”ކުޅިވަރު އެސޯސިއޭޝަންތަކަށް ލިބޭ ފައިސާގެ އެއްވެސް ރެކޯޑެއް ނުބަލަހައްޓާ؛ ދައުލަތުގެ އިދާރާތަކާ ހިއްސާއެއްވެސް ނުކުރޭ“

ރާއްޖޭގެ ކުޅިވަރު އެސޯސިއޭޝަންތަކަށް ބައިނަލްއަޤްވާމީ ޖަމުޢިއްޔާތަކުންނާއި އެކި ފަރާތްތަކުން ލިބޭ ފައިސާއާއި އެހީގެ އެއްވެސް ރެކޯޑެއް ރަސްމީ ހައިސިއްޔަތަކުން ނުބަލަހައްޓާ ކަމަށާއި، އެ މަޢުލޫމާތުތައް ދައުލަތުގެ ކަމާބެހޭ އިދާރާތަކާ ހިއްސާނުކުރާކަން އެންޓި-ކޮރަޕްޝަން ކޮމިޝަން (އޭސީސީ) އިން ހާމަކޮށްފިއެވެ.

އޭސީސީން މިކަން ހާމަކޮށްފައިވަނީ "ކުޅިވަރު އިންތިޒާމްކޮށް ބެލެހެއްޓުމުގެ ނިޒާމުގައި ކޮރަޕްޝަނަށް ހުރި ހިރާސް ދެނެގަތުުމުގެ ދިރާސާ ރިޕޯޓް" ގެ ނަމުގައި އިއްޔެ ޢާންމުކުރި ރިޕޯޓުގައެވެ.

އެ ރިޕޯޓުގައި ފާހަގަކޮށްފައިވާ ގޮތުގައި، ދައުލަތުގެ ބަޖެޓުން ކުޅިވަރު އެސޯސިއޭޝަންތަކަށް ފައިސާ ދޫކުރަނީ އަހަރަކު ހަތަރު ބުރަކަށް ބަހާލައިގެން، ކޮންމެ ކުއާޓަރަކު އެއްފަހަރުއެވެ. އަދި ފައިސާ ދޫކުރުމުގައި ބަލަނީ އެސޯސިއޭޝަނުގެ ބޮޑުމިނަށާއި އެއީ އިންޑިވިޖުއަލް ނުވަތަ ޓީމް ކުޅިވަރެއްތޯއެވެ. ކުޅިވަރާ ބެހޭ ޤައުމީ މަޖިލީހުގެ ލަފާގެ މަތިން މިނިސްޓްރީން މި ފައިސާ ދޫކުރާއިރު، ފައިސާ ޚަރަދުކުރާ ގޮތުގެ ތަފްސީލީ މާލީ ބަޔާން ހުށަހެޅުމަކީ އެސޯސިއޭޝަންތަކުގެ ޒިންމާއެކެވެ.

ނަމަވެސް، އެސޯސިއޭޝަންތަކުން އަހަރީ ރިޕޯޓު ގަވާއިދުން ހުށަނާޅާ ކަމަށާއި، އެކަން މޮނިޓަރކޮށް ފިޔަވަޅު އެޅުމުގެ ޒިންމާ އޮތް ކޮމިޝަނަރ އޮފް ސްޕޯޓްސްއިން ވެސް އެކަށީގެންވާ ފިޔަވަޅު އަޅަމުން ނުދާކަން އޭސީސީން ފާހަގަކުރިއެވެ. އެގޮތުން ރިޕޯޓު ނާޅައިފިނަމަ 500 ރުފިޔާއިން ޖޫރިމަނާ ކުރެވޭނެ ކަމަށް ގަވާއިދުގައި އޮތް ނަމަވެސް އެ ގަވާއިދަށް ޢަމަލުނުކުރާކަން ވަނީ ފާހަގަވެފައެވެ.

އޭސީސީގެ ރިޕޯޓުގައި ބަޔާންކޮށްފައިވާ ގޮތުގައި، ސަރުކާރުގެ ބަޖެޓުގެ އިތުރުން ބައިނަލްއަޤްވާމީ ކުޅިވަރު ޖަމުޢިއްޔާތަކުން ދޭ ފައިސާގެ އެހީއާއި، ޓްރެއިނިންގ އަދި ތަކެތީގެ އެހީގެ އެއްވެސް ތަފްސީލެއް ސަރުކާރުގެ އެއްވެސް އިދާރާއަކާ ހިއްސާއެއް ނުކުރެއެވެ. އަދި ސްޕޮންސަރޝިޕާއި ޗެރިޓީގެ ގޮތުގައި ހޯދާ ފައިސާ ޚަރަދުކުރާ ގޮތް ބެލޭނެ ހަރުދަނާ ނިޒާމެއް ނެތުމަކީ ކޮރަޕްޝަނަށް މަގުފަހިވާ މައިގަނޑު އެއް ސަބަބެވެ.

ހާލުގައިޖެހިފައިވި ބޭރުގެ ބަޔަކަށް އެހީތެރިކަން ފޯރުކޮށްދިނުމުގެ މަޤްޞަދުގައި އެސޯސިއޭޝަނަކުން ޗެރިޓީ ފުޓުބޯޅަ މެޗުތަކެއް ކުޅެ، ސްޕޮންސަރ ކުރެވުނު އެކި ކަންކަމަށް ލިބުނު ސްޕޮންސަރ ފައިސާ ޚަރަދުކުރިގޮތް އެނގެންނެތް ކަމަށް ބުނެ ކޮމިޝަނަށް ހުށަހެޅިފައިވާ މައްސަލައެއް ފާހަގަކުރެވެއެވެ. ޗެރިޓީއިން އެސޯސިއޭޝަނަށް ލިބުނު ފައިސާ ޚަރަދު ކުރިކަން އެނގޭނެ އެއްވެސް ލިޔުމެއް ފެންނަން ނެތްކަމާއި އެސޯސިއޭޝަންގެ ބޭންކް އެކައުންޓަށްވެސް އެ ފައިސާ ވަދެފައިނުވާކަމާއި އަދި އެ އިވެންޓްގައި ޚަރަދުތައް ކުރެވިފައިވާ ގޮތާއި، އިވެންޓުން ލިބުނު ފައިސާ ލިޔެކިޔުމުން ބެލެހެއްޓިފައި ނުވާކަން ކޮމިޝަނުގެ ތަޙްޤީޤުން ފާހަގަކުރެވިފައިވެއެވެ.

އޭސީސީގެ ރިޕޯޓް

މީގެއިތުރުން، ކްލަބްތަކުގެ ދަށުން ހިންގާ އެކަޑަމީތައް ރެގިއުލޭޓް ނުކުރެވުމާއި، މަސްލަހަތު ފުށުއެރުމާއި ގަވަރނަންސްގެ މައްސަލަތައްވެސް ހުރިކަން ފާހަގަކޮށްފައިވެއެވެ.

އަދި ފާހަގަކުރި ހުރިހާ މައްސަލައެއް ހައްލުކުރުމަށް އޭސީސީން ވަނީ މުހިންމު 18 ލަފައެއް ދީފައެވެ.

އޭގެ ތެރޭގައި ހިމެނެނީ:

- އެސޯސިއޭޝަންތަކަށް ލިބޭ އެންމެހާ އާމްދަނީއާއި ކުރާ ޚަރަދުތައް ހާމަކުރުން ޤާނޫނުން ލާޒިމްކުރުމާއި، ހަރުދަނާ ފައިނޭންޝަލް ރިޕޯޓިންގ ފްރޭމްވަރކެއް އެކުލަވާލުން.

- ޤަވާޢިދުން މިނިވަން މާލީ އޮޑިޓްތައް ހެދުމާއި، ވެރިންނާއި ހިރާސް ބޮޑު މަޤާމުތަކުގައި ތިބޭ ފަރާތްތަކުގެ މާލީ ބަޔާން ވެބްސައިޓުގައި ޢާންމުކުރުން.

- އެކަޑަމީތަކުގެ ފެންވަރާއި، ކޯޗުންގެ ޝަރުތުތަކާއި ސަލާމަތީ މިންގަނޑުތައް ކަނޑައަޅައި، މިނިސްޓްރީން ޕީރިއޮޑިކް އިންސްޕެކްޝަންތައް ހިންގުން.

- އިންތިޚާބީ ނިޒާމު ހަރުދަނާކޮށް، މަޤާމުތަކަށް ނަޒާހަތްތެރި އަދި ޤާބިލް ފަރާތްތައް އައްޔަންކުރުމާއި، ޝަކުވާ ހުށަހެޅޭނެ ނިޒާމެއް ޤާއިމުކުރުން.

- ދަނޑުތަކުން ލިބެންޖެހޭ ފައިސާގެ އޮޑިޓެއް ހެދުމާއި، ސްކޮލަރޝިޕް އަދި ޕްރޮކިއުމަންޓްގެ ކަންކަން ދެފުށްފެންނަ ގޮތަށް ގެންދިއުން.

- ކުޅިވަރާބެހޭ ޤާނޫނުގައި ހުރި ގޮންޖެހުންތައް ދެނެގަނެ، މަސްއޫލިއްޔަތުތަކާ ގުޅިގެން ޕަރފޯމަންސް އޮޑިޓް ފުރިހަމަކުރުން.

އޭސީސީން ބުނެފައިވަނީ ރާއްޖޭގެ ކުޅިވަރުގެ ދާއިރާ ހަރުދަނާކޮށް، ކޮރަޕްޝަނުން ސަލާމަތްކުރެވޭނީ މާލީ ޖަވާބުދާރީވުމާއި ދެފުށްފެންނަ ނިޒާމެއްގެ ތެރެއިން އެސޯސިއޭޝަންތައް ހިންގައިގެން ކަމަށެވެ.