ޣައްޒާގެ އުތުރަށް އިސްރާއީލުގެ އަނިޔާވެރި ހަމަލާއެއް؛ 73 މީހުން ޝަހީދުކޮށްލައިފި!

ޣައްޒާގެ އުތުރަށް އިސްރާއީލުގެ ނިރުބަވެެރި ސިފައިން ހަމަލާދީ 73 މީހުން ޝަހީދުކޮށްލައިފިއެވެ.

އިސްރާއީލުން ވައިގެ މަގުން ހަމަލާދީފައިވަނީ ބައިތު ލަހިޔާ ސަރަހައްދުގައިވާ އާއްމުން ދިރިއުޅޭ ގެތަކަށް އަމާޒުކޮށެވެ.

މި ހަމަލާ އާއި ގުޅިގެން ހަމާސް ގެ މީޑިއާ އޮފީހުން ބުނީ، 73 މީހުން ޝަހީދުވެފައިވާކަމަށެވެ. މިކަމާއި ގުޅޭ ގޮތުން ޣައްޒާގެ ހެލްތު މިނިސްޓްރީގެ ރަސްމީ ބަހެއް ނުލިބުނު ނަމަވެސް، އެ މިނިސްޓްރީގެ ސީނިއާ އޮފިޝަލެއް ވަނީ ހަމާސް އިން ހާމަކުރި އަދަދުތައް ސައްހަކަމަށް ބުނެފައެވެ.

ފަލަސްތީނުގެ ސިއްހީ އެހީތެރިން ބުނީ، ޣައްޒާގެ އުތުރުގައި އިންޓަނެޓާއި ޓެލެކޮމިއުނިކޭޝަންގެ ހިދުމަތްތައް ޔަހޫދީ ފައުޖުން ކަނޑާލާފައިވުމުން، އާއްމުންނަށް ބޭނުންވާ އެންމެ ފުރިހަމަ އެހީތެރިކަން ފޯރުކޮށް ނުދެވޭ ކަމަށެވެ.

ޣައްޒާގެ ޖަބަލިއާގައި ޔަހޫދީން ކުރިއަށްގެންދާ އުދުވާން ވަރުގަދަކޮށްފައިވާއިރު، ޔަހޫދީ ފައުޖުން ދަނީ އެ ސަރަހައްދާއި ކައިރީގައިވާ ބައިތު ހަނޫން އާއި ބައިތު ލަހިޔާ އަށް ވެސް ޓޭންކަރުތައް ފޮނުވައި، އެ ސަރަހައްދު ހުސްކުރުމަށް އަމުރު ކުރަމުންނެވެ.