38 ވަނަ ޤައުމީ ޤުރުއާން މުބާރާތުގެ ފައިނަލް ބުރުގެ ކިޔެވުންތައް ނިންމާލައިފި

ބޮޑެތި ބަދަލުތަކަކާ އެކު މިއަހަރު ކުރިއަށް ގެންދިޔަ ކީރިތި ޤުރުއާން ކިޔެވުމުގެ 38 ވަނަ ޤައުމީ މުބާރާތުގެ ކިޔެވުންތައް ނިންމާލައިފިއެވެ.

މި މުބާރާތް މިފަހަރު ފާހަގަވެގެން ގޮސްފައިވަނީ އޮނިގަނޑު އެކީގައި ބަދަލުކޮށް ފުރަތަމަ ފަހަރަށް އޮޑިޝަން ބުރުތަކެއް ތަޢާރަފުކުރި މުބާރާތުގެ ގޮތުގައެވެ. މާލޭގެ އިތުރުން ރާއްޖޭގެ 21 ރަށެއްގައި އޮޑިޝަން ބާއްވައިފައިވާ ކަމަށް ކީރިތި ޤުރުއާނާ ބެހޭ ޤައުމީ މަރުކަޒުން ހާމަކޮށްފައިވެއެވެ.

އޮޑިޝަން ބުރުގައި ޖުމްލަ 3050 ކުދިން ނަން ނޯޓުކުރި އިރު އެ ބުރުގައި ކިޔެވީ 2742 ކުދިންނެވެ. ސެމީ ފައިނަލަށް 379 ދަރިވަރުން ހޮވުނު އިރު ފައިނަލް ބުރަށް ދަތުރުކުރީ 140 ދަރިވަރުންނެވެ. ނަމަވެސް ފައިނަލް ބުރުގައި ކިޔެވީ 138 ދަރިވަރުން ކަމަށް އެ މަރުކަޒުން ބުނެފައިވެއެވެ. ފައިނަލް ބުރުގެ ކިޔެވުންތައް ކުރިއަށް ގެންދިޔައީ މިދިޔަ ބުދަ ދުވަހާއި ބުރާސްފަތި ދުވަހު ސަލްމާން މިސްކިތުގައެވެ.

ގަވާއިދަށް ގެނައި ބަދަލުތަކުގެ ތެރޭގައި ސެމީ ފައިނަލް އަދި ފައިނަލް ބުރުގެ ތިން ބައިގެ ކިޔެވުމަށް އިންސާފުކުރުމަށް ކަނޑައެޅި ދެ ފަނޑިޔާރުންގެ ޕެނަލްގައި ވެސް ބައިނަލްއަޤުވާމީ ފެންވަރުގެ އެއް ފަނޑިޔާރަކު ހިމެނުން ފާހަގަކޮށްލެވެއެވެ.

ކޮންމެ އުމުރުފުރާއަކުން ބަލައިގެން އަދި ނުބަލައި ކިޔެވުމުގެ ބައިން ފުރަތަމަ ތިން ވަނައަށް ދާ ދަރިވަރުން ހޮވުމަށް ހަމަޖެހިފައިވާ އިރު މުޅި މުބާރާތުން ބަލައިގެން ކިޔެވުމާއި ނުބަލައި ކިޔެވުމާއި ޙާފިޡުންގެ ބައިން ވެސް އެއް ވަނައާއި ދެ ވަނައާއި ތިން ވަނަ ހޮވާނެއެވެ. މި ތިން ބައިގެ އެއް ވަނައަށް ރައީސުލްޖުމްހޫރިއްޔާގެ ޚާއްޞަ އިނާމު ދެއްވުމަށް ވަނީ ހަމަޖައްސައިފައެވެ.

ޤައުމީ ޤުރުއާން މުބާރާތަކީ ރާއްޖޭގައި ބާއްވާ އެންމެ ޝަރަފުވެރި އަދި އެންމެ އަގުބޮޑު އިނާމު ލިބޭ މުބާރާތަށް ހެއްދެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައި ސީދާ ދައުލަތުގެ ބަޖެޓުން މުބާރާތަށް ޚަރަދުކުރައްވާ ގޮތަށް ވަނީ ހަމަޖައްސަވައިފައެވެ.

މީގެ އިތުރުން އިނާމުތައް ބޮޑުކޮށް ތިން ބައިގެ އެއް ވަނައަށް ހޮވޭ ދަރިވަރުންނަށް ރައީސުލްޖުމްހޫރިއްޔާގެ ޚާއްޞަ ސްކޮލާޝިޕެއް ދެއްވާ ގޮތަށް ވެސް ވަނީ ނިންމަވައިފައެވެ.