ހަމަދު ސްކޫލްގެ ހިދުމަތްތެރި ޓީޗަރު، ސަތީޝްގެ ކުއްލި މަރު: ސްކޫލާއި ދަރިވަރުންނަށް ބޮޑު ހިތާމައެއް

ހައްދުންމަތީ ގަމު ހަމަދް ބިން ޚަލީފާ އަލް ތާނީ ސްކޫލަށް އިއްޔެއަކީ އެ ސްކޫލްގެ ތާރީހުގައިވެސް ކުރިމަތިވި އެންމެ ހިތާމަވެރި އެއް ދުވަހެވެ. އެ ސްކޫލްގައި ތީޗަރެއްގެ ގޮތުގައި ހިދުމަތް ކުރަމުން އަންނަތާ 18 އަހަރަށްވުރެ ގިނަދުވަސްވީ އިންޑިއާއަށް ނިސްބަތްވާ ސަތީޝް ގޮޕިނާތަން އިއްޔެ ކުއްލި މަރާ ގުޅިގެން ސްކޫލާއި ދަރިވަރުންގެ އިތުރުން މުޅި ރަށަށްވެސް ވަނީ ބޮޑު ހިތާމައެއް ކުރިމަތިވެފައެވެ. އެހާ ގިނަދުވަސްވީ ހިދުމަތްތެރި ޓީޗަރަކު ކުއްލިއަކަށް ތާ އަބަދައް ވަކިވެ ދިއުމުންނެވެ.

ސަތީޝް އަކީ ހަމަ ހުރިހާ އެންމެނަށްވެސް އެއްވަނައިގެ ޓީޗަރެކެވެ. ސަތިޝްގެ މަރާގުޅިގެން ހަމަދު ސްކޫލުން ނެރުނު ބަޔާނުގައި ބުނެފައިވަނީ ސްކޫލަށް ލިބިގެން އެ ދިޔައީ ވަރަށް ބޮޑު ހިތާމައެއްކަމަށެވެ. ސަތީޝް މަރުވިއިރު އޭނާ ވަނީ އެ ސްކޫލަށް 18 އަހަރާއި 9 މަސްދުވަހު ހިދުމަތްކޮށްފައެވެ. އޭނާއަކީ ދަރިވަރުންގެ މެދުގައި އެންމެ މަގްބޫލް ޓީޗަރެވެ. އެފަދަ ދެވަނައެއް ނުވާ މޮޅު ބައިއޮލޮޖީ ޓީޗަރެކެވެ.

ސަތީޝް މަރުވިކަން އެނގުނީ ކްލާހަށް އައުން ލަސްވެ، އޭނާގެ ހަބަރެއް ނުވެ ގިނައިރުވުމާ ގުޅިގެން ދިރިއުޅޭ ގެއަށްގޮސް ކޮޓަރި ބެލުމުންނެވެ. އޭގެ ކުރިން އޭނާ ބޮލުގައި ރިއްސާތީ އުޅުނުކަމަށް ކިޔަވައިދިން ބައެއެް ކުދިންގެ ފަރާތުން ވަނީ އެނގިފައެވެ. މިހާތަނަށް ލިބުނު މައުލޫމާތަށް ބަލާއިރު އޭނާ މަރުވެފައިވަނީ ހާޓްއެޓޭކެއް ޖެހިގެންނެވެ.

ސަތީޝް އަކީ ދަރިވަރުންނާއި ޓީޗަރުންގެ އިތުރުން ބެލެނިވެރިންނާވެސް ވަރަށް ގާތް ގުޅުމެއް އޮންނަ ޓީޗަރެކެވެ. ސްކޫލްގައި ހިންގާ ހަރަކާތްތަކުގައި އަމަލީގޮތުން އޭނާ އިސްވެ އުޅެއެވެ.ސަތީޝް މަރުވުމުން އެކަމުގެ ހިތާމާގައި މިއަދު ނަގަން އޮތް ޓެސްޓްތައްވެސް ވަނީ މާދަމައަށް ފަސްކޮށްފައެވެ.

މައުލޫމާތު ލިބިފައިވާ ގޮތުގައި މިހާރު މަސައްކަތްކުރަމުންދަނީ އޭނާގެ ހަށިގަނޑު އިންޑިއާއަށް ގެންދިއުމަށެވެ. ސަތީޝްގެ ހަށިގަނޑު މާލެ ގެނެސްފައިވާއިރު، އިއްޔެ ވަނީ އޭނާގެ މޫނު ދެއްކުމުގެ ކަންކަން ކުރިއަށްގެންގޮސްފައެވެ. ސަތީޝްއަށް އެންމެފަހުގެ އިހްތިރާމް އަދާކުރުމަށް ވަރަށް ގިނަ އަދަދެއްގެ މީހުން ވަނީ އޭނާގެ މޫނު ދެކިލުމަށް ހާޒިރުވެފައެވެ.