ލޭ ހަދިޔާކުރާ ފަރާތްތައް ތިބި ތަނަށް ގޮސް ލޭ ނެގުމުގެ ޚިދުމަތެއް ފަށަނީ
ލޭ ހޯދުމުގައި ކުރިމަތިވާ ދަތިތަކަށް ޙައްލެއް ހޯދުމުގެ ގޮތުން ލޭ ދޭން ބޭނުންވާ މީހާ ހުރި ތަނަކަށް ގޮސް ލޭ ނެގޭނެ މޯބައިލް ޚިދުމަތެއް ވަރަށް އަވަހަށް ތަޢާރަފުކުރައްވާނެ ކަމަށް ޞިއްޙަތާއި ޢާއިލާއާއި އިޖުތިމާޢީ އެހީއާ ބެހޭ ވަޒީރު ގީލާ ޢަލީ ވިދާޅުވެއްޖެއެވެ.
ދިވެހިރާއްޖޭގެ އަޑުގެ "އަހާށޭ ބުނާނަން" ޕްރޮގްރާމުގައި ވާހަކަދައްކަވަމުން ވަޒީރު ވިދާޅުވީ ލޭ ހަދިޔާކުރާނެ ފަރާތްތައް ހޯދުމުގައި ބޮޑެތި ގޮންޖެހުންތަކެއް އެބަހުރި ކަމަށެވެ.
އެގޮތުން ލޭ ދިނުމަށް އަންނަ ބައެއް ފަރާތްތައް ކަނޑައެޅިފައިވާ ޝަރުތުތައް ފުރިހަމަނުވެގެން ލޭ ނުދެވޭ ޙާލަތްތައް ދިމާވާ ކަމަށާއި ވަގުތު ނެތުމުގެ ސަބަބުން ސެންޓަރުތަކަށް ދިޔުމަށް ދަތިވާ މީހުންވެސް ގިނަ ކަމަށް ފާހަގަކުރެއްވިއެވެ.
"އަޅުގަނޑުމެން މަސައްކަތްކުރަމުން މި ގެންދަނީ ލޭ ދިނުމަށް އެދޭ ފަރާތްތަކަށް ވީހާ ވެސް ލުއިފަސޭހަ ގޮތްތަކެއް ހޯދައި ދިނުމަށް. މިގޮތުން އަޅުގަނޑުމެން ވަރަށް އަވަހަށް ތައާރަފު ކުރާނަން ލޭ ދިނުމަށްޓަކައި މޯބައިލް ޚިދުމަތެއް ރައްޔިތުންނާ ވީހާ ވެސް ގާތަށް ގޮސް އެ މީހުންގެ ލޭ ނަގާ އަދި ސްޓޯރޭޖް ފެސިލިޓީތަކަށް ގެންދިއުން." ވަޒީރު ވިދާޅުވިއެވެ.
ވަޒީރު ވިދާޅުވީ ލޭ ލިބުމުގެ މައްސަލައަށް ދާއިމީ ޙައްލެއް އަންނާނީ ލޭ ހަދިޔާކުރާ މީހުންގެ ޢަދަދު އިތުރުވެގެން ކަމަށެވެ.
މޯލްޑިވިއަން ބްލަޑް ސާވިސަސްގެ ތަފާސްހިސާބުތައް ދައްކާ ގޮތުން މި ވަގުތު ރާއްޖޭގައި 668 މީހަކު ގަވާއިދުން ތެލެސީމިއާ ބަލީގައި ލޭ އަޅަމުންދާއިރު އޭގެ ތެރެއިން 505 މީހުން ރެޖިސްޓާކޮށްފައި ވަނީ އަތޮޅުތެރޭގައެވެ. މާލޭ ސަރަޙައްދުގައި ރެޖިސްޓާކޮށްފައި ވަނީ 163 މީހުންނެވެ.
ތެލެސީމިއާ ޕޭޝަންޓުންގެ އިތުރުން އެކްސިޑެންޓް ތަކާއި، އޮޕަރޭޝަންތަކާއި ގުޅިގެންވެސް ލޭ ބޭނުންވާއިރު، ލޭ ނުލިބޭ މައްސަލަ އަކީ ރާއްޖޭގައި ވަރަށް ބޮޑު މައްސަލައެއްކަން ފާހަގަކޮށްލަންޖެހެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
