ކަންކަންމަތީ ޕާާކުނުކުރެވޭ ގޮތް ހަދާ, ހަނިމަގުތަކުގެ ޕާކިންއަށް ބަދަލެއް ގެންނަނީ
ލިޔުންތެރިޔާ
އަހުމަދު ހަމީދު އާދަމް
ކަންކަންމަތީ ޕާާކުނުކުރެވޭ ގޮތް ހަދާ ހަނިމަގުތަކުގައި ޕާކުކުރެވޭ ގޮތަށް ބަދަލެއް ގެންނަން މަސައްކަތްތަކެއް ކުރެވެމުންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
"ނޭޝަން ޗެޓް"ގެ 2 ވަނަ އެޕިސޯޑްގައި ވާހަކަދައްކަވަމުން ރައީސް ވިދާޅުވީ މާލެ ސިޓީގައި ޕާކިން މައްސަލައަށް ހައްލެއް ހޯދުމަކީ ވަަރަށް އިސްކަން ދެއްވާ ކަމެއް ކަމަށެވެ. އެ މައްސަލަ ހައްލުވެ މާލެ އަކީ ފަސޭހަ ތަނަކަށް ހެދުމަކީ ކުރައްވާ ވަރަށް އުންމީދެއް ކަމުގައި ވިދާޅުވި އެވެ.
ރައީސް ވިދާޅުވީ މަގުތަކަކީ ފަސޭހަ ތަންތަނަށް ހެދުމަށް ޕާކިން ޒޯންތައް އިތުރުކޮށް ޕާކުކުރެވޭނެ ހަރުދަނާ އުސޫލެއް އޮތުން މުހިންމު ކަމަށެވެ. އެކަމަށް މަސައްކަތްތަކެއް ކުރެވެމުންދާ ކަމަށް ވިދާޅުވި އެވެ.
އެގޮތުން ކަންމަތިތަކުގައި ޕާކުނުކުރެވޭ ގޮތަށް ރޮނގު ދަމާ އެގޮތަށް ޕާކުރުން ހުއްޓުވަން ޖެހޭ ކަމުގައި ވިދާޅުވި އެވެ. އަދި ހަނިމަގުތަކުގައި ޕާކިން ކުރާ ގޮތް ބަދަލު ކުރަން ޖެހޭ ކަމުގައި ވިދާޅުވި އެވެ. މި މަސައްކަތް ކުރަން ޖެހެނީ ސިޓީ ކައުންސިލުން ކަމަށާ ނަމަވެސް ކައުންސިލްގެ ކަންކަން ހުރި ގޮތުން އެއްބާރުލުން ލިބޭނެހެން ހީފުޅުނުވާ ކަމުގައި ވިދާޅުވި އެވެ. ނަމަވެސް ކައުންސިލާއެކު މަސައްކަތް ކުރައްވާނެ ކަމަށް ވިދާޅުވި އެވެ.
މީގެ އިތުރުން ފައިސާ ދައްކައިގެން ޕާކުކުރެވޭނެ ފަދަ ތަންތަން ހެދުން ފަދަ ކަންކަން ކުރައްވަން މަސައްކަތް ކުރައްވާ ކަމުގައި ވިދާޅުވި އެވެ.
"މުޅި މައްސަލައަށް ހައްލެއް ގެނައުމުގެ މަސައްކަތް އެބަކުރެވޭ," ރައީސް ވިދާޅުވި އެވެ.
ރައީސް ވިދާޅުވީ މިކަންކަން ހައްލުކުރުމުގައި އެންމެ މުހިންމީ ފަރުދީ ޒިންމާ އަދާކުރުން ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
