އިންޑިއާގެ ކުންފުންޏަކުން ކޮލަމްބޯ ޑޮކްޔާޑުގެ މެޖޯރިޓީ ހިއްސާ ގަނެފި

އިންޑިއާގެ މަޒާގޮން ޑޮކް ޝިޕްބިލްޑާސް ލިމިޓެޑު ކުންފުނިން ސްރީލަންކާގެ ކޮލަމްބޯ ޑޮކްޔާޑުގެ ކޮންޓްރޯލިން ހިއްސާ 52.96 މިލިއަން ޑޮލަރަށް ގަނެފިއެވެ.

މިކަން ކޮލަމްބޯ ޑޮކްޔާޑުންވެސް މިހާރު ވަނީ މީޑިއާތަކަށް ޔަގީންކޮށްދީފައެވެ. މިކަމުގެ އެއްބަސްވުމުގައި ކޮލަމްބޯ ޑޮކްޔާޑުން އިންޑިއާގެ ކުންފުންޏާއެކު އެއްބަސްވުމުގައި ސޮއިކޮށްފައިވަނީ، މިހިގާ ޖޫންމަހުގެ 27 ވަނަ ދުވަހުކަމަށް ލަންކާގެ ނޫސްތަކުން ވަނީ ބުނެފައެވެ. މި އެއްބަސްވުމަށް ކޮލަމްބޯ ސްޓޮކް އެކްސްޗޭންޖުންވެސް ވަނީ ރުހުން ދީފައެވެ.

މަޒާގޮން ޑޮކް ޝިޕްބިލްޑާސްއިން ކޮލަމްބޯ ޑޮކްޔާޑުގެ މެޖޯރިޓީ ހިއްސާ ގަނެފައިވާއިރު، މީގެ ކުރިން އެ ހިއްސާ ކޮންޓްރޯލްކުރަމުން އައިސްފައިވަނީީ ޖަޕާނުގެ އޮނޮމިޗީ ޑޮކްޔާޑް ކޯ ލިމިޓެޑުންނެވެ. އެއްބަސްވުމާ ގުޅޭގޮތުން މަޒާގޮން ޑޮކް ކުންފުނިން ބުނެފައިވަނީ، ކުރިއަށްއޮތްތަނުގައި ކޮލަމްބޯ ޑޮކްޔާޑް ފެނިގެންދާނީ މިހާރަށްވުރެ ފުރިހަމަ ޑޮކްޔާޑެއްގެ ގޮތުގައެވެ. އިންޑިއާގެ މަޒާގޮން ޑޮކް ޝިޕްބިލްޑާސް ލިމިޓެޑަކީ އެޤައުމުގެ ސަރުކާރުގެ ކުންފުންޏެކެވެ. އިންޑިއާގެ އަސްކަރިއްޔާގައި ހިމެނޭ ނޭވީ އުޅަނދުތައްކަމަށްވާ ސަބްމެރިނާއި، މަނަވަރުތަކާއި އެނޫންވެސް އުޅަނދުތައް ބަނދެ މަރާމާތު ކޮށް ބެލެހެއްޓުމުގެ ކަންކަން ކުރަމުންގެންދަނީވެސް މަޒާގޮން ޑޮކް ޝިޕްބިލްޑާސް އިންނެވެ.

ކޮލަމްބޯ ޑޮކްޔާޑް ވުޖޫދަށް އައިސްފައިވަނީ 1974 ވަނަ އަހަރެވެ. ކޮލަމްބޯ ޑޮކްޔާޑަކީ އެ ޤައުމުގެ އެންމެބޮޑު އެއް ޑޮކްޔާޑެވެ. އިންޑިއާއިން ކޮލަމްބޯ ޑޮކްޔާޑުގެ މެޖޯރިޓީ ހިއްސާ ގަނެފައިވާއިރު، ހަމްބަންޓޯޓާ ޕޯޓް ކޮންޓްރޯލްކުރަނީ ޗައިނާ ސަރުކާރުގެ ކުންފުންޏަކުންނެވެ.