ދިވެހިޤައުމު، ޤައުމަކަށްވީ ސަބަބާމެދު މިއަދު ފުންކޮށް ވިސްނަންޖެހޭ: ވަޒީރު ހީނާ

ދިވެހި ޤައުމު ޤައުމަކަށްވީ ސަބަބާމެދު މިއަދު ފުންކޮށް ވިސްނަން ޖެހިފައިވާކަމަށް ފަންނާއި ސަޤާފަތާއި ތަރިކައާބެހޭ ވަޒީރު ހީނާ ވަލީދު ވިދާޅުވެއްޖެއެވެ.

ހއ.އުތީމްގައި މިއަދު ބޭއްވި ޤައުމީ ދުވަހުގެ ރަސްމީ ޖަލްސާގައި ވާހަކަދައްކަވަމުން ވަޒީރު ވިދާޅުވީ، ޤައުމީ ދުވަހު އަޅުގަނޑުމެން ކުރާ ފުރަތަމަ ކަމަކަށް ވާންޖެހޭނީ ޤައުމީ މަސްއޫލިއްޔަތުތައް ހަނދާންކުރުންކަމަށެވެ.  ޤައުމީ ދުވަހަކީ ޤައުމުގެ ހުރިހާ ކަމެއް އޭގެ މާނައިގައި ހިމެނޭ ދުވަހެއްކަން ފާހަގަކުރައްވަމުން ވަޒީރު ވިދާޅުވީ، ހަޤީޤީ މާނާގައި ޤައުމީ ދުވަހަކީ އިއްޔެއާ މިއަދާ ގުޅުވާ، މާދަމައަށް ވިސްނާ، މި ދެމެދު މުރާޖަޢާކޮށް މާދަމައަށް ތައްޔާރުވުމުގެ ދުވަހެއް ކަމަށެވެ.

ޤައުމީ ދުވަހު ކުރާ ފުރަތަމަ ކަމަކަށް ވާންޖެހޭނީ ޤައުމީ މަސްއޫލިއްޔަތުތައް ހަނދާންކުރުން ކަމަށާއި، ޤައުމުގެ މިނިވަންކަމާއި ރައްކާތެރިކަން ދެމެހެއްޓުމަކީ ގައުމެއް ފަރުދެއްގެވެސް ފަރުދީ ޒިންމާއެއްކަން ހަނދާންކުރުންކަމަށް ވަޒީރު ވިދާޅުވިއެވެ.

ރާއްޖޭގެ އަދުގެ ހާލަތުގައި ގައުމީ ދުވަހާ ގުޅިގެން ވިސްނަންޖެހޭނީ ގައުމު ގައުމަކަށްވީ ސަބަބުތަކާ މެދުގައިކަން ފާހަގަކުރައްވަމުން ތަރިކައާ ބެހޭ ވަޒީރު ވިދާޅުވީ، ޤައުމަކަށްވާ ފުރިހަމަ ޝަރުތުތަކާމެދު މިއަދު ވިސްނަންޖެހިފައިވާކަމަށެވެ.

ރާއްޖޭގެ އަދުގެ ހާލަތުގައި ގައުމީ ދުވަހާ ގުޅިގެން ވިސްނަންޖެހޭނީ ގައުމު ގައުމަކަށްވީ ސަބަބުތަކާ މެދުގައި. ޝައްކެއްނެތް، ގައުމަކީ މީސްތަކުންގެ ޖަމާއަތެއް. މިފަދަ ޖަމާއަތެއް ގައުމަކަށްވުމަށްޓަކައި ޝަރުތުކުރެވޭ އެތައް ކަމަކާއެތައް ސިފަތަކެއްވޭ. އަޅުގަނޑުމެންގެ ގައުމު ގައުމަކަށް ވެފައި މިވަނީވެސް މި ޝަރުތުތައް ހަމަވެގެންނެވެ. އަދި ކޮބައިތޯ؟ އެ ސިފަތަކާ ޝަރުތުތައް ނުހަނު ވަރުގަދަވެގެން. ނަމަވެސް މިއަދުގެ ހާލަތުގައި އެކަންކަމަށް އެނބުރި ބަލާލަންޖެހިއްޖެނަމަ އެކަންކަމަށް ބަލާލަންޖެހޭކަމަށް އަޅުގަނޑަށް ދެކެނީ. މިކަމާ ގުޅިގެން އުފައްދަންޖެހޭ ސުވާލުތަކެއް އެބަހުރިކަމަށްވެސް ދެކެނީ

ތަރިކައާ ބެހޭ ވަޒީރު ހީނާ ވަލީދު ވިދާޅުވިއެވެ

ވަޒީރު ވިދާޅުވީ މި ހުރިހާ ކަމެއް ގުޅުވައިގެން ބަލާއިރު މިއަދު ފެންނަނީ، ހާލަތު ބަދަލުވުމުގެ ކޮޅުމަތީގައި އޮތްތަން ކަމަށާއި، މިއަދު  އެންމެ ބޮޑު މަސްއޫލިއްޔަތަކަށްވެފައި މިވަނީ މި ބަދަލުތައް ހެޔޮ މިސްރާބަކަށް އަނބުރާލުން ކަމަށެވެ. ގައުމިއްޔަތު ދިރުވާ އާލާކުރުމަށް ސަރުކާރުން މިހިންމު މަސައްކަތްތަކެއް ފާހަގަކުރައްވަމުން ވަޒީރު ވަނީ ގައުމީ މަގްސަދްތައް ހާސިލުކުރުމަށްޓަކައި ރައީސުލްޖުމްހޫރިއްޔާ ކަނޑައަޅުއްވާފައިވާ ސިޔާސަތްތަކާއެކު ހާލަތު އިއާދަވުމަށް މަގުފަހިވެގެންދާނޭކަމަށެވެ.

ޤައުމިއްޔަތު ދިރިވުމަށް ސަރުކާރުން ކަނޑައަޅާފައިވާ ސިޔާސަތްތަކުގެ ތެރެއިން މިހާރުވެސް ގިނަ ޕްރޮގްރާމްތައް ދަނީ ހިންގަމުންނެވެ. އެގޮތުން އެންމެ ފާހަގަކޮށްލެވެނީ ވަތަނީ ހިދުމަތުގެ ޕްރޮގްރާމެވެ.