އޮޑިޓާއި ގުޅިގެން އިސްލާޙީ ފިޔަވަޅުތައް އަޅަން ފަށައިފިން: ފެނަކަ

ނިމިގެންދިޔަ އެމްޑީޕީ ސަރުކާރުގައި ފެނަކަ ކޯޕަރޭޝަނުގައި ހިންގާފައިވާ ކަމަށް ތުހުމަތުކުރެވޭ ޚިޔާނާތާއި ކޮރަޕްޝަނުގެ މައްސަލަތަކާ ގުޅިގެން، ދައުލަތުގެ އޮޑިޓަރ ޖެނެރަލް ފާހަގަކުރެއްވި މައްސަލަތައް ހައްލުކުރުމަށް މިހާރު މަސައްކަތް ފަށާފައިވާ ކަމަށް ފެނަކައިން ބުނެފިއެވެ.

ފެނަކައިން ރޭ ނެރުނު ބަޔާނެއްގައި ބުނެފައިވަނީ މިހާރު ކުންފުނި ހިންގަމުންދަނީ ހުރިހާ ޤާނޫނުތަކާއި ގަވާއިދުތަކާ އެއްގޮތަށް ކަމަށެވެ. އަދި މައްސަލަތައް ހައްލުކުރުމަށް ކުންފުނިން ހަރުދަނާ ޕްލޭނެއް އެކުލަވާލާފައިވާ ކަމަށް ވެސް އެ ބަޔާނުގައި ބުންޏެވެ.

އެގޮތުން އެ ޕްލޭންގެ ދަށުން ކުންފުނީގެ މުދަލާއި ޚިދުމަތްތައް ގަވާއިދުތަކާއި އުސޫލުތަކާ އެއްގޮތަށް ހުރިތޯ ބަލައި، ކުންފުނީގެ މަސައްކަތްތައް މޮނިޓާކޮށް ބެލެހެއްޓުމަށް ވަރުގަދަ ނިޒާމެއް ޤާއިމްކުރުމަށް ވަނީ ނިންމާފައެވެ. މީގެ އިތުރުން، ކުންފުނީގެ މެނޭޖްމަންޓް އޮނިގަނޑު ހަރުދަނާކޮށް، ސްޓޭކްހޯލްޑަރުންނާއެކު އޮންނަ ގުޅުން ވަރުގަދަކުރުމަށް ވެސް ރޭވިފައިވާ ކަމަށް ފެނަކައިން ބުންޏެވެ.

މަޢުލޫމާތު ހާމަކުރުމާއި ރިޕޯޓުކުރުމުގެ އުސޫލުތައް ހަރުދަނާކުރުމަށްވެސް އެ ކުންފުނިން ވަނީ ނިންމާފައެވެ. މިފަދަ މައްސަލަތައް ތަކުރާރުވިޔަ ނުދިނުމަށްޓަކައި، ޤާނޫނާ ޚިލާފުވެފައިވާ ނުވަތަ އިހުމާލުވެފައިވާކަން ސާބިތުވާ ފަރާތްތަކާމެދު ޤާނޫނީ ފިޔަވަޅު އަޅާނެކަމަށް ވެސް ފެނަކައިން ބުނެފައިވެއެވެ.

ފެނަކައިން އިތުރަށް ބުނެފައިވަނީ މިފަދަ މައްސަލަތަކުގައި އިހުމާލުވެފައިވާ ފަރާތްތަކުގެ މައްސަލަތައް ކަމާބެހޭ ދައުލަތުގެ މުއައްސަސާތަކަށް ހުށަހަޅާނެ ކަމަށެވެ.

ފެނަކައިން އެހެން ބުނިއިރު، އޭސީސީން މިހާރުވެސް ކުރީގެ އެމްޑީ އަޙްމަދު ސަޢީދަށް ތުހުމަތުވާ ކޮރަޕްޝަނުގެ ގިނަ މައްސަލަތަކެއް ބަލަމުންނެވެ. އަދި މިދިޔަ ބުރާސްފަތި ދުވަހުގެ ރޭ އޮޑިޓަރު ޖެނެރަލް ނެރުއްވި ފެނަކައިގެ ރިޕޯޓްގައި ސައީދުގެ އެމްޑީ ކަމުގައި ހިންގި 2.2 ބިލިއަންގެ ބޮޑު ހިޔާނާތް ވަނީ ހާމަވެފަ އެވެ.

އެގޮތުން ސަޢީދާއި އާއިލީ ގޮތުން ގުޅުން އޮންނަ ތިން ކުންފުންޏަކަށް ވާދަވެރި ބީލަމެއްގެ ޕްރޮސެސް އިން ބޭރުން މުޅި ޖުމްލަ 92 އެއްބަސްވުމެއްގެ ދަށުން 49.7 މިލިއަން ރުފިޔާގެ އެއްބަސްވުން ހެދިކަން ވެސް ވަނީ ފަޅާއަރާފައެވެ.

އެއީ ޝެލްޓާ ހޯލްޑިންސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާއި ޕަަވަރޭ އިންވެސްޓްމެންޓް ޕްރައިވެޓް ލިމިޓެޑް ނަމަކަށް ކިޔާ ކުންފުނި އަދި ކޮރަލް އިންވެސްޓްމެންޓް ޕްރައިވެޓް ލިމިޓެޑް އެވެ.

ރިޕޯޓްގައިވާ ގޮތުން މީގެ ތެރެއިން ދެ ކުންފުންޏަކީ ސައީދުގެ ޅިޔަނުންގެ ކުންފުނިތަކެވެ. އަދި އަނެއް ކުންފުންޏަކީ ޅިޔަނެއްގެ ދަރިއެއްގެ ކުންފުންޏެކެވެ. އެގޮތުން އެ ތިން ކުންފުންޏަށް އެކަނި ވެސް މުޅި ޖުމްލަ 31 މިލިއަން ރުފިޔާ ދޫކޮށްފައިވާ ކަމަށް އެ ރިޕޯޓުން ދައްކައިފައިވެއެވެ.

އަދި ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށް އޭނާގެ މައްޗަށް ސާބިތުވެ، ހަތަރު އަހަރަށް ސަޢީދު ވަނީ ޖަލަށް ވެސް ލާފައެވެ. އެގޮތުން ސައީދުގެ މައްޗަށް ދައުވާކުރީ ބްލޭޒަން އިންކް ކިޔާ ކުންފުންޏަކާއެކު ފެނަކައިން ހެދި އެއްބަސްވުމެއްގެ މައްސަލައިގަ އެވެ. ދައުވާގައިވާ ގޮތުން އެ ކުންފުންޏާ ހަވާލުކުރި މަސައްކަތް އެކީ ނުނިންމަނީސް، އަދި މަސައްކަތް ފުރިހަމަކުރިކަން ކަށަވަރުނުކޮށް، އެ މަސައްކަތަށް ދޭންޖެހޭ ފައިސާ ފެނަކައިން ބްލޭޒަން އިންކަށް ދޫކޮށްފައިވާ ކަމަށެވެ.

މި ފައިސާ ދޫކުރުމުގެ ސަބަބުން ފެނަކައަށް 848,000ރ (އަށް ލައްކަ ސާޅީސް އަށް ހާސް ރުފިޔާ) ގެ ގެއްލުމެއް ލިބިފައިވެ އެވެ. އެގޮތަށް މަސައްކަތް ނުނިމެނީސް ފައިސާ ދޫކުރުމަކީ އެ ކުންފުންޏަށް ނާޖާއިޒު މަންފާ ހޯދައިދިނުމަށް ހިންގާފައިވާ އަމަލަކަށްވާތީ އެ މައްސަލާގައި ދައުވާކުރީ 2024 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު އެވެ.