އަމީނީ މަގުގެ ފުރަތަމަ ސެގްމަންޓު އާދިއްތަ ދުވަހު ހުޅުވަނީ
ލިޔުންތެރިޔާ
އަޙްމަދު އާހިލް ސަޢީދު
އަމީނީ މަގުގައި އަލުން ތާރު އެޅުމަށްފަހު ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމައަށް އޮތް ބައި އަންނަ އާދިއްތަ ދުވަހު ޢާންމު ދަތުރުފަތުރަށް ހުޅުވައިލުމަށް ނިންމައިފިއެވެ.
ހައުސިން މިނިސްޓްރީން މިއަދު ބުނީ ހުޅުވާލުމަށް ތައްޔާރުވަމުން ދަނީ ސެގުމަންޓު އެކެއް ކަމަށެވެ. ދެވަނަ ސެގުމަންޓުގެ ގޮތުގައި ހިމެނޭ ދިވެހިރާއްޖޭގެ އަޑު ކުރިމަތީ ހަތަރު އަނގޮޅީގައި ވެސް މިހާރު ތާރު އެޅުމުގެ މަސައްކަތް ނިމިފައިވީ ނަމަވެސް އެ ސަރަހައްދު ހުޅުވާނެ ވަކި ދުވަހެއް އަދި އިޢުލާނެއް ނުކުރެއެވެ.
މި މަސައްކަތް ކުރިއަށް ގެންދަނީ އެމްޓީސީސީންނެވެ. އަމީނީމަގުގެ މަރާމާތުގެ މަސައްކަތްތަކަށް ދަރުމަވަންތަ ހޮސްޕިޓަލާ ހަމައަށް މަގު ބަންދުކުރީ މިދިޔަ ޖޫން މަހުގެ ފަހުކޮޅުގައެވެ. މަސައްކަތް ކުރާ ސަރަހައްދު ބަންދުކުރިއިރު، އެ މަގުން ދަތުރުކުރި ބައެއް ބަސް ރޫޓުތަކަށް ވެސް ބަދަލު ގެނެސްފައިވެއެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ވެރިކަމުގައި ޕްލޭނިން ވުޒާރާއިން 84.4 މިލިއަން ރުފިޔާއަށް އާރުޑީސީއާ ހަވާލުކޮށްގެން ފެށި މި މަޝްރޫޢުގެ ފަހު ސެގުމަންޓުގައި ތާރު އެޅީ މި ސަރުކާރުން ވެރިކަމާ ހަވާލުވުމަށްފަހުގައެވެ.
ނަމަވެސް، ހާބަރު ފުޑް ކޯޓު ހިސާބުން ތާރުގަނޑު އުފުލި ދަތުރުކުރާ ފަރާތްތަކަށް ބޮޑެތި ދަތިތަކާ ކުރިމަތިވުމުން ސަރުކާރަށް ފާޑުކިޔުން އަމާޒުވެ އެ މައްސަލަ ހައްލުކުރުމަށް އަލުން ތާރު އެޅުމުގެ މަސައްކަތް ސަރުކާރުން ވަނީ ފަށާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
