ޕޮއިންޓް ހަމަނުވާ 300 އަށްވުރެ ގިނަ މީހުންނަށް ކުރީ ސަރުކާރުން ފުލެޓް ދިން؛ ސޮއިކުރުން މަޑުޖައްސާލީ އެހެންވެ: މުއްޠަލިބު

ނިމިދިޔަ ސަރުކާރުން ކުރިއަށް ގެންދިޔަ ގެދޮރުވެރިޔާ ސްކީމްގެ ދަށުން ދޫކުރަން ނިންމި 4000 ފުލެޓަށް ޝަރުތު ހަމަނުވާ 300 އަށްވުރެ ގިނަ މީހުންނަށް ފުލެޓް އެލޮކޭޓް ކޮށްފައި ހުރި ކަމަށާ، ފުލެޓް ހަވާލުކުރުން މަޑުޖައްސާލީ އެ ސަބަބާހުރެ ކަމަށް ގެދޮރުވެރިކަމާބެހޭ ވަޒީރު ޑރ. ޢަބްދުالله މުއްޠަލިބު ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަށް ޖަވާބު ދެއްވަމުން މުއްޠަލިބު ވިދާޅުވީ، ނިމިދިޔަ ސަރުކާރު ނިމެން ކައިރިވެފައިވަނިކޮށް ފުލެޓް ލިބޭ މީހުން ކަނޑައަޅައި އެގްރީމަންޓްގައި ސޮއިކޮށް ނިންމާފައި އޮތްއިރު، ވަރަށް ބޮޑަށް ނާއިންސާފުން ކަންކޮށްފައިވާ ކަމަށެވެ. އަދި އެކަން މި ސަރުކާރަށް ފާހަގަވީ ފަހުން ކަމަށެވެ.

އެއީ ގެޒެޓްގައި އިން ލިސްޓްގައު ބުނާގޮތުން 76 މާކުސް އަށްވުރެ މަތިން ލިބިފައިތިބި ކޮންމެ މީހަކީ ފުލެޓް ލިބޭނެ ފަރާތެއް. 75 މާކްސް ލިބޭ ފަރާތްތަކަކީ ގުރުއަތަށް ދާނެ ފަރާތްތަކެއް. އެހެންނަމަވެސް 76 މާކުހަށްވުރެ މަތިން ލިބިފައިތިބި 325 ފަރާތަކަށް ފުލެޓް އެލޮކޭޓް ކުރުމެއްނެތި 75 މާކްސް ލިބިފައިތިބި 315 ފަރާތަކަށް ފުލެޓް އެލޮކޭޓް ކޮށްފައިއޮތީ

ވަޒީރު މުއްޠަލިބު

އެފަދައިން ކަންކޮށްފައިވާކަން ފާހަގަވީ ފުލެޓް ތަކުގައި ސޮއި ކުރުމަށް މިނިސްޓްރީން އެފްޑީސީއަށް ލިސްޓްތައް ފޮނުވަންފެށި ހިސާބުން ކަމަށް ވަޒީރު ވިދާޅުވިއެވެ.

އެހެންކަމުން، 75 މާކްސް ލިބި ފުލެޓް އެލޮކޭޓް ކޮށްފައި ތިބި މީހުން އެގްރީމަންޓްގައި ސޮއިކުރުން މަޑު ޖައްސާލަން އެންގެވި ކަމަށް ވަޒީރު ވިދާޅުވުއެވެ.

އެއީ ގެޒެޓްގައި ވަކިގޮތަކަށް ބަޔާންކޮށް އަންގައި، ލިބިދީފައިވާ ހައްގުތަކެއް ހިމާޔަތް ކުރުމަށް އެޅުއްވި ފިޔަވަޅެއް ކަމަށާ، އެއީ މި ސަރުކާރުން ބޭނުން ވެގެން ސިޔާސީ ގޮތުން ކުރި ކަމެއް ނޫން ކަމަށް ވަޒީރު ވިދާޅުވިއެވެ.

މުއްޠަލިބު އިތުރަށް ވިދާޅުވީ، މި ސަރުކާރުން ފުލެޓް ލިބޭ މީހުންގެ އައު ލިސްޓެއް ހަދާފައި ނުވާނެ ކަމަށާ، އެހެނެއް ކަމަކު ކުރީ ސަރުކާރުން ހަދާފައިވާ ލިސްޓްގައި ހުރި މީހުންގެ ތެރެއިން އެ ސަރުކާރުން ކަނޑައެޅި އުސޫލާ އެއްގޮތަށް މާކްސް ލިބިފައިވާ މީހުންނަށް ދީ، އުސޫލުން ބޭރުން ދީފައިވާ މީހުންގެ ފުލެޓް ނެގީ ކަމަށެވެ.

އަދި އެއީ އަބަދުވެސް ކަންކުރާ އުސޫލުކަމަށްވެސް އޭނާ ވިދާޅުވިއެވެ.