ދ. މީދޫ ރައީސަކު ހޮވުން: ސުހާ ކޮޅަށް މައްސަލަ ނިމި އަލުން ވޯޓްލާން ޖެހިއްޖެ
ދ. މީދޫ ކައުންސިލްގެ ރައީސް ކަަމަށް ބޭފުޅަކު އިންތިހާބު ކުރުމަށް އަލުން ވޯޓް ނަގަން ޖެހިއްޖެ އެވެ.
އަލުން ވޯޓް ނަގަން ޖެހުނީ މިއަދު ހައިކޯޓުން ނިންމި ނިންމުމާއި ގުޅިގެންނެވެ. އެ ކޯޓަށް ވަނީ މީދޫ ކައުންސިލްގެ ރައީސް ހޮވުމަށް ނެގުނު ވޯޓާއި ގުޅިގެން އިންތިހާބީ މައްސަލައެއް ހުށައަޅާފަ އެވެ.
މީދޫ ކައުންސިލްގެ ރައީސް ކަމަށް ވާދަކުރީ ޕީއެންސީގެ ކެންޑިޑޭޓް ސުހާ އިބްރާހިމް އާއި އެމްޑީއޭ ކެންޑިޑޭޓް މުޙައްމަދު ޝާހިދު އެވެ. އިންތިހާބުގެ ނަތީޖާ ފުރަތަމަ ބުރަވެފައި އޮތީ ސުހާ ކޮޅަށެވެ. ނަމަވެސް ހުށައެލި ޝަކުވާއަކާއި ގުޅިގެން ވޯޓް އަލުން ގުނި އެވެ. އަދި އެއް ވޯޓް ބާތިލު ކަމަށް ކަނޑައެޅި އެވެ. އެއީ ސުހާއަށް ލިބިފައިވާ ވޯޓެކެވެ.
އެހެން ކަމުން ކޮމިޝަނުން ނިންމީ 392 ވޯޓުން އިންތިހާބު ކާމިޔާބު ކުރީ އެމްޑީއޭ ކެންޑިޑޭޓް މުޙައްމަދު ޝާހިދު ކަމަށެވެ.
އެ ނިންމުން ސުހާގެ ފަރާތުން ހައިކޯޓަށް ހުށައެޅި އެވެ. ހައިކޯޓުން ވަނީ ކޮމިޝަނުން ބާތިލު ވޯޓެއް ކަމަށް ނިންމި ވޯޓަކީ ސައްހަ ވޯޓެއް ކަމަށް ކަނޑައަޅާފަ އެވެ. އަދި އަލުން ނަތީޖާ އިއުލާނު ކުރަން އަމުރުކުރި އެވެ.
އެހެން ކަމުން ދެ ކެންޑިޑޭޓުންނަށް ވެސް ލިބޭނީ 392 ވޯޓެވެ.
އޭޕްރީލް މަހުގެ ހަތަރުވަަނަ ދުވަހު އޮތް އިންތިހާބުގައި އެންމެ މައްސަލަ ބޮޑުވި ދ. މީދޫ ކައުންސިލްގެ ރައީސް އިންތިހާބު ކުރުމުގެ ވޯޓް އަލުން މިވަނީ ނަގަން ޖެހިފަ އެވެ.
ހައިކޯޓްގެ ނިންމުމާއި ގުޅިގެން އިލެކްޝަންސް ކޮމިޝަނުން އަދި ވަކި އެއްޗެއް ނުބުނެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
