ފިއްލަދޫން 50 އަހަރަށް 66 ބިން ދިން ގޮތުން 69 މިލިއަނުން ގެއްލުންވާނެ: އޮޑިޓް

ހއ. ފިއްލަދޫ ކައުންސިލުން އެ ރަށުގައި ޓޫރިޒަމް ފުޅާކުރުމަށް ބިންތައް ކުއްޔަށް ދޫކުރުމުގައި ހުށަހެޅި ޕްރޮޕޯޒަލްތަކާއި ޚިލާފަށް އެއްބަސްވުންތައް ތައްޔާރުކުރުމުގެ ސަބަބުން 69.9 މިލިއަން ރުފިޔާއިން ގެއްލުންވާނެ ކަމަށް އޮޑިޓާ ޖެނެރަލްގެ އޮފީހުން ބުނެފިއެވެ.

އޮޑިޓް އޮފީހުން ނެރުނު ހއ. ފިއްލަދޫ ކައުންސިލުގެ އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، ކައުންސިލުގެ އިދާރާ އިން ޓޫރިޒަމަށް ބިން ދޫކުރުމަށް ތައްޔާރުކޮށްފައިވާ އުސޫލާ ހިލާފަށް ޕްރޮޕޯސަލްތައް އިވެލުއޭޓްކޮށްފައިވުމާއި، އަދި ހުށަހެޅުނު ޕްރޮޕޯސަލްތަކާ ޚިލާފަށް އެއްބަސްވުންތައް ތައްޔާރުކޮށްފައިވުމުގެ ސަބަބުން ޖުމްލަ 69,952,173 ރުފިޔާގެ ގެއްލުން އެ އެއްބަސްވުންތަކުގެ މުއްދަތުގައި ވާނެއެވެ. މީގެ އިތުރުން، ޕްރޮޕޯސަލްތައް އިވެލުއޭޓް ކުރުމުގައި ހެދި ގޯސްތަކުގެ ސަބަބުން ކައުންސިލަށް 173,173 ރުފިޔާގެ ވަގުތީ ގެއްލުމެއް ވެފައިވާ ކަމަށްވެސް ރިޕޯޓުގައިވެއެވެ.

އޮޑިޓް ރިޕޯޓުގައި ބުނެފައިވަނީ، ކުއްޔަށް ދޫކޮށްފައިވާ ބިންތަކުގެ ތެރެއިން އަށް ބިމަކުން ކުލި ހިސާބުކުރި ގޮތުގެ ސަބަބުން އާމްދަނީގެ ގޮތުގައި 55 މިލިއަން ރުފިޔާގެ ގެއްލުން ވާނެއެވެ. މި އަދަދު ހިސާބުކޮށްފައިވަނީ ކޮންމެ 10 އަހަރަކުން މަހުކުލި 25 ޕަސެންޓް އިތުރުކުރާނެ ކަމަށް ބަލައިގެންނެވެ. ނަމަވެސް، ކުލި އިތުރުކުރުމަކީ އިޚްތިޔާރީ ކަމަކަށް ވާތީ، އެ ކުރިއެރުން ނުހިމަނައި ހިސާބުކުރާނަމަ، ގެއްލުން 100 މިލިއަން ރުފިޔާއަށް އިތުރުވެގެން ދިއުމުގެ ފުރުސަތު އެބަ އޮތް ކަމަށް އޮޑިޓުގައި ފާހަގަކޮށްފައިވެއެވެ.

އަދި ބައެއް އެއްބަސްވުންތަކުގައި ސީއެސްއާރު އަދި ކުލީގެ މާއްދާތައް ޕްރޮޕޯސަލާ ޚިލާފަށް ހިމަނާފައިވާކަން ރިޕޯޓުން ހާމަވެއެވެ. މިސާލަކަށް، ޕްލޮޓް ނަމްބަރު BP-01 ގެ ޕްރޮޕޯސަލްގައި އަހަރުން އަހަރަށް ކުލި އިތުރުވާ ގޮތަށް ހުށަހެޅި ނަމަވެސް، އެއްބަސްވުމުގައި ފުރަތަމަ އަހަރުގެ އަގު (2ރ. އަކީ) 50 އަހަރަށް ފިކްސްކޮށްފައިވެއެވެ. މީގެ ސަބަބުން 9.2 މިލިއަން ރުފިޔާގެ ގެއްލުން ވާނެ ކަމަށް ފާހަގަކޮށްފައިވާއިރު، ހަމަ އެފަދައިން، ޕްލޮޓް BP-38 އަށް ސީއެސްއާރުގެ ގޮތުގައި އަހަރަކު 115,000ރ. ދޭނެ ކަމަށް ހުށަހެޅި ނަމަވެސް، އެއްބަސްވުމުގައި ދެ އަހަރަށް ޖުމްލަ 115,000ރ. ދޭންޖެހޭ ގޮތަށް ހަމަޖައްސާފައިވާތީ، އެކަނި ވެސް 5 މިލިއަން ރުފިޔާގެ ގެއްލުމެއް ވެދާނެ ކަމަށް އޮޑިޓުގައި ބުނެއެވެ.

އޮޑިޓް ރިޕޯޓުގައި ފާހަގަކުރި އެހެން މައްސަލަތަކުގެ ތެރޭގައި، ކައުންސިލު އިދާރާގެ މުވައްޒަފުންނާއި ގުޅުންހުރި ފަރާތްތަކަށް ބިންތަކަށް ކުރިމަތިލުމުގައި އަމަލުކުރާނެ އުސޫލެއް އެކުލަވާލާފައި ނެތުން ހިމެނެއެވެ. އަދި ލޯކަލް ކައުންސިލުތަކުގެ އާންމު އިޖުރާއީ ގަވާއިދާ ޚިލާފަށް، ކައުންސިލް މެމްބަރުންގެ އަމިއްލަ މަސްލަހަތު ހިމެނޭ ކަންކަމާ ގުޅޭ ބައްދަލުވުންތަކުގައި އެ މެމްބަރުން ބައިވެރިވެފައިވާ ކަމަށްވެސް ރިޕޯޓުގައި ވެއެވެ.

މިގޮތުން، އެ ރިޕޯޓުގައި ބުނީ ދެ މުވައްޒަފަކާއި މެމްބަރަކަށް ބިން ލިބުނު ކަމަށް ފާހަގަކޮށްފައިވާއިރު އަދި 131،660 އަކަފޫޓުގެ އެ ބިމުން އެ މީހުންނަށް ލިބިފައި ވަނީ ބީޗް ފްރަންޓުން ހަތް ބިމާއި މޫދާ ކައިރިން ތިން ބިމަކާއި ފުއްޓަރު ފަރާތުން ބިމެއް ކަމަށެވެ. އަދި 81،614 އަކަފޫޓުގެ ބިމުން، ތިން މުވައްޒަފަކާއި ދެ މެމްބަރަކާ ގުޅުން ހުރި ފަރާތްތަކަށް ވެސް ބިން ލިބުނު ކަމަށާއި އެއީ ބީޗް ފްރަންޓުން ފަސް ބިމާއި މޫދާ ކައިރި ހިސާބަކުން ހަތަރު ބިން ކަމަށެވެ.