ކޮޅުފުށި މަގުތައް ތަރައްޤީކުރުމުގެ ޢަމަލީ މަސައްކަތް ރައީސް ޑރ. މުޢިއްޒު ފައްޓަވައިދެއްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މ. އަތޮޅުގެ ރަށްތަކަށް ކުރައްވާ ރަސްމީ ދަތުރުފުޅުގެ ތެރެއިން، މ. ކޮޅުފުށި މަގުތައް ތަރައްޤީކުރުމުގެ ޢަމަލީ މަސައްކަތް ފެށުމުގެ ރަސްމިއްޔާތު ޝަރަފްވެރިކޮށްދެއްވައިފިއެވެ.

މި މަސައްކަތް ރަސްމީކޮށް ފައްޓަވައިދެއްވީ މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބްއެވެ. މި ރަސްމިއްޔާތުގައި ރައީސުލްޖުމްހޫރިއްޔާގެ އަރިހުގައި، މުލަކު ދާއިރާގެ މެންބަރު އިބްރާހީމް ނައުފަލް އާއި ރޯޑް ޑިވެލޮޕްމަންޓް ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރ އިބްރާހީމް ނަޡީމް އަދި ކޮޅުފުށީ ކައުންސިލްގެ ރައީސް ޢަބްދުލް ޢަލީމް ބައިވެރިވެވަޑައިގެންނެވިއެވެ.

މ. ކޮޅުފުށީގެ މަގުތައް ތަރައްޤީކުރުމަށްޓަކައި ކުރިޔަށްގެންދާ މި ބޮޑު މަޝްރޫޢަށް 93,787,059.02 ރުފިޔާ ޚަރަދުވާނެ ކަމަށް ވަނީ އަންދާޒާކުރެވިފައެވެ. މި މަސައްކަތް ނިންމުމަށް 730 ދުވަހުގެ މުއްދަތެއް ކަނޑައަޅާފައިވާއިރު، ރަށުގެ ރައްޔިތުންނަށް ދިގު މުއްދަތަކަށް ފައިދާކުރާނެ، ފެންވަރު ރަނގަޅު މަގުތަކެއް ޤާއިމުކުރުމަކީ މި މަޝްރޫޢުގެ މައިގަނޑު މަޤްޞަދެކެވެ.