މުލަކުގައި ކޯލްޑް ސްޓޯރޭޖް ފެސިލިޓީއެއް ގާއިމްކުރަނީ

މ.އަތޮޅު މުލަކުގައި ކޯލްޑް ސްޓޯރޭޖް ފެސިލިޓީއެއް ޤާއިމްކުރުމުގެ އެއްބަސްވުމުގައި މިއަދު ސައުދީގެ ކުންފުންޏަކާއެކު އެއްބަސްވުމެއްގައި ސޮއިކޮށްފިއެވެ.

މިކަމަށްޓަކައި މަސްވެރިކަމާ ބެހޭ ވުޒާރާގައި ބޭއްވި ރަސްމިއްޔާތުގައި، މަސްވެރިކަމާ ކަނޑުގެ ވަސީލަތްތަކާ ބެހޭ ވަޒީރު އަޙުމަދު ޝިޔާމްގެ ހާޒިރުގައި މުލަކުގައި ކޯލްޑް ސްޓޯރޭޖް ފެސިލިޓީ އެޅުމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ، ޑިރެކްޓަރ ޖެނެރަލް އީނާސް ނަސީރުއެވެ. ސައުދީގެ އާރްއޯއެސް ފޯ ޓްރޭޑިން ކުންފުނީގެ ފަރާތުން ސޮއިކުރެއްވީ ޑެޕިއުޓީ ޑައިރެކްޓަރު ހަމަދު މުހައްމަދު އަލްމިންހާލީ އެވެ.

މި އެއްބަސްވުމުގެ ދަށުން މުލަކުގައި 500 ޓަނުގެ ކޯލްޑް ސްޓޯރޭޖެއް ގާއިމްކުރުމަށް ވަނީ ހަމަޖެހިފައެވެ. މި ކޯލްޑް ސްޓޯރޭޖް ގާއިމްކޮށް ނިމުމުން އެތަނުގައި ދުވާލަކު 50 ޓަނުގެ މަސް ގަނޑުކޮށްފައި ބެހެއްޓޭނޭކަމަށް މަސްވެރިކަމާ ބެހޭ ވުޒާރާއިން ބުނެއެވެ.

މި މަޝްރޫޢުއަކީ 80 މިލިއަން ރުފިޔާގެ މަޝްރޫޢުއެކެވެ. މަސައްކަތް ނިންމަން ހަވާލުކޮށްފައިވަނީ، 300 ދުވަހުގެ ތެރޭގައި މަސައްކަތް ނިންމާގޮތަށެވެ.

މަސްވެރިކަމާ ބެހޭ ވުޒާރާއިން ބުނީ، މ.އަތޮޅު މުލަކުގައި ކޯލްޑް ސްޓޯރޭޖް ފެސިލިޓީއެއް ޤާއިމްކުރެވިގެން ދިއުމުން އެހިސާބުގެ މަސްވެރިންނަށް ވަރަށްބޮޑު ފަސޭހަތަކެއް ލިބިގެންދާނޭ ކަމަށެވެ.