ތުހުމަތު އޮތް ސްޓެލްކޯގެ ޕްރޮކިއުމަންޓްގެ ވެރިޔާ ވެސް ވަކިކޮށްފި
ސްޓެލްކޯގެ ޕްރޮކިއުމަންޓްގެ ވެރިޔާ އަޒްހަދު ރަމީޒު އެ މަގާމުން ވަކިކޮށްފި އެވެ.
އޭނާ މަގާމުން ވަކިކުރައްވާފައި މިވަނީ މިއަދު މަގާމުން ވަކިކުރެއްވި ސްޓެލްކޯގެ މެނޭޖިން ޑިރެކްޓަރު މުހައްމަދު ސަމާހް ރަޝީދު ދައްކާފައިވާ ވާހަކަތަކެއް ކަމަށް ބުނާ އޯޑިއޯއެއް އާންމުވެ އަޒްހަދުގެ ބައިވެރިވުން އޮވެގެން ސްޓެލްކޯގެ ތެރޭގައި ޚިޔާނާތުގެ ކަންތައްތަކެއް ހިންގާފައިވާ ކަމަށް ތުހުމަތު ކުރެވިފައި ވަނިކޮށެވެ.
އާންމުވެފައިވާ އޯޑިއޯގައި ސަމާހު ކަމަށް ބުނާ މީހާ ވަނީ ސްޓެލްކޯގައި ހިންގާ ހިޔާނާތުގެ ކަންތައްތަކެއް ހިންގާ ކަމަށް ބުނެފަ އެވެ. އެހެން ބުނުމުން އޭނާގެ ކައިރީގައި ތިބި މީހުން ވަނީ އެކަންކަން އެހެން އެއްވެސް މީހަކަށް ހަމަ ނޭންގޭނެތޯ ސުވާލުކޮށްފަ އެވެ. އަދި އަޒްހަދަށްވެސް ނޭންގޭތޯ ސުވާލު ކުރެ އެވެ. އަޒްހަދަކީ ސްޓެލްކޯގެ ޖެނެރަލް މެނޭޖަރުގެ މަގާމުގައި ހުރި މީހެކެވެ. އޭނާ އަކީ ކުންފުނީގެ ޕްރޮކިއުމަންޓްގެ ވެރިޔާ އެވެ.
އެ ސުވާލުކުރުމުން ސަމާހު ކަމަށް ބުނާ މީހާ އޭނާ ހިންގާ ކަންކަން އަޒްހަދާއި ސާއިދު އަށް އެނގޭނެ ކަމަށް ބުނެ އެވެ. އެކަންކަން މީހުން އެހީވާ ކަމަށްވެސް ބުނެ އެވެ. ސާއިދު އަކީ ދާދި ފަހުން ރެކްރޫޓްމަންޓް އެންޑް ސެލެކްޝަން ޔުނިޓްގެ ހެޑްގެ މަގާމަށް އައްޔަންކޮށްފައިވާ މީހެކެވެ. އޭނާ އެ މަގާމަށް އައްޔަނުކުރީ ސީނިއާ މެނޭޖަރެއްގެ ގޮތުގަ އެވެ.
އެ މަގާމަށް އޭނާ އައްޔަނުކުރީ ވެސް ސަމާހް އެވެ.
މި އޯޑިއޯއާ ގުޅޭގޮތުން ސަމާހު ވިދާޅުވީ އެއީ ހަދާފައިވާ އެއްޗެއް ކަމަށެވެ. އެފަދަ ވާހަކައެއް ނުދައްކަވާ ކަމަށާ އެއީ ހަގީގަތެއް ނޫން ކަަމަށް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
