މަތީ ތަޢުލީމް ހާސިލް ކުރުމަށް ބޭނުންވާ ފަރާތްތަކަށް ލޯނަށް އެދުމުގެ ފުރުޞަތު ހުޅުވާލައިފި

ރާއްޖެއާއި ރާއްޖެއިން ބޭރުން މަތީ ތަޢުލީމް ހާސިލް ކުރުމަށް ބޭނުންވާ ފަރާތްތަކަށް ލޯނަށް އެދުމުގެ ފުރުޞަތު މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ހުޅުވާލައިފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ހުޅުވާލައްވާ ފުރަތަމަ ސްޓޫޑެންޓް ލޯނު ސްކީމް ގެ ދަށުން 500 ފުރުޞަތު ވަނީ ހުޅުވާލާފައެވެ. މި ލޯނަށް އެދުމުގެ ފުރުޞަތު އަންނަ އޭޕްރީލް މަހުގެ 25 ވަނަ ދުވަހުގެ ނިޔަލަށް ވަނީ ހުޅުވާލާފައިވާއިރު، އަންނަމަހުގެ 22 ވަނަ ދުވަހުގެ ކުރިން ހުށައަޅާ އެޕްލިކޭޝަންތައް ޗެކްކުރުމަށްފަހު ރަނގަޅުކޮށް އަލުން ހުށައެޅުމުގެ ފުރުޞަތު މަތީ ތައުލީމާއި ބެހޭ ވުޒާރާއިން ދޭނެއެވެ.

މިކަމާއި ގުޅިގެން ވަޒީރު ޑރ.މަރިޔަމް މާރިޔާ ވިދާޅުވީ މިލޯން ސްކީމްގެ ދަށުން ޑިޕްލޮމާއިން ފެށިގެން ޕީއެޗްޑީއާ ހަމައަށް ކިޔެވުމުގެ ފުރުސަތު ލިބޭނެ ކަމަށާއި، އެ ކުއްޖަކު ބޭނުން ޤައުމަކަށް ކިޔަވަންދެވޭނެ ކަމަށެވެ. އަދި ލޯނު ނަގައިގެން ކިޔެވުމުގެ ފުރުޞަތު ދެނީ ރާއްޖެއަށް އެންމެ ބޭނުންވާ ދާއިރާތަކަށް ޚާއްސަކޮށްގެންކަމަށް ވެސް ވަޒީރު ވިދާޅުވިއެވެ.

" މި ފަސް އަހަރަށް ބަހާލައިގެން މީހުން ބިނާ ކުރުމުގެ ވަރަށް ފުޅާ ޕްރޮގްރާމްތަކެއް ކުރިއަށް ގެންދިޔުމަށް ސަރުކާރުން ނިންމަވާފައިވޭ. ސަރުކާރުގެ ސިޔާސަތުގެ ދަށުން އިޤްތިޞާދު އާރޯ ކުރެވޭ ޚާއްސަ ދާއިރާތަކުން މީހުން ބިނާ ކުރުމަށް އިސްކަންދޭނެ. ދިވެހިން މަދު ފަންނީ ދާއިރާތަކުން ތަމްރީން ދިނުމަށް ފުރުޞަތުތައް ދިނުމަށް ނިންމާފައިވާނެ"

ވަޒީރު ޑރ.މާރިޔާ ވިދާޅުވިއެވެ.

މި ލޯން ސްކީމް އެކުލަވާލާފައިވަނީ ނުކުޅެދުންތެރިކަން ހުންނަ ކުދިންނަށް ވެސް ހާއްސަ ކުރެވިފައިވާ ފުރުސަތުތަކެއް ވެސް ހިމެނޭނެ ގޮތަށެވެ. މިގޮތުން ވަޒީރު ޑރ.މާރިޔާ ވިދާޅުވީ، މިއީ ވަރަށް އިންކްލޫސިވް ލޯން ސްކީމެއް ކަމަށާއި، އެ ފަރާތެއްގެ ހުންނަ ނުކުޅެދުންތެރިކަމަށް ރިއާޔަތްކޮށް، ޕްރޮގްރާމް ފުރިހަމަ ކުރުމަށް އިތުރު އެހީތެރިކަމެއް ބޭނުންވާ ހާލަތުގައި، އެކަމަށް މަގުފަހިވާނެ ހަރަދުތައް ދިނުމަށް ހަމަޖެހިފައިވާ ކަަމަށެވެ.

މީގެ އިތުރުންވެސް، މިހާރުވެސް ކޯހުގައި ކިޔަވަމުންދާ ދަރިވަރުން ކުރަންޖެހޭ އެހެނިހެން ޚަރަދުތައް ކުރުމަށްވެސް މިފަހަރުގެ ލޯން ސްކީމްގެ ތެރެއިން ފުރުސަތު ދެއްވާނެކަމަށާއި ހިލޭ ޑިގްރީގައި ކިޔަވަމުންދާ ދަރިވަރުންވެސް އިތުރު ޚަރަދުތައް ހަމަޖެއްސުމަށް ލޯނަށް އެދެވޭނެކަމަށް ވެސް ވަޒީރު ޑރ.މާރިޔާ ވަނީ ވިދާޅުވެފައެވެ.