‏މަޖިދީމަގުގައި ރޭގަނޑު މުޒާހަރާ ކުރަން ހުއްދަ ނުދެވޭނެ: އިހްސާން

އިދިކޮޅު އެމްޑީޕީން އަންނަ ބުރާސްފަތި ދުވަހުގެ ރޭ "ދަތިވެއްޖެ" ނަމުގައި މާލޭގައި ބާއްވަން ރާވާ މުޒާހަރާ, މަޖީދީމަގުގައި ކުރިއަށް ގެންދަން ހުއްދަ ނުދެއްވޭނެ ކަމަށް ހޯމްލޭންޑް މިނިސްޓަރު ޢަލީ އިހުސާން މިއަދު ވިދާޅުވެއްޖެއެވެ.

އެމްޑީޕީން ކުރިއަށްގެންދިއުމަށް ނިންމާފައިވާ މުޒާހަރާއާ ގުޅޭގޮތުން އެޕާޓީގެ ފަރާތުން ނޫސްވެރިންނަށް މައުލޫމާތު ހިއްސާކުރަމުން ބުނީ ބޭނުން ވަނީ މަޖީދީމަގުން މުޒާހަރާ ކުރިއަށްގެންދަން ކަމަށެވެ.

އެގޮތުން މާލެ ވަށައިެގންވާ މަގުގައި މުޒާހަރާ ކުރުމުން އަޑުއިވޭނީ ހަމައެކަނި މުޒާހަރާގެ ބައިވެރިންނަށް ކަމަށާ އޭގެ ބަދަލުގައި މަޖީދީމަގުން މުޒާހަރާ ކުރިއަށް ގެންގޮސްފިނަމަ ފާޅުކުރާ ޝުއޫރުގެ އަގު ރައްޔިތުންނަށް އިވޭނޭކަމަށާއި، ބޭނުމަކީ ވީހާވެސް ގިނަބަޔަކަށް ކަންބޮޑުވުންތައް އަޑުއިއްވުންކަމަށްވެސް ބުނެފައިވެއެވެ.

ނަމަވެސް އެ ހުއްދަ ނުލިބޭތީ އެ ޕާޓީން ދަނީ ކަންބޮޑުވުން ފާޅުކުރަމުންނެވެ.

އެކަމާ ގުޅިގެން މިއަދުގެ މަޖިލީހުހެ ޖަލްސާގައި ވަޒީރު އިހްސާންއާ މެންބަރަކު ކުރެއްވި ސުވާލަށް ޖަވާބު ދެއްވަމުން ވިދާޅުވީ ޤާނޫނުއަސާސީން ރައްޔިތުންނާއި ސިޔާސީ ފަރާތްތަކަށް ކަށަވަރުކޮށްދޭ ޙައްޤުތައް ފުޅާ ދާއިރާއެއްގައި ދިނުމަކީ ސަރުކާރުގެ ވިސްނުން ކަމަށެވެ. އެހެންނަމަވެސް މާލޭގެ އެންމެ ކާރޫބާރޫ ބޮޑު މަގު ބަންދުކޮށްގެން ހަރަކާތެއް ހިންގާއިރު ވިސްނަންޖެހޭ ކަންކަން ހުންނަ ކަމަށެވެ.

މާލޭގެ އެންމެ ކާރޫބާރޫ ބޮޑު، މާލޭގެ މެދުކަމުގައިވާ މަޖިދީމަގު ބްލޮކްކޮށްފައި ސިޔާސީ ހަރަކާތެއް ހިންގުމަށް ފުރުސަތު ދޭއިރު، އާންމު ގޮތެއްގައި އަޅުގަނޑުމެން ބަލަން ކޮން ގަޑިއެއްގެ ކޮން ދުވަހެއްގައިތޯ އެކަން ކުރެވެނީ. އެއީ ހުއްދަ ދެވޭ ކަހަލަ ވަގުތެއް ކަމުގައިވާ ނަމަ، މާނައަކީ އެ މަގު ބަންދުކޮށްލައިގެން މާލޭގެ އެހެން ތަންތަނުގެ ޓްރެފިކަށް ވަރަށް ބޮޑަށް އަސަރު ނުކުރާ ކަމުގައިވާ ނަމަ، އެ ފުރުސަތު އަޅުގަނޑުމެން ދީފައި ހުންނާނެ މީގެ ކުރިން."

އިހްސާން

އެހެންނަމަވެސް އެމްޑީޕީން އެދިފައިވާ ވަގުތަކީ ކާރޫބާރު ބޮޑުވަގުތެއް ކަމުން ހުއްދަ ދެވެން ނެތް ކަމަށް އިހުސާން ވިދާޅުވިއެވެ.

"މިހާރު އެދިވަޑައިގެންފައިވާ ވަގުތަކީ ރޭގަނޑުގެ ވަގުތަކަށްވާތީވެ އަޅުގަނޑުމެންނަށް އާންމު ގޮތެއްގައި ކާރޫބާރޫ ވަރަށް ބޮޑުކޮށް އޮންނަ ވަގުތަކަށްވާތީ އެ ގަޑީގައި އެތަނަށް، (ހުއްދަ) ނުދެވެނީ،" އިހުސާން ވިދާޅުވި އެވެ.

އިހްސާން އިތުރަށް ވިދާޅުވީ މި ސަރުކާރުން މާލޭގެ މަގުތައް ފުޅާކޮށްފައިވާ ކަމަށާއި އެމްޑީޕީގެ އެއްވުންތަކުގައި ބައިވެރިވާ މީހުންގެ އަދަދަށް ބަލާއިރު އެ ފުޅާ ކުރި މަގުގެ ހުރަހަށް ތިބެގެން ވެސް މުޒާހަރާ ކުރެވޭނެ ކަމަށެވެ.

އެހެންކަމުން މަޖީދީމަގުގައި މުޒާހަރާ ނުކޮށް އެ ހުއްދަ ދީފައިވާ ސަރަހައްދު ތަކުގައި މުޒާހަރާ ކުރުމަށް އިހްސާން އެދިވަޑައިގެންނެވިއެވެ.

"މުޒާހަރާކުރުމަށް ނުވަތަ އާންމު ޝުއޫރު ފާޅުކުރުމަށްޓަކައި ވަރަށް ބޮޑެތި ޖާގަތައް އެބަހުރި. އެހެންވީމަ ސިޔާސީ ހުރިހާ ފަރާތްތަކުގެ ކިބައިން ވެސް އަޅުގަނޑު އެދެނީ އެ ޖާގަތައް ބޭނުން ކުރެއްވުން،" އިހުސާން ވިދާޅުވި އެވެ.