މުޒާހަރާ ކޮށްގެން އިންޑިޔާ ސިފައިން ބާލަން އުޅުނު ނަމަ އެއްކަމެއް ވެސް ހާސިލް ނުވީސް: ރައީސް މުޢިއްޒު

މުޒާހަރާ ކޮށްގެން ގަދަބާރުން، ރާއްޖޭ ގައި ގާއިމްވެތިބި އިންޑިޔާ ސިފައިން ރާއްޖެއިން ބާލަން މަސައްކަތް ކުރި ނަމަ، އެއްވެސް ކަމެއް ހާސިލް ނުވީސް ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.

ވިލިނގިލީ ރައްޔިތުންނާއި ބައްދަލު ކުރައްވައި މިއަދު ބޭއްވި ޖަލްސާގައި ވާހަކަ ދައްކަވަމުން ރައީސުލްޖުމުހޫރިއްޔާ ވިދާޅުވީ، މައްސަލަތައް ހައްލު ކުރުމާއި، އެ ނޫންވެސް ކަން ކަމުގައި މަޝްވަރާގެ ރިވެތި އުސޫލުން ކުރިއަށް ދިޔުމަކީ ގައުމަށް އެންމެ މަސްލަހަތު ހުރި ގޮތް ކަމަށެވެ.

އެގޮތުން އިންޑިޔާ ސިފައިން ރާއްޖެއިން ބޭލުމުގައިވެސް މި ސަރުކާރުން ޢަމަލު ކުރީ މަޝްވަރާކުރުމުގެ އުސޫލު ކަމަށާ، ގަދަބާރުން އެކަން ކުރަން އުޅުނު ނަމަ، އެއްވެސް ކަމެއް ހާސިލް ނުވީސް ކަމަށެވެ.

މަޝްވަރާގެ އުސޫލުން ކަންކަން ކުރީމާ، ހުރިހާ އެންމެންގެ މަސްލަހަތު ހިމާޔަތްވެ، ނަތީޖާ އެންމެ ރަނގަޅު ވެގެން ދަނީ. ބޭރު ސިފައިން މި ގައުމުން ބޭލުމުގެ މައްސަލާގައިވެސް، ރުންކުރު ކަމާއި އެކީގައި، ގަދަބަދަވި ކަމާއިއެކީގައި، މުޒާހަރާ ކޮށް، އެކި ކަހަލަ ކަންކަން ކުރަން އުޅުނު ނަމަ، ކޮން ކަމެއްތޯ ހާސިލްވާނީ. އެއް ކަމެއްވެސް ހާސިލް ނުވީސް.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

އެހެންކަމުން، އިންޑިޔާ ސިފައިން ބޭލުމަށްވެސް ޑިޕްލޮމަސީ ގެ ރިވެތި އުސޫލުގެ މަތީން، ވެރިކަމާއި ހަވާލުވެވަޑައިގެންނެވި ފުރަތަމަ ދުވަހުން ފެށިގެން މަސައްކަތް ފެއްޓެވި ކަމަށް ރައީސް ވިދާޅުވި އެވެ. އަދި އެ މަސައްކަތް އެދުވަހުން ފެށިގެން މިއަދާއި ހަމައަށް އައި އިރު، އިންޑިޔާ ސިފައިން ރާއްޖެއިން ބޭލުމަށް އެއްބަސްވެ، އެގައުމުންނާއި ރާއްޖެއިން، އެ އެބަސްވުމުގައި ސޮއި ކޮށްފައިވާ ކަން ރައީސް މުޢިއްޒު ފާހަގަކުރެއްވި އެވެ.

ވުމާއެކު ހުރިހާ ކަމެއްވެސް މަޝްވަރާގެ ރިވެތި އުސޫލުން ކުރިއަށް ގެންދެވުމަށް އެމާނިކުފާނު ވަނީ ރައްޔިތުންގެ ކިބައިންވެސް އެދިވަޑައިގެންފައެވެ.

ރައީސް މުޢިއްޒު މިފަދައިން ވިދާޅުވެފައި ވާއިރު، މިއަހަރުގެ މެއި މަހުގެ 10 ވަނަ ދުވަހުގެ ކުރިން ރާއްޖޭގައި ތިބި ހުރިހާ އިންޑިޔާ ސިފައިން ރާއްޖެއިން ބޭލުމަށް އެގައުމުން އެއްބަސްވެފައިވާ ކަމަށް ސަރުކާރުން ވަނީ ބުނެފައެވެ. އެގޮތުން، އިންޑިއާ ސިފައިންގެ ފުރަތަމަ ގްރޫޕް އަންނަމަހުގެ 10 ވަނަ ދުވަހު ރާއްޖެއިން ފައިބާނެ ކަމަށާއި އަދި ދެން ތިބި އެންމެން މެއި މަހުގެ 10 ވަނަ ދުވަހު ރާއްޖެއިން ފައިބައިގެން ދާނެ ކަމަށް ބުނެފައިވެއެވެ.