ވިއްސާރަވުމުގެ ސަބަބުން މާލޭގައި ފެންބޮޑުވެ ގެއްލުންވާ ގެތަކުގެ މަޢުލޫމާތު އެމްއެންޑީއެފުން އެއްކުރަނީ
ވިއްސާރަވުމުގެ ސަބަބުން މާލޭގައި ފެންބޮޑުވެ ގެއްލުންވާ ގެތަކުގެ މަޢުލޫމާތު ގައުމީ ދިފާއީ ބާރު، އެމްއެންޑީއެފުން އެއްކުރަން ފަށައިފިއެވެ.
މި ކަމާއި ގުޅިގެން އެމްއެންޑީއެފުން ބުނީ މި ސާވޭ ކުރިއަށް ގެންދަނީ އެމްއެންޑީއެފް ގެ މާލެ އޭރިއާ ކޮމާންޑުން ކަމަށެވެ.
މި ސާވޭގެ މަޤުސަދަކީ މާލޭގައި ފެން ބޮޑުވާ ގޭތަކުގެ މައުލޫމާތު އެއްކުރުމާއި އެ ގޭތަކުގެ ލޮކޭޝަންތައް މެޕްކުރުމާއި އަދި ފެން ބޮޑުވެގެން ލިބޭ ގެއްލުންތައް ކުޑަކުރުމަށް ދުރާލާ އެޅިދާނެ ފިޔަވަޅުތައް ހިއްސާކުރުން ކަމަށް އެމްއެންޑީއެފުން ބުނެއެވެ.
މި މަހުގެ 6 އިން 8 ވަނަ ދުވަހުގެ ނިޔަލަށް ކުރިއަށް ދާ މި ސާވޭގައި 2023 ޑިސެންބަރު 31 ވަނަ ދުވަހު މާލެއަށް ކުރި ވިއްސާރައިގެ ސަބަބުން ފެން ބޮޑުވެ ގެއްލުން ލިބުނު ގެތަކަށް އެމްއެންޑީއެފުން ޒިޔާރާތްކޮށް މައުލޫމާތު އެއްކުރުމަށް ވަނީ ހަމަޖެހިފައެވެ.
ދާދި ފަހުން ރާއްޖެއަށް ކުރި ވިއްސާރައިގައި މާލޭގައި ފެންބޮޑުވުމުގެ ސަބަބުން މާލޭގެ 140 ގެއަކަށް ފެން ވަދެ 11 ގޭބިސީއެއްގައި ހިމެނޭ 46 މީހަކު ގެސްޓްހައުސްތަކަށް ވަނީ ބަދަލުކޮށްފައެވެ. އަދި ތިން ދުވަސް ވަންދެން މި މީހުންގެ ކެއުމުގެ ހަރަދާއި ތިބުމުގެ ހަރަދު ސަރުކާރުން ވަނީ ދީފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
