އިސްތިއުފާއެއް ނުދޭނަން، ވޯޓު ނަންގަވާ: ގަޕޯ
ލިޔުންތެރިޔާ
އަބްދުﷲ ހުސައިން
އެމްޑީޕީގެ ޗެއާޕާސަންކަމުގެ މަޤާމުން އިސްތިއުފާ ނުދެއްވާނެ ކަމަށާއި، އިތުބާރު ނެތްކަމުގެ ވޯޓު ނެގުން ކުރިއަށް ގެންދިއުމަށް އެޕާޓީގެ ޗެއާޕާސަން ޢަބްދުލްޢަފޫރު މޫސާ (ގަޕޯ) ވިދާޅުވެއްޖެއެވެ.
އެމްޑީޕީގެ 59 އަށްވުރެ ގިނަ ގައުމީ މަޖިލިސް މެންބަރުން ސޮޔާއެކު އެމްޑީޕީގެ ވަގުތީ ޗެއާޕާސަންގެ މަގާމުން ގަޕޯ ވަކިކުރަން ހުށަހަޅާފައެވެ. މިކަން ކުރިއަށްދަނިކޮށް، ގަޕޯ އިންނެވި ގްރޫޕެއްގައި މެމްބަރަކު ވަނީ، ގަޕޯއަށް ނިސްބަތްކޮށް ޤައުމީ މަޖިލީހުގެ 55 މެމްބަރުން ސޮއިކުރީމަ ދެން ރަނގަޅުވާނީ މަޤާމުން ދުރަށް ޖެހިލުންކަމަށް ވިދާޅުވެފައެވެ. މެމްބަރުގެ އެ މެސެޖަށް ކުރެއްވި ރިޕްލޭގައި ގަޕޯ ވިދާޅުވީ ޕާޓީގެ ޗެއާޕާސަންކަމުގެ މަޤާމުން އިސްތިއުފާ ނުދެއްވާނޭ ކަމަށެވެ. އަދި ވޯޓު ނެގުން ކުރިއަށް ގެންދިއުމަށްވެސް ވަނީ ވިދާޅުވެފައެވެ.
ގަޕޯގެ އިތުބާރު ނެތްކަމުގެ ވޯޓު ނެގުމަށް މެމްބަރުންގެ ސޮއި ހޯދުން
އެމްޑީޕީގެ ޗެއާޕާސަންކަމުގެ މަގާމުން ގަޕޯ ވަކިކުރުމުގެ މަސައްކަތް ފަށާފައިމިވަނީ، ނިމިގެންދިޔަ އިންތިހާބުން އެމްޑީޕީއަށް ލިބުނު ކާމިޔާބީ ފާހަގަކުރުމަށް ބޭއްވި ޖަލްސާގައި ރައީސް ނަޝީދަށް ވާހަކަދެއްކުމުގެ ފުރުސަތު ނުދިން މައްސަލަ އާއި އެކަމުގެ ސަބަބުން އެޕާޓީގެ ބައެއް މެމްބަރުން ޖަލްސާ ބޮއިކޮޓްކޮށްފައިވާ ދަނޑިވަޅެއްގައެވެ.
ޣަފޫރު މަގާމުން ވަކިކުރުމަށް އެދި ހުށަހެޅި މައްސަލާގައި ބުނީ، ޕާޓީގެ ވަގުތީ ޗެއަރޕަރސަންކަމުގެ މަގާމު، އޭނާއާ ހަވާލުކުރީ ސަރުކާރުން ހިންގަމުންގެންދާ ބޮޑެތި ޖަރީމާތައް ހުއްޓުވުމަށް ޕާޓީން ކުރަންޖެހޭ މަސައްކަތް އިންތިޒާމު ކުރުމަށް ކަމަށެވެ.
އަދި ޕާޓީއާމެދު ރައްޔިތުން ކުރަމުންދާ އުއްމީދުތައް ހަގީގަތަކަށް ހެދޭނީ ޕާޓީގެ މަސްލަހަތު ހިފަހައްޓައި، ޕާޓީއަށް ތާއީދު އިތުރުކޮށް، އާންމު މެންބަރުން ޕާޓީގެ ލީޑަރުންގެ ގޮތުގައި ބަލާ، އެއްވެސް ފަރާތެއް ބާކީ ނުކޮށް، އާންމު މެންބަރުންގެ އިހްސާސްތައް ދެނެގަނެގެން ޗެއަރޕަރސަންގެ މަސްއޫލިއްޔަތު އަދާކޮށްގެން ކަމަށްވެސް ބުންޏެވެ.
ޕެޓިޝަނުގައި ބުނެފައިވަނީ ގަޕޯ އަމަލުކުރިގޮތުން ޕާޓީގެ މެމްބަރުންގެ މެދުގައި ނުތަނަވަސްކަން ބޮޑުވެ، މަސްލަހަތުވެސް ގޯސްވެފައިވާކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
