ވެރިކަމަށް އައީ ބޮޑެތި މިލިޓަރީ އެގްރީމެންޓްތަކޭ ކިޔައިގެން ވާހަކަތައް ދައްކަމުން، ކުރި އެއްވެސް ކަމެއްނެތް: މާރިޔާ

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަމަށް ވަޑައިގަތީ ބޮޑެތި މިލިޓަރީ އެގްރީމެންޓްތަކޭ ކިޔައިގެން ވާހަކަތައް ދައްކަމުން ކަމަށާއި އެހެންނަމަވެސް ކުރެއްވި އެއްވެސް ކަމެއްނެތް ކަމަށް ކުރީ ސަރުކާރުގެ ދިފާޢީ ވަޒީރު އަދި އިދިކޮޅު އެމްޑީޕީގެ ކުރީގެ ޗެއަރޕަރސަން މާރިޔާ އަހުމަދު ދީދީ ވިދާޅުވެއްޖެއެވެ.

އެމްޑީޕީން މަޖިލިސް ކެމްޕޭނަށް ކުރިއަށްގެންދާ ހަރަކާތްތަކުގެ ތެރެއިން ރޭގައި ބޭއްވި މުޅި ހުޅުމާލެ ތަރާވީސް ޖަލްސާގައި ވާހަކަފުޅު ދައްކަވަމުން މާރިޔާ ވިދާޅުވީ، މަޖިލީހުގައި އެމްޑީޕީގެ މެޖޯރިޓީ އެއް އޮތް އިރުވެސް މި ހަތަރު މަސްދުވަހު ކޮށްލާފައިވާވަރު ފެންނަ ކަމަށާއި ރައީސް ޑރ.މުއިއްޒު ރާއްޖޭގެ މިސްރާބު އޮޅުވާލާފައި ކަމަށެވެ.

"އައީ ބޭރު މީހުންނޭ ކިޔައިގެން ބޮޑެތި މިލިޓަރީ އެގްރީމެންޓް ތަކޭ ހެދީ ކިޔައިގެން ވާހަކަތައް ދައްކަމުން، ކުރި އެއްވެސް ކަމެއް ނެތް. ހަމަ ހުރިހާ ކަމަކީ ދޮގާއި މަކަރާއި އޮޅުވާލުމާއި އިސްރާފު."

މާރިޔާ ވިދާޅުވިއެވެ.

މާރިޔާ ވިދާޅުވީ، ރައީސް ޑރ.މުއިއްޒު ވެރިކަމަށް ވަޑައިގަތީ ހުސް ގޮނޑި ބައިންދައިގެން، ކުރީގެ ރައީސް ޔާމީންގެ ފޮޓޯ ދައްކަވައިގެން ރައީސް ޔާމީންގެ ލަފާގެ މަތިން ސަރުކާރު ހިންގަވާނެ ކަމަށް ވިދާޅުވެފައިކަމަށެވެ. ނަމަވެސް މިއަދު ރައީސް ޔާމީން ގުޅުއްވުމުން ފޯނު ނުނަގައި، މެސެޖަށް ވެސް ޖަވާބު ނުދޭ ވާހަކަ ރައީސް ޔާމީން ވިދާޅުވާ ކަމަށް މާރިޔާ ވިދާޅުވިއެވެ.

މިސަރުކާރުން ވަޒީފާގެ ބިރުވެރިކަން ވެސް އިންތިހާއަށް ދައްކަމުންދާ ކަމަށާއި، ރަށްރަށަށް ވަޑައިގެންނެވުމުން އެކަމަނާ އަށް ވަޒީފާތަކުގައި އުޅޭ ފަރާތްތަކުން މެސެޖްކޮށް، އެމްޑީޕީ އާއި އެކީގައި ތިބި ނަމަވެސް އެ ޕާޓީ އާއި އެކު ފެނިލިޔަސް ވަޒީފާއިން ވަކި ކުރާނެ ކަމަށް ބުނަމުން އަންނަ ކަމަށް މާރިޔާ ވިދާޅުވިއެވެ. އެމްޑީޕީގެ މިދިޔަ 5 އަހަރު މިއިން އެއްވެސް ވާހަކައެއް ނީވޭނެ ކަމަށާއި ވަކި ޕާޓީ އަކަށް ނިސްބަތްވާތީ އެމީހާ ވަޒީފާއިން ވަކި ކުރުމަކީ އަނިޔާވެރިކަމެއްކަން އެމްޑީޕީން ވެސް ގަބޫލު ކުރާ ކަމަށްވެސް މާރިޔާ ވަނީ ވިދާޅުވެފައެވެ.

މީގެ އިތުރުންވެސް މާރިޔާ ވިދާޅުވީ، ރައީސް ޑރ.މުއިއްޒުގެ ތަރައްގީ ނުގެނައުމަށްޓަކައި މާލެ އާއި ރާއްޖެ ތެރޭގެ ހުރިހާ ޕްރޮޖެކްޓެއްވެސް ހުއްޓާލައިފައިވާ ކަމަށެވެ.