ޖުމުހުރީ ޕާޓީގެ ޓިކެޓްގައި މަޖިލިހަށް 10 ބޭފުޅަކު ވާދަކުރައްވަނީ

ކުރިއަށް އޮތް 20 ވަނަ ރައްޔިތުން މަޖިލިހުގެ އިންތިހާބުގައި ވާދަކުރުމަށް ޖުމުހުރީ ޕާޓީ ، ޖޭޕީގެ ފަރާތުން 10 ބޭފުޅަކު އިލެކްޝަން ކޮމިޝަނަށް ފޯމް ހުށަހަޅުންވައިފިއެވެ.

މި 10 ބޭފުޅުންގެ ތެރޭގައި ޖޭޕީގެ ލީޑަރ އަދި މާމިގިލީދާއިރާގެ މިހާރުގެ މެމްބަރ ޤާސިމް އިބުރާޙިމުވެސް ހިމެނި ވަޑައި ގަންނަވައެވެ. އޭގެ އިތުރުން ޤާސިމްގެ އަނބިކަނބަލުން އަދި ނިމިދިޔަ ރައީސް ޞާލިޙް ސަރުކާރުގެ ޓްރާންސްޕޯރޓް މިނިސްޓަރ އައިޝަތު ނަހުލާވެސް ހިމެނި ވަޑައިގަންނަވައެވެ.

ޖޭޕީ ޓިކެޓްގައި ދެން މަޖިލިހަށް ކުރިމަތިލައްވާ ބޭފުޅުންގެ ތެރޭގައި ރައީސް ޔާމީންގެ ވެރިކަމުގައި ޓްރާންސްޕޯރޓް މިނިސްޓަރުކަން ކުރެއްވި އަދި ނިމިދިޔަ ރިޔާސީ އިންތިހާބުގައި ޤާސިމް އިބުރާހިމްގެ ރަނިންގމޭޓުކަން ކުރެއްވި  ޑރ. އަމީން އިބުރާހިމާއި، ރައީސް ޞާލީޙް ސަރުކާރުގެ ފުރަތަމަ ހެލްތު މިނިސްޓަރުކަން ކުރެއްވި އަބުދުﷲ އަމީނާއި، ރައީސް ޔާމީންގެ ސަރުކާރު ގައި ހޯމް މިނިސްޓަރު ކަން ކުރައްވާފައިވާ އަޒުލީން ފާހަގަ ކޮށްލެވެއެވެ.

މި ބޭފުޅުން ހިމެނޭހެން ޖޭޕީގެ ޓިކެޓްގައި ވާދަކުރައްވާ ބޭފުޅުންނަކީ:

ގާސިމް އިބްރާހިމް - މާމިގިލީ ދާއިރާ

އައިޝަތު ނަހުލާ - ހުޅުމާލެ ދެކުނު ދާއިރާ

ޑރ. އަމީން އިބްރާހިމް - ހެންވޭރު ހުޅަނގު ދާއިރާ

އަބްދުﷲ އަމީން - އުނގޫފާރު ދާއިރާ

އަޒްލީން އަހްމަދު - ދުވާފަރު ދާއިރާ

އަލީ ހުސައިން - ކެންދޫ ދާއިރާ

އަބްދުﷲ އަހްމަދު - ތިނަދޫ ދެކުނު ދާއިރާ

ހުސައިން ޝަހުދީ - ނޮޅިވަރަމް ދާއިރާ

ނިޝާމާ މުހައްމަދު - ދާންދޫ ދާއިރާ

މުހައްމަދު ނަސީރު - އޭދަފުށީ ދާއިރާ

ޖޭޕީގެ ފަރާތުން ވާދަކުރައްވާ 10 ބޭފުޅުންގެ ތެރެއިން އަލީ ހުސެއިން އަކީ މިހާރުވެސް ކެންދޫ ދާއިރާ ތަމްސީލްކުރައްވަމުން ގެންދަވާ މެމްބަރެވެ. ޢަބުދުﷲ އަޙްމަދާއި، ހުސައިން ޝަހުދީ އަކީ ރައީސް ޔާމީނުގެ ވެރިކަމުގައި 18 ވަނަ ރައްޔިތުންގެ މަޖިލިހުގައި މަސައްކަތް ކުރައްވާފައިވާ މެމްބަރުންނެވެ.