ފަހަތުން އަރައި ޓީމު ހިޔާ ބަލިކޮށް ފްރިގޭޓާ އިން މުބާރާތް ފެށީ މޮޅަކާއެކު

ހޯރަފުށީގައި މިހާރު ކުރިއަށްދާ "ޖީއެސް އަންހެން ވޮލީބޯޅަ ޓޯނަމަންޓް 2024" ގެ ދެވަނަ މެޗުގައި އާދީއްތަ ދުވަހުގެ ހަވީރު އެފްސީ ފްރިގޭޓާއި ޓީމު ހިޔާ ބޮޓްލިން ވާދަކުރި ވާދަވެރި ކުޅުމަކަށްފަހު ތިން ސެޓު އެއް ސެޓުން އެފްސީ ފްރިގޭޓާ އިން ކާމިޔާބުކޮށްފި އެވެ.

މެޗުގެ ފުރަތަަމަ ސެޓް ފަސޭހަކަމާއި އެކު 17-25 އިން ޓީމް ހިޔާ ބޮޓްލިން ކާމިޔާބުކުރި، ނަމަވެސް ވާދަވެރި ކުޅުމަކަށްފަހު ދެވަނަ ސެޓް އެފްސީ ފްރިގޭޓާ އިން ކާމިޔާބުކުރީ 27-29 އިންނެވެ. އަދި ތިންވަނަ ސެޓް 18-25 އިން ކާމިޔާބުކުރިއިރު ހަތަރުވަނަ ސެޓް ފަސޭހަކަމާއި އެކު 13-25 އިން ކާމިޔާބުކުރި ފްރިގޭޓާ އިން ވަނީ ފަހަތުން އަރައި ތިން ސެޓު އެއް ސެޓުން މެޗު ކާމިޔާބުކޮށްފައެވެ. އަދި މިމެޗުގެ ކުއީން އޮފް ދަ މެޗަކަށް ހޮވުނީ އެފްސީ ފްރިގޭޓާގެ ޖާޒީ ނަމްބަރ 10 ޝާހާ އެވެ.

މިމުބާރާތަކީ ކުލަބު ޖީއެސްގެ ފަރާތުން އިންތިޒާމްކޮށްގެން ހއ. ހޯރަފުށީގައި ހަރަކާތްތެރިވާ ކުލަބު ޖަމިއްޔާތަކާއި، ސަރުކާރުގެ އޮފީސްތަކާއި ސަރުކާރު ހިއްސާވާ ކުންފުނިތަކާއި، އަމިއްލަ ކުންފުނިތަކުގެ އިތުރުން އަމިއްލަ ވިޔަފާރިތަކަށް ބައިވެރިވުމުގެ ފުރުސަތު ހުޅުވާލައިގެން ބާއްވާ މުބާރާތެކެވެ.

ޗެންޕިްއަން ޓީމަށް 10,000 ރުފިޔާ އަދި ރަނަރަޕް ޓީމަށް 5,000 ގެ ފައިސާގެ އިނާމެއް ހުށަހަޅާފައިވާ މިމުބާރާތުގައި ހަތަރު ޓީމަކުން ބައިވެރިވެފައިވާ އިރު މުބާރަތުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުންނެވެ.

ލީގު ބުރުގައި ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދާ ޓީމަކަށް މުބާރާތުގެ ފައިނަލުން ޖާގަ ލިބޭއިރު، ފައިނަލުގެ ދެވަނަ ޖާގަ ލިބިގެންދާނީ ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވޭ ޕްލޭއޮފް މެޗުން މޮޅުވާން ޓީމަކަށެވެ.

މިއަހަރުގެ މުބާރާތުގެ މެއިން ސްޕޮންސަރ އަކަށް ވިއޭނާ ސްޕޯޓްސް ކުލަބު ހަމަޖައްސާފައިވާ އިރު، މުބާރާތްގެ މީޑިއާ ޕާޓްނަރަކީ ވޮއިސް އެވެ.