އޮތް ހަމައެކަނި އިސްލާމީ ގައުމެވެ. ސައުދީ އަކީ ތެލުގެ މުއްސަދިކަން އޮތް އަދި އިސްލާމީ ދުނިޔޭގައި އެންމެ ނަން ހިންގާ ގައުމެވެ. ޔޫރަޕާއި އެމެރިކާއާ ވެސް ގުޅުން ރަނގަޅު ދުނިޔޭގައި އެންމެ ނުފޫޒުގަދަ އެއް ގައުމެވެ. ތުރުކީ އަކީ ނޯޓޭގެ ބައިވެރިއެކެވެ. އެއީ ނޭޓޯގެ ގައުމުތަކުގެ ތެރެއިން އަސްކަރީ ގޮތުން ދެވަނަ އަށް އެންމެ ވަރުގަަދަ އަސްކަރިއްޔާ އޮތް ގައުމެވެ.

ރިޕޯޓްތައް ބުނާ ގޮތުން މިއަދުގެ އެއްބަސްވުމާއި ހަމައަށް އާދެވުނީ ވޭތުވެދިޔަ އަހަރެއްހާ ދުވަހު ތިން ގައުމުގެ މެދުގައި ކުރެވުނު މަޝްވަރާތަކުގެ ނަތީޖާއެއްގެ ގޮތުންނެވެ.