ފިޔާޒްއާ ހަސަންގެ މައްޗަށް ޤަޛުފުގެ ކުށުގެ ދަޢުވާ އުފުލައިފި, އަދަދުގެ ވީޑިއޯ ފެތުރުން މަނާ

އަދަދު ނޫހުގެ އެޑިޓާ އިން ޗީފް އަދި ސީއީއޯ ހުސައިން ފިޔާޒް މޫސާ އާއި، އެޑިޓަރު ޙަސަން މުޙައްމަދުގެ މައްޗަށް ދައުވާ އުފުލައިފި އެވެ.

އެ ދެ މީހުންގެ މައްޗަށް ދައުވާ އުފުލާފައިވާކަން ޕީޖީ އޮފީހާއި ކްރިމިނަލް ކޯޓުން ވަނީ ޔަގީންކޮށްދީފަ އެވެ. ޕީޖީ އޮފީހުން ބުނީ އަދަދު ނޫހުގެ އެޑިޓާ އިން ޗީފް އަދި ސީއީއޯ ހުސައިން ފިޔާޒް މޫސާ އާއި، އެޑިޓަރު ޙަސަން މުޙައްމަދުގެ މައްޗަށް ޤާނޫނުލްޢުޤޫބާތުގެ 612 ވަނަ މާއްދާގެ ދަށުން ޤަޛުފުގެ ކުށުގެ ދަޢުވާ މިއަދު ކްރިމިނަލް ކޯޓަށް ހުށަހަޅާއިވާ ކަމަށެވެ.

އެ މައްސަލައާ ގުޅިގެން ކްރިމިނަލް ކޯޓުން ވަނީ ޝަރީޢަތުގައި ހިނގަމުންދާ މައްސަލައެއްގައި ވަކި ގޮތަކަށް ޢަމަލު ނުކުރުމަށް އަންގައި ކުރާ އަމުރެެއްވެސް ނެރެފަ އެވެ.

އެ އަމުރުގައި ވަނީ އަދަދުން ހަދާފައިވާ ވީޑިއޯ ޑޮކިއުމަންޓްރީ ފެތުރުން މަނާކޮށްފަ އެވެ. އަދި މި ޑޮކިއުމަންޓްރީގައި ގެނެސްދީފައިވާ އެއްވެސް ވާހަކަެއެއް ސީދާ ގޮތުންނާއި ނުސީދާ ގޮތުންވިޔަސް ނުދެއްކުމަށާއި ޝަރީއަތަށް ހުށައަޅާފައިވާ ޑޮކިއުމަންޓްރީއާ ގުޅުައި މައްސަލައިގެ ޚަސްމަކާއި ނުވަތަ ކުށުގެ ޝިކާރައަކަށްވީ މީހާގެ އެއްވެސް ވާހަކައެއްވެސް ނުދެއްކުމަށް އަމުރު ކޮށްފަ އެވެ.

ގާޒީ މުޒައްމިލު ނާސިރު ސޮއިކޮށް ނެރެފައިވާ އަމުރުގައި ބުނީ އެފަދަ ކޮންމެ ކަމަކީ ކޯޓްގެ ހުރުމަތް ކެނޑުންކަމުގައި ބެލެވިދާނެ އަމަލެއް ކަމަށެވެ.