ވަޑިންގެ މަސައްކަތް ފުޅާކުރުމަށް ފަސޭހައިން ލޯނު ލިބޭނެ އިންތިޒާމެއް ހަމަޖައްސައިދޭނަން: ރައީސް ޑރ.މުއިއްޒު

އޮޑިދޯނިފަހަރު ބަނުމުގެ ދާއިރާގައި ހަރަކާތްތެރިވާ ވަޑިންނަށް، އެމީހުންގެ މަސައްކަތްތައް ފުޅާކުރުމަށް، ބޭންކިން ނިޒާމުގެ ތެރެއިން ފަސޭހައިން ލޯނު ލިބޭނެ އިންތިޒާމު ހަމަޖައްސަވައިދެއްވާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރ.އަތޮޅަށް ކުރައވްަމުްނގެންދަވާ ދަތުރުފުޅުގައި އިންނަމާދޫއަށް ވަޑައިގެން އެރަށު ރައްޔިތުންނާ ބައްދަލުކުރައްވައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ ރ.އަތޮޅަކީ އޮޑިދޯނުފަހަރު ބަނުމުމުގެ ފަންނުގައި ހާއްސަ އަތޮޅެއް ކަމަށާއި، އިންނަމާދޫއަށް ކުރި ދަތުރުގައި ވަޑިންނާއެކު ބޭއްވި ބައްދަލުވުމުގައި އެބޭފުޅުންގެ ހުރި މައިގަނޑު ކަންބޮޑުވުންތައް ސާފުވެފައިވާކަމަށެވެ. މިގޮތުން ވަޑިންނަށް އެންމެ ދަތިވާ އެއް މައްސަލައަކީ އެމީހުންގެ މަސައްކަތްތައް ފުޅާކުރުމަށް ބޭނުންވާ ފައިސާ ލިބުމުގެ ދަތިކަން ކަމަށާއި، އެކަމަށް ހައްލެއް ގެނައުމަށް ބޭންކިން ނިޒާމުގެ ތެރެއިން ވަޑިންނަށް ފަސޭހައިން ލޯނު ލިބޭނެ އިންތިޒާމް ހަމަޖައްސައިދެއްވާނޭކަމަށެވެ.

ރައީސް ވިދާޅުވީ ވަޑިންނަށް ދޭ ލޯނު ކަނޑައަޅާނީ ރަހުނަކާނުލައި ދެވޭނެ އުސޫލަކުން ކަމަށާއި، ފަސޭހައިން ލޯނު ނެގޭނެ ގޮތްތައް ހަމަޖެހިގެން ދިއުމުން މަސައްކަތްކުރާ ފަރާތްތަކަށް އިންޑަސްޓްރީ ފުޅާކުރުމުގެ ފުރުސަތު ފަހިވެގެންދާނެކަމަށެވެ.

ރައީސް ޑރ.މުއިއްޒު ވިދާޅުވީ ސަރުކާރުން ބޭނުންވަނީ އޮޑިދޯނިފަހަރު ބަނުމުގެ މަސައްކަތުގައި މުޅިންވެސް ދިވެހިން ހަރަކާތްތެރިވުން ކަމަށާއި، ބޭނުންވަނީ މި ދާއިރާއިން ދިވެހިންކުރިއަރާ ދިއުންކަމަށެވެ. ޒުވާނުންނަށް މި ފަންނުގައި ކުރިއަށްދިއުމަށް ހުރަސްތަކެއް ހުރިކަން ފާހަގަކުރައްވަމުން ރައީސް ވިދާޅުވީ، އިންނަމާދޫގައި ވަޑާންކުރުމުގެ ތަމްރީނުދޭނެ މަރުކަޒެއް ގާއިމްކުރުމަކީ އެމަނިކުފާނުގެ ވިސްނުމެއްކަމަށެވެ.

މިގޮތުން އިންނަމާދޫގައި ވަޑާންކުރުމުގެ ތަމްރީނުދޭ މަރުކަޒެއް ގާއިމްކޮށް ސްކިލްސް ޑިވެލޮޕްމަންޓް މިނިސްޓްރީތެރޭން އެކަމަށް ބޭނުންވާ ކަންކަން ކުރިއަށްގެންދާނޭކަމަށް ރައީސް ޑރ.މުއިއްޒު މިރޭ ވަނީ ވިދާޅުވެފައެވެ. ރާއްޖޭގެ އަތޮޅުތަކުގެ ތެރެއިން ރ.އަތޮޅަކީ ޒަމާނުއްސުރެ ހާއްސަ ގޮތެއްގައި ކިއްސަރު ވަޑާމަށް އެންމެ މަޝްހޫރު އަތޮޅެވެ. ރ.އަތޮޅުގެ ރަށްތަކުގެ ތެރެއިން ކިއްސަރު ވަޑާމަށް އެންމެ މަޝްހޫރު ރަށްތަކުގެ ތެރޭގައި އިނގުރައިދޫ، އަލިފުށި އަދި އިންނަމާދޫ ފާހަގަކޮށްލެވެއެވެ. ރާއްޖޭގައި އެންމެ ފުރަތަމަ އިންޖީނުއެޅި ދޯނީގެ މާވަޑިއަކީ ރ.އަތޮޅު އިނގުރައިދޫއަށް ނިސްބަތްވާ މާވަޑިއެކެވެ.