ކުޅުދުއްފުށީ ފަރުމައްޗަށް ބީއްސާލާފައި އޮތް ބާޖުނަގަން 14 ދުވަސް ދީފި

ހދ.ކުޅުދުއްފުށީ ހުޅަނގު އުތުރު ފަރުމައްޗަށް ބީއްސާލާފައި އޮތް ބާޖު ނެގުމަށް އޭގެ ވެރިފަރާތަށް 14 ދުވަހުގެ މުހުލަތެއް ސިވިލްކޯޓުން އިއްޔެ ދީފިއެވެ.

ބާޖު ނުނަގައިގެން އެ މައްސަލަ ސިވިލްކޯޓަށް ހުށަހެޅީ ދިވެހި ދައުލަތުގެ ފަރާތުން އެންވަޔަރަމަންޓަލް ޕްރޮޓަކްޝަން އޭޖެންސީ (އީޕީއޭ) އިންނެވެ. އީޕީއޭއިން ސިވިލްކޯޓުގައި މި މައްސަލާގައި ދައުވާކޮށްފައިވަނީ ބާޖު ގަނެފައިވާ ފަރާތްކަމަށްވާ ބީއެމްސީ ސްލިޕްވޭ އެންޑް ސަލްވޭޖް ކޮމްޕެނީއާ ދެކޮޅަށެވެ.

އީޕީއޭއިން ކުރި ދައުވާގައި ވަނީ އެ ބާޖު އެތަނުގައި އެގޮތަށް އޮތުމުން އެސަރަހައްދުގެ ވެއްޓަށް ގެއްލުންލިބި، އެ ފަރަށް ލިބެމުންދާ ގެއްލުންތައް ރައްކާތެރިކުރުމުގެ އިތުރުން ކުޅުދުއްފުށި އެއަރ އޮޕަރޭޗަންތައް ކުރިއަށްގެންދިއުމަށްވެސް ދަތިވާކަން ފާހަގަކޮށްފައެވެ. އީޕީއޭއިން ވަނީ ބާޖު ނެގުމަށް ތަކުރާރުކޮށް އެކުންފުންޏަށް އަންގާފައެވެ. ނަމަވެސް މިއަދާހަމަޔަށް އާއިރުވެސް ބާޖު ނެގުމުގެ މަސައްކަތް ފަށާފައިނުވާކަން އީޕީއޭއިން ފާހަގަކުރިއެވެ.

އެހެންކަމުން އީޕީއޭއިން ސިވިލްކޯޓަށް ހުށަހެޅި އެ ދައުވާގައި ވަނީ ބާޖާއި ބާޖުން އެ ސަރަހައްދަށް އެޅިފައި ހުރި ހިލަތަށް ނެގުމަށް އަމުރުކޮށްދިނުމަށް އެދިފައެވެ.

މި މައްސަލަ ބެލުމަށްފަހު ކޯޓުން ވަނީ، އީޕީއޭއިން އެދިފައިވާގޮތަށް އިއްޔެއިން ފެށިގެން 14 ދުވަހުގެ ތެރޭގައި ބާޖު ނެގުމަށް ހުކުމްކޮށްފައެވެ. ސިވިލްކޯޓުން މި ހުކުމްކޮށްފައިވަނީ ބީއެމްސީ ސްލިޕްވޭގެ ޢައިރު ހާޒިރުގައެވެ.

ކުޅުދުއްފުށީ ވަރަށް އެ ބާޖު އަރާފައިވަނީ މީގެ ދެއަހަރެއްހާ ދުވަސްކުރިން 2023 ވަނަ އަހަރުގެ ޖުލައިމަހުގެ 14 ވަނަ ދުވަހުއެވެ.