ޑޮލަރުގެ އަގު މައްޗަށް ދިޔައީ އެމްޑީޕީން ފައިސާ ޗާޕުކޮށްގެނެއް ނޫން، މިއީ އެހެން ކަމެއް: ޣަފޫރު

ޑޮލަރުގެ އަގު މައްޗަށް ދިޔައީ ނިމިދިޔަ އެމްޑީޕީ ސަރުކާރުން ފައިސާ ޗާޕުކޮށްގެން ނޫންކަމަށް ހަނިމާދޫ ދާއިރާ އަބްދުލްޣަފޫރު މޫސާ މިއަދު ވިދާޅުވެއްޖެއެވެ.

ޑޮލަރުގެ އަގު ހިފެހެއްޓުމެއް ނެތި އުފުލެމުންދާއިރު އެކަމުގައި އެއްވެސް ބަހެއް ވިދާޅު ނުވެ ގަވަރުނަރު ހުންނަވާތީ އާއި ދައުލަތުގެ ރިޒާވު ބޭނުންކޮށްގެން ރަސްމާލެ ހިއްކަން ފައިސާ ދައްކާ ކަމަށްބުނެ އެމްޑީޕީ ޕީޖީން މިއަދު ވަނީ ގަވަރުނަރާ ބައްދަލުކުރަން އެމްއެމްއޭއަށް ގޮސްފައެވެ.

އެފަހުން، މީޑިއާ ތަކަށް މައުލޫމާތު ދެއްވަމުން ޣަފޫރު ވިދާޅުވީ، ގަވަރުނަރު އަމަލު ކުރެއްވީ ޑޮލަރުގެ މައްސަލަ އަކީ އެބޭފުޅާއާ ބެހޭ ކަމެއް ނޫން ކަމަށް ދޭހަވާފަދަ ގޮތަކަށް ކަމަށެވެ. އެހެން ނަމަވެސް ގަވަރުނަރެއް ހުންނެވި ނަމަ ޑޮލަރުގެ މައްސަލައާ ގުޅޭ ކަންބޮޑުވުންތައް ގަވަރުނަރާ ހިއްސާކުރެވި، އެކަމާއި ބެހޭ މައުލޫމާތު ސާފުކުރެވެން ޖެހޭނެ ކަމަށް ޣަފޫރު ވިދާޅުވިއެވެ.

އަދި މިހާރު ޑޮލަރުގެ އަގު 22 ރުފިޔާއަށް އަރާފައުވާ ކަމަށާ، ވީއިރު މާދަމާ އެ އެ އަގު އަރާނެ ވަރުވެސް ރައްޔިތުންނަށް ސާފުވާންޖެހޭ ކަމަށް އޭނާ ވިދާޅުވިއެވެ.

މީގެ އިތުރުން، ޑޮލަރުގެ އަގު މަތިވެފައިވަނީ އެމްޑީޕީ ސަރުކާރުގެ ސަބަބުން ކަމަށް އަދުގެ ސަރުކާރުން ބުނި ނަމަވެސް އެއީ ކަންވެފައިވާ ގޮތް ނޫން ކަމަށް ޣަފޫރު ވިދާޅުވިއެވެ.

އެބޭފުޅުން ވިދާޅުވަނީ އެމްޑީޕީ ސަރުކާރުގައި ފައިސާ ޗާޕުކޮށްގެންނޭ މިހެން މިކަން ދިމާވަނީ. އެއީ ދޮގެއް. އެމްޑީޕީ ސަރުކާރުގައި ފައިސާ ޗާޕުކޮށްގެން ނަމަ، އެ އެއްއަހަރު ތެރޭގައި އެކަން އަންނަން ޖެހޭނެ. އޭގެ ހަތަރު އަހަރުފަހުން މި މައްސަލަ އައުން މީކީ އެކަމެއް ނޫން. މިއީ މުޅިން އެހެން ކަމެއް. ފައިނޭންސް ދަންނަ ބޭފުޅުންނަށް ވަރަށް ރަނގަޅަށް އެނގިވަޑައިގަންނަވާނެ، މިވެގެން އުޅޭ ގޮތް. 17، 17.50 އަށް އަލުގަނޑުމެންގެ ސަރުކާރުގައި ޑޮލަރު ހުރީ.

ޣަފޫރު

އެމްޑީޕީން ވަނީ، ޑޮލަރުގެ މައްސަލައާއި ގުޅިގެން ކަންބޮޑުވުން ހުރި ހުރިހާ ފަރާތްތަކުން މާދަން 11:00 ގައި އެމްއެމްއޭ ކުރިމައްޗަށް އައުމަށް އެދިފައެވެ.